لوقا 3

3 ¹طبریُس قیصر کی حکومت کے پندرھویں سال میں، جب پنطیُس پیلاطُس یہودیہ کا حاکم تھا، ہیرودیس گلیل کا حاکمِ رُبع تھا، اُس کا بھائی فِلپُّس اِتوریہ اور ترخونیتِس کے علاقے کا، اور لُسانیاس ابِلینے کا، ²حنّاہ اور کائفا کے سردار کاہنوں کے زمانے میں، ہمارے باپ کا کلام بیابان میں زکریاہ کے بیٹے یوحنّا پر نازل ہوا۔ ³اور وہ یردن کے تمام گِردونواح میں گیا اور گناہوں کی معافی کے لیے توبہ کے بپتسمہ کی منادی کرتا رہا، ⁴چنانچہ یسعیاہ نبی کے کلام کی کتاب میں لکھا ہے: ”بیابان میں ایک پکارنے والے کی آواز: خُداوند کی راہ تیار کرو، اُس کے راستے سیدھے بناؤ۔ ⁵ہر ایک وادی بھر دی جائے گی، اور ہر ایک پہاڑ اور ٹیلا پست کیا جائے گا۔ ٹیڑھی راہیں سیدھی ہو جائیں گی، اور ناہموار راستے ہموار، ⁶اور ہر بشر ہمارے باپ کی نجات دیکھے گا۔“

⁷پھر یوحنّا نے اُن بھیڑوں سے جو اُس سے بپتسمہ لینے آتی تھیں کہا: ”اے سانپ کے بچّو! تمہیں کس نے آگاہ کیا کہ آنے والے غضب سے بھاگو؟ ⁸پس توبہ کے لائق پھل لاؤ۔ اور اپنے دلوں میں یہ کہنا شروع نہ کرو کہ ’ابرہام ہمارا باپ ہے۔‘ کیونکہ میں تم سے کہتا ہوں کہ ہمارا باپ اِن پتھروں سے ابرہام کے لیے اولاد پیدا کر سکتا ہے۔ ⁹اب تو درختوں کی جڑ پر کلہاڑا رکھا ہوا ہے؛ پس جو درخت اچھا پھل نہیں لاتا وہ کاٹا اور آگ میں ڈالا جاتا ہے۔“

¹⁰اور لوگوں نے اُس سے پوچھا: ”تو ہم کیا کریں؟“

¹¹اُس نے جواب میں اُن سے کہا: ”جس کے پاس دو کُرتے ہوں وہ اُس کو دے جس کے پاس نہیں؛ اور جس کے پاس کھانا ہو وہ بھی ایسا ہی کرے۔“

¹²محصول لینے والے بھی بپتسمہ لینے آئے اور اُس سے کہا: ”اے اُستاد، ہم کیا کریں؟“

¹³اُس نے اُن سے کہا: ”جتنا تمہارے لیے مقرر ہے اُس سے زیادہ نہ لینا۔“

¹⁴سپاہیوں نے بھی اُس سے پوچھا: ”اور ہم؟ ہم کیا کریں؟“ اُس نے اُن سے کہا: ”کسی پر زبردستی یا جھوٹے اِلزام سے ظلم نہ کرنا؛ اپنی تنخواہ پر قناعت کرنا۔“

¹⁵لوگ منتظر تھے اور سب اپنے دلوں میں یوحنّا کے بارے میں سوچ رہے تھے کہ کہیں یہی مسیح تو نہیں۔ ¹⁶یوحنّا نے اُن سب کو جواب دیا: ”میں تو تمہیں پانی سے بپتسمہ دیتا ہوں۔ لیکن ایک مجھ سے زورآور آنے والا ہے، میں اِس لائق نہیں کہ اُس کی جُوتی کا تسمہ کھولوں۔ وہ تمہیں رُوحُ القُدس اور آگ سے بپتسمہ دے گا۔ ¹⁷اُس کا چھاج اُس کے ہاتھ میں ہے، وہ اپنے کھلیان کو خوب صاف کرے گا اور گندم کو اپنے کھتّے میں جمع کرے گا، مگر بھوسے کو اُس آگ میں جلائے گا جو بجھتی نہیں۔“

¹⁸اور یوحنّا بہت سی اور نصیحتوں کے ساتھ لوگوں کو خوشخبری سناتا رہا۔ ¹⁹لیکن یوحنّا نے ہیرودیس حاکمِ رُبع کو اُس کے بھائی کی بیوی ہیرودیاس کے بارے میں اور اُن تمام بُرائیوں کے بارے میں جو ہیرودیس نے کی تھیں، ملامت کی، ²⁰تو ہیرودیس نے اِن سب کے علاوہ یہ بھی کیا کہ یوحنّا کو قید خانے میں بند کر دیا۔

باپ اپنے بیٹے کو پیارا کہتا ہے

²¹جب سب لوگ بپتسمہ لے چکے تو یسوع نے بھی بپتسمہ لیا۔ اور جب وہ دعا کر رہا تھا تو آسمان کھل گیا،

²²اور رُوحُ القُدس جسمانی صورت میں کبوتر کی مانند اُس پر اُترا۔ اور آسمان سے ایک آواز آئی: ”تُو میرا پیارا بیٹا ہے؛ تجھ سے میں خوش ہوں۔“

²³اور یسوع جب اپنی خدمت شروع کرنے لگا تو قریباً تیس برس کا تھا، اور (جیسا کہ سمجھا جاتا تھا) یوسف کا بیٹا تھا، جو ہیلی کا، ²⁴جو مَتّات کا، جو لاوی کا، جو ملکی کا، جو ینّا کا، جو یوسف کا، ²⁵جو متّتیاہ کا، جو عاموس کا، جو ناحوم کا، جو اسلی کا، جو نجی کا، ²⁶جو ماۃ کا، جو متّتیاہ کا، جو سمعی کا، جو یوسیک کا، جو یوداہ کا، ²⁷جو یوحنّان کا، جو ریسا کا، جو زرُبّابل کا، جو سالتی ایل کا، جو نیری کا، ²⁸جو ملکی کا، جو ادّی کا، جو قوسام کا، جو المودام کا، جو عیر کا، ²⁹جو یشوع کا، جو الِیعزر کا، جو یوریم کا، جو مَتّات کا، جو لاوی کا، ³⁰جو شمعون کا، جو یہوداہ کا، جو یوسف کا، جو یونام کا، جو الیاقیم کا، ³¹جو ملیا کا، جو مِنّاہ کا، جو متّاتاہ کا، جو ناتن کا، جو داؤد کا، ³²جو یسّی کا، جو عوبید کا، جو بوعز کا، جو سلمون کا، جو نحسون کا، ³³جو عمّینداب کا، جو ادمین کا، جو ارنی کا، جو حصرون کا، جو فارص کا، جو یہوداہ کا، ³⁴جو یعقوب کا، جو اِضحاق کا، جو ابرہام کا، جو تارح کا، جو نحور کا، ³⁵جو سروج کا، جو رعو کا، جو فلج کا، جو عابر کا، جو صلح کا، ³⁶جو قینان کا، جو ارفکسد کا، جو سِم کا، جو نوح کا، جو لمک کا، ³⁷جو متوسلح کا، جو حنوک کا، جو یارد کا، جو مہلل ایل کا، جو قینان کا، ³⁸جو انوس کا، جو سیت کا، جو آدم کا، جو ہمارے باپ کا۔