లూకా 3

3 ¹తిబెరి కైసరు పరిపాలనలో పదునైదవ సంవత్సరమున, పొంతి పిలాతు యూదయకు అధిపతిగా ఉండగా, హేరోదు గలిలయకు చతుర్థాధిపతిగాను, అతని సహోదరుడైన ఫిలిప్పు ఇతూరయ త్రకోనీతి ప్రాంతమునకు అధిపతిగాను, లుసానియ అబిలేనేకు అధిపతిగాను ఉండగా, ²అన్న, కయప అనువారు ప్రధాన యాజకులుగా ఉన్న కాలమున, అరణ్యములో ఉన్న జెకర్యా కుమారుడైన యోహానుకు మన తండ్రి వాక్కు వచ్చెను. ³అతడు పాపముల క్షమాపణ నిమిత్తమై మారుమనస్సు విషయమైన బాప్తిస్మమును ప్రకటిస్తూ యొర్దాను ప్రాంతమంతటిలో సంచరించెను, ⁴ప్రవక్తయైన యెషయా మాటల గ్రంథములో వ్రాయబడినట్లు: "అరణ్యములో కేకవేయుచున్న ఒకని స్వరము: ప్రభువు మార్గమును సిద్ధపరచుడి, ఆయన త్రోవలను తిన్ననివిగా చేయుడి. ⁵ప్రతి లోయ పూడ్చబడును, ప్రతి కొండయు గుట్టయు అణచబడును. వంకర మార్గములు తిన్ననివిగాను, కరుకు త్రోవలు నునుపైనవిగాను అగును, ⁶సర్వశరీరులు మన తండ్రి రక్షణను చూతురు."

⁷అప్పుడు తనచేత బాప్తిస్మము పొందుటకు వచ్చిన జనసమూహములతో యోహాను ఇట్లనెను: "సర్పసంతానమా! రాబోవు ఉగ్రతనుండి పారిపొమ్మని మిమ్మును ఎవరు హెచ్చరించిరి? ⁸కాబట్టి మారుమనస్సుకు తగిన ఫలము ఫలించుడి. 'అబ్రాహాము మాకు తండ్రి' అని మీలో మీరు చెప్పుకొన మొదలుపెట్టవద్దు. ఈ రాళ్లనుండి అబ్రాహామునకు పిల్లలను పుట్టించుటకు మన తండ్రి సమర్థుడని నేను మీతో చెప్పుచున్నాను. ⁹ఇప్పటికే గొడ్డలి చెట్ల వేరున ఉంచబడియున్నది; మంచి ఫలము ఫలించని ప్రతి చెట్టు నరకబడి అగ్నిలో వేయబడును."

¹⁰అప్పుడు జనసమూహములు అతనిని, "అట్లయితే మేమేమి చేయవలెను?" అని అడిగిరి.

¹¹అందుకతడు, "రెండు అంగీలు గలవాడు ఏమియు లేనివానికి పంచియిమ్ము; ఆహారము గలవాడును ఆలాగే చేయవలెను" అని వారితో చెప్పెను.

¹²సుంకరులును బాప్తిస్మము పొందుటకు వచ్చి, "బోధకుడా, మేమేమి చేయవలెను?" అని అతనిని అడిగిరి.

¹³"మీకు నిర్ణయించబడిన దానికంటె ఎక్కువ వసూలు చేయవద్దు" అని అతడు వారితో చెప్పెను.

¹⁴సైనికులును, "మేమో—మేమేమి చేయవలెను?" అని అతనిని అడిగిరి. అందుకతడు వారితో, "బలవంతముగాగాని అబద్ధపు నేరములు మోపిగాని ఎవరినీ దోచుకొనవద్దు; మీ జీతముతో తృప్తిపడుడి" అని చెప్పెను.

¹⁵ప్రజలు కనిపెట్టుకొని యుండి, యోహానే క్రీస్తు అయియుండునేమో అని అందరును తమ హృదయములలో తలపోయుచుండిరి. ¹⁶అప్పుడు యోహాను వారందరితో ఇట్లనెను, "నేను నీళ్లతో మీకు బాప్తిస్మమిచ్చుచున్నాను. అయితే నాకంటె బలవంతుడైన ఒకడు వచ్చుచున్నాడు—ఆయన చెప్పుల వారును విప్పుటకైనను నేను యోగ్యుడను కాను. ఆయన పరిశుద్ధాత్మతోను అగ్నితోను మీకు బాప్తిస్మమిచ్చును. ¹⁷చేటను చేతపట్టుకొని ఆయన తన కళ్లమును బాగుగా శుభ్రపరచి, గోధుమలను తన కొట్టులో పోగుచేసి, పొట్టును ఆరని అగ్నితో కాల్చివేయును."

¹⁸మరియు ఇంకను అనేక హెచ్చరిక మాటలతో యోహాను ప్రజలకు సువార్త ప్రకటించెను. ¹⁹అయితే యోహాను చతుర్థాధిపతియైన హేరోదును, అతని సహోదరుని భార్యయైన హేరోదియ విషయమునను, హేరోదు చేసిన సమస్త దుష్టకార్యముల విషయమునను గద్దించినందున, ²⁰హేరోదు వాటన్నిటికి దీనిని కూడ కలిపి యోహానును చెరసాలలో బంధించెను.

తండ్రి తన కుమారుని ప్రియుడని పిలుస్తున్నాడు

²¹ప్రజలందరును బాప్తిస్మము పొందిన తరువాత, యేసును బాప్తిస్మము పొందెను. ఆయన ప్రార్థించుచుండగా ఆకాశము తెరవబడెను,

²²పరిశుద్ధాత్మ గువ్వవలె శరీరాకారముతో ఆయనమీదికి దిగివచ్చెను. మరియు ఆకాశమునుండి ఒక స్వరము వచ్చెను: "నీవు నా ప్రియ కుమారుడవు; నీయందు నేను ఆనందించుచున్నాను."

²³యేసు తన పరిచర్యను ఆరంభించునప్పుడు దాదాపు ముప్పది సంవత్సరముల వాడు, ఆయన—అనుకొనబడినట్లు—యోసేపు కుమారుడు, యోసేపు హేలీ కుమారుడు, ²⁴హేలీ మత్తతు కుమారుడు, మత్తతు లేవీ కుమారుడు, లేవీ మెల్కీ కుమారుడు, మెల్కీ యన్నయి కుమారుడు, యన్నయి యోసేపు కుమారుడు, ²⁵యోసేపు మత్తతీయ కుమారుడు, మత్తతీయ ఆమోసు కుమారుడు, ఆమోసు నహూము కుమారుడు, నహూము ఎస్లీ కుమారుడు, ఎస్లీ నగ్గయి కుమారుడు, ²⁶నగ్గయి మయాతు కుమారుడు, మయాతు మత్తతీయ కుమారుడు, మత్తతీయ షిమీ కుమారుడు, షిమీ యోసేకు కుమారుడు, యోసేకు యోదా కుమారుడు, ²⁷యోదా యోహన్న కుమారుడు, యోహన్న రేసా కుమారుడు, రేసా జెరుబ్బాబెలు కుమారుడు, జెరుబ్బాబెలు షయల్తీయేలు కుమారుడు, షయల్తీయేలు నేరి కుమారుడు, ²⁸నేరి మెల్కీ కుమారుడు, మెల్కీ అద్దీ కుమారుడు, అద్దీ కోసాము కుమారుడు, కోసాము ఎల్మదాము కుమారుడు, ఎల్మదాము ఏరు కుమారుడు, ²⁹ఏరు యెహోషువ కుమారుడు, యెహోషువ ఎలీయెజెరు కుమారుడు, ఎలీయెజెరు యోరీము కుమారుడు, యోరీము మత్తతు కుమారుడు, మత్తతు లేవీ కుమారుడు, ³⁰లేవీ సుమెయోను కుమారుడు, సుమెయోను యూదా కుమారుడు, యూదా యోసేపు కుమారుడు, యోసేపు యోనాము కుమారుడు, యోనాము ఎల్యాకీము కుమారుడు, ³¹ఎల్యాకీము మెల్యా కుమారుడు, మెల్యా మెన్నా కుమారుడు, మెన్నా మత్తతా కుమారుడు, మత్తతా నాతాను కుమారుడు, నాతాను దావీదు కుమారుడు, ³²దావీదు యెష్షయి కుమారుడు, యెష్షయి ఓబేదు కుమారుడు, ఓబేదు బోయజు కుమారుడు, బోయజు శల్మోను కుమారుడు, శల్మోను నయస్సోను కుమారుడు, ³³నయస్సోను అమ్మీనాదాబు కుమారుడు, అమ్మీనాదాబు అద్మీను కుమారుడు, అద్మీను అర్నీ కుమారుడు, అర్నీ హెస్రోను కుమారుడు, హెస్రోను పెరెసు కుమారుడు, పెరెసు యూదా కుమారుడు, ³⁴యూదా యాకోబు కుమారుడు, యాకోబు ఇస్సాకు కుమారుడు, ఇస్సాకు అబ్రాహాము కుమారుడు, అబ్రాహాము తెరహు కుమారుడు, తెరహు నాహోరు కుమారుడు, ³⁵నాహోరు సెరూగు కుమారుడు, సెరూగు రయూ కుమారుడు, రయూ పెలెగు కుమారుడు, పెలెగు ఏబెరు కుమారుడు, ఏబెరు షేలహు కుమారుడు, ³⁶షేలహు కేయినాను కుమారుడు, కేయినాను అర్పక్షదు కుమారుడు, అర్పక్షదు షేము కుమారుడు, షేము నోవహు కుమారుడు, నోవహు లెమెకు కుమారుడు, ³⁷లెమెకు మెతూషెలహు కుమారుడు, మెతూషెలహు హనోకు కుమారుడు, హనోకు యారెదు కుమారుడు, యారెదు మహలలేలు కుమారుడు, మహలలేలు కేయినాను కుమారుడు, ³⁸కేయినాను ఎనోషు కుమారుడు, ఎనోషు షేతు కుమారుడు, షేతు ఆదాము కుమారుడు, ఆదాము మన తండ్రి కుమారుడు.