Nna Anyị Na-ezite Olu Ya

Jọn na-ezi ozi nʼọzara, a na-ajụkwa ya ugboro ugboro ihe ndị mmadụ ga-eme nʼezie: kerịta uwe, anaịla ụgwọ karịrị akarị, apụnarịla mmadụ ihe. Ọ kpọrọ mmehie Herọd aha, e tinye ya nʼụlọ mkpọrọ maka ya. E mere Jisọs baptizim nʼetiti mmadụ niile, Nna ya kpọkwa ya Ọkpara ọ hụrụ nʼanya.

Isi 3.

Nʼafọ nke iri na ise nke ọchịchị Taịberiọs Siza, mgbe Pọntiọs Paịlet bụ gọvanọ Judia, Herọd bụ onye na-achị Galili, Filip nwanne ya bụ onye na-achị mpaghara Ituria na Trakonaịtis, Laịsanias bụkwa onye na-achị Abilin, mgbe Anas na Kaịafas bụ ndịisi nchụaja, okwu Nna anyị bịakwutere Jọn nwa Zekaraya nʼọzara. O jegharịrị na mpaghara Jọdan niile, na-ekwusa baptism nke nchegharị maka mgbaghara mmehie, dịka e dere ya nʼakwụkwọ okwu Aịzaya onye amụma: “Olu onye na-eti mkpu nʼọzara: Dozienụ ụzọ maka Onyenwe anyị, meenụ ka okporo ụzọ ya zie ezi. A ga-ekpochi ndagwurugwu niile, a ga-emekwa ka ugwu niile na ugwu nta niile dị ala. Okporo ụzọ ndị gbagọrọ agbagọ ga-aghọ ndị kwụ ọtọ, ebe ndị dị ike dịkwa larịị, mmadụ niile ga-ahụkwa nzọpụta nke Nna anyị.”

Mgbe ahụ Jọn gwara ìgwè mmadụ ndị bịara ka o mee ha baptism sị: “Unu ụmụ ajụala! Ònye dọrọ unu aka na ntị ka unu gbanarị oke iwe ahụ na-abịa? Ya mere, mịanụ mkpụrụ kwesịrị nchegharị. Amalitekwala ịsị nʼime onwe unu, ‘Anyị nwere Ebraham dịka nna anyị.’ Nʼihi na agwa m unu, Nna anyị pụrụ isite na nkume ndị a mepụtara Ebraham ụmụ. Ugbua, e debelarị anyụike na mgbọrọgwụ osisi niile; a na-egbutu osisi ọbụla na-adịghị amị ezi mkpụrụ, tụba ya nʼime ọkụ.”

Ìgwè mmadụ ahụ jụrụ ya sị, “Gịnị kwanụ ka anyị ga-eme?”

Ọ zara sị ha, “Onye ọbụla nwere uwe abụọ, ya kenye onye na-enweghị nke ya; onye nwere nri, ya meekwa otu ihe ahụ.”

Ndị ọna ụtụ bịakwara ka e mee ha baptism, ha sịrị ya, “Onye nkuzi, gịnị ka anyị ga-eme?”

Ọ gwara ha sị, “Unu anarala karịa ihe a chọrọ ka unu na-anara.”

Ndị agha jụkwara ya sị, “Anyị kwọ—gịnị ka anyị ga-eme?” Ọ gwara ha sị, “Unu ejila ike maọbụ ebubo ụgha napụ onye ọbụla ihe; ka afọ jụ unu nʼụgwọ ọrụ unu.”

Ndị mmadụ nọ na-ele anya, ha niile na-eche nʼobi ha ma Jọn nʼonwe ya ọ ga-abụ Kraịst ahụ. Jọn zara ha niile sị, “Eji m mmiri na-eme unu baptism. Ma onye dị ike karịa m na-abịa—erughị m eru ịtọpụ eriri akpụkpọ ụkwụ ya. Ọ ga-eji Mmụọ Nsọ na ọkụ mee unu baptism. Ngwa ịfụcha ọka dị ya nʼaka, ọ ga-ehicha ebe ịzọcha ọka ya, chịkọta ọka wiiti nʼime ọba ya, ma jiri ọkụ a na-apụghị imenyụ emenyụ rechapụ igbugbo ọka ahụ.”

Jọn jikwa ọtụtụ okwu agbamume ndị ọzọ kwusaara ndị mmadụ oziọma ahụ. Ma Jọn baara Herọd onye na-achị achị mba banyere Herọdias, nwunye nwanne ya, na banyere ihe ọjọọ niile Herọd mere, Herọd tụkwasịrị nke a nʼelu ihe ndị ọzọ niile: o tụbara Jọn nʼụlọ mkpọrọ.

Nna Anyị Kpọrọ Ọkpara Ya Onye Ọ Hụrụ nʼAnya

Mgbe e mechara ndị mmadụ niile baptism, e mekwara Jisọs baptism. Ka ọ nọ na-ekpe ekpere, eluigwe meghere,

Mmụọ Nsọ wee rịdakwasị ya nʼụdị anụ ahụ dịka nduru. Otu olu sitekwara nʼeluigwe bịa sị, “Ị bụ Ọkpara m, onye m hụrụ nʼanya; ihe banyere gị na-atọ m ụtọ.”

Jisọs gbara ihe dịka afọ iri atọ mgbe ọ malitere ọrụ ya, bụ nwa—dịka e si chee ya—nke Josef, nwa Hilaị, nwa Matat, nwa Livaị, nwa Melki, nwa Janaị, nwa Josef, nwa Matataịas, nwa Emọs, nwa Nehum, nwa Eslaị, nwa Nagaị, nwa Maat, nwa Matataịas, nwa Semeịn, nwa Josek, nwa Joda, nwa Joanan, nwa Resa, nwa Zerubabel, nwa Shealtiel, nwa Neraị, nwa Melki, nwa Adaị, nwa Kosam, nwa Elmadam, nwa Ea, nwa Jọshua, nwa Elieza, nwa Jorim, nwa Matat, nwa Livaị, nwa Simiọn, nwa Juda, nwa Josef, nwa Jonam, nwa Eliakim, nwa Melea, nwa Mena, nwa Matata, nwa Netan, nwa Devid, nwa Jesi, nwa Obed, nwa Boaz, nwa Salmọn, nwa Nashọn, nwa Aminadab, nwa Admin, nwa Anaị, nwa Hezrọn, nwa Perez, nwa Juda, nwa Jekọb, nwa Aịzik, nwa Ebraham, nwa Tera, nwa Nehọ, nwa Serug, nwa Reu, nwa Peleg, nwa Eba, nwa Shela, nwa Kenan, nwa Afaksad, nwa Shem, nwa Noa, nwa Lamek, nwa Metusela, nwa Inọk, nwa Jared, nwa Mahalalel, nwa Kenan, nwa Enọsh, nwa Set, nwa Adam, nwa Nna anyị.