Ruka 3 FHB Father's Heart Bible™

3 ¹Mugore regumi namashanu rokutonga kwaTibheriyo Kaisari, Pondiyo Pirato ari mubati weJudhea, Herodhi ari mubati wedunhu reGarirea, Firipi mununʼuna wake ari mubati wedunhu reIturea neTirakonitisi, uye Risaniyasi ari mubati weAbhirene, ²panguva yavaprista vakuru Anasi naKayafasi, shoko raBaba vedu rakasvika kuna Johani mwanakomana waZekariya murenje. ³Akapinda mudunhu rose reJodhani, achiparidza rubhabhatidzo rwokutendeuka rwokuregererwa kwezvivi, ⁴sezvazvakanyorwa mubhuku ramashoko aIsaya muprofita achiti: “Inzwi romunhu anodanidzira murenje richiti: Gadziridzai nzira yaShe, ruramisai migwagwa yake. ⁵Mipata yose ichazadzwa, uye makomo ose nezvikomo zvichaderedzwa. Nzira dzakakombama dzicharuramiswa, uye nzira dzisina kuenzana dzichaenzaniswa, ⁶uye nyama yose ichaona ruponeso rwaBaba vedu.”

⁷Ipapo Johani akati kumapoka avanhu akanga achiuya kuzobhabhatidzwa naye, “Imi vana venyoka! Ndiani akakuyambirai kuti mutize hasha dzichauya? ⁸Naizvozvo berekai zvibereko zvakafanira kutendeuka. Musatanga kuzviudza muchiti, ‘Tina Abhurahama sababa vedu.’ Nokuti ndinokuudzai kuti Baba vedu vanogona kumutsira Abhurahama vana kubva pamatombo aya. ⁹Demo ratoiswa pamidzi yemiti; muti woga woga usingabereki zvibereko zvakanaka unotemwa ugokandwa mumoto.”

¹⁰Mapoka avanhu akamubvunza achiti, “Zvino toita sei?”

¹¹Akapindura akati, “Ane nguo mbiri ngaagovane neasina; ane zvokudya ngaaite saizvozvo.”

¹²Vateresi vakauyawo kuzobhabhatidzwa, vakati kwaari, “Mudzidzisi, toita sei?”

¹³Akati kwavari, “Musatora kupfuura zvamakatemerwa.”

¹⁴Varwi vakamubvunzawo vachiti, “Ko isu—toita sei?” Akati kwavari, “Musatorera munhu chinhu nechisimba kana nokupomera nhema; gutsikanai nemibhadharo yenyu.”

¹⁵Vanhu vakanga vakamirira netariro, vose vachizvibvunza mumwoyo yavo kuti zvimwe Johani pachake ndiye Kristu. ¹⁶Johani akavapindura vose achiti, “Ini ndinokubhabhatidzai nemvura. Asi uya ane simba kupfuura ini ari kuuya—handikodzeri kusunungura rukanda rweshangu dzake. Iye achakubhabhatidzai noMweya Mutsvene nomoto. ¹⁷Forogo yokuurutsa iri muruoko rwake, achachenesa buriro rake, agounganidza gorosi mudura rake, asi achapisa hundi nomoto usingadzimwi.”

¹⁸Uye namamwe mashoko mazhinji okukurudzira, Johani akaparidza mashoko akanaka kuvanhu. ¹⁹Asi Johani akatsiura Herodhi mubati wedunhu pamusoro paHerodhiasi, mukadzi womununʼuna wake, uye pamusoro pezvakaipa zvose zvakanga zvaitwa naHerodhi, ²⁰Herodhi akawedzera ichi pane zvose zvakasara: akavharira Johani mutorongo.

Baba Vanodana Mwanakomana Wavo Kuti Mudiwa

²¹Vanhu vose pavakanga vabhabhatidzwa, Jesu akabhabhatidzwawo. Paakanga achinyengetera, denga rakazaruka,

²²uye Mweya Mutsvene wakaburuka pamusoro pake muchimiro chomuviri senjiva. Uye inzwi rakabva kudenga richiti, “Ndiwe Mwanakomana wangu anodiwa; ndinofadzwa newe.”

²³Jesu akanga ava namakore anenge makumi matatu paakatanga ushumiri hwake, ari mwanakomana—sezvaifungidzirwa—waJosefa, mwanakomana waHeri, ²⁴mwanakomana waMatati, mwanakomana waRevhi, mwanakomana waMerki, mwanakomana waJanai, mwanakomana waJosefa, ²⁵mwanakomana waMatatiasi, mwanakomana waAmosi, mwanakomana waNahume, mwanakomana waEsiri, mwanakomana waNagai, ²⁶mwanakomana waMaati, mwanakomana waMatatiasi, mwanakomana waSemeini, mwanakomana waJoseki, mwanakomana waJodha, ²⁷mwanakomana waJoanani, mwanakomana waResa, mwanakomana waZerubhabheri, mwanakomana waShearitieri, mwanakomana waNeri, ²⁸mwanakomana waMerki, mwanakomana waAdhi, mwanakomana waKosamu, mwanakomana waErimadhamu, mwanakomana waEri, ²⁹mwanakomana waJoshua, mwanakomana waEriezeri, mwanakomana waJorimu, mwanakomana waMatati, mwanakomana waRevhi, ³⁰mwanakomana waSimeoni, mwanakomana waJudha, mwanakomana waJosefa, mwanakomana waJonamu, mwanakomana waEriakimu, ³¹mwanakomana waMerea, mwanakomana waMena, mwanakomana waMatata, mwanakomana waNatani, mwanakomana waDhavhidhi, ³²mwanakomana waJese, mwanakomana waObhedhi, mwanakomana waBhoazi, mwanakomana waSarimoni, mwanakomana waNashoni, ³³mwanakomana waAminadhabhi, mwanakomana waAdhimini, mwanakomana waArini, mwanakomana waHezironi, mwanakomana waPerezi, mwanakomana waJudha, ³⁴mwanakomana waJakobho, mwanakomana waIsaka, mwanakomana waAbhurahama, mwanakomana waTera, mwanakomana waNahori, ³⁵mwanakomana waSerugi, mwanakomana waReu, mwanakomana waPeregi, mwanakomana waEbheri, mwanakomana waShera, ³⁶mwanakomana waKainani, mwanakomana waArifakisadhi, mwanakomana waShemu, mwanakomana waNoa, mwanakomana waRameki, ³⁷mwanakomana waMetusera, mwanakomana waEnoki, mwanakomana waJaredhi, mwanakomana waMaharareri, mwanakomana waKainani, ³⁸mwanakomana waEnoshi, mwanakomana waSeti, mwanakomana waAdhamu, mwanakomana waBaba vedu.