Luka 3 FHB Father's Heart Bible™

3 ¹A shekara ta goma sha biyar ta mulkin Kaisar Tibariyus, sa'ad da Buntus Bilatus yake gwamnan Yahudiya, Hirudus yake sarkin Galili, ɗan'uwansa Filibus kuwa yake sarkin yankin Ituriya da Tirakonitis, Lisaniyas kuma yake sarkin Abilene, ²a lokacin da Annas da Kayafas suke manyan firistoci, sai maganar Ubanmu ta zo wa Yahaya ɗan Zakariya a cikin jeji. ³Ya ratsa dukan yankin Urdun, yana wa'azin baftismar tuba domin gafarar zunubai, ⁴kamar yadda yake a rubuce a littafin maganar annabi Ishaya, “Ga muryar mai kira a cikin jeji, Ku shirya wa Ubangiji hanya, ku miƙe hanyoyinsa. ⁵Za a cike kowane kwari, a kuma kankare kowane dutse da tudu. Karkatattun hanyoyi za su miƙu, hanyoyi masu ɗagwalgwali kuma su zama sumul, ⁶dukan mutane kuma za su ga ceton Ubanmu.”

⁷Sai Yahaya ya ce wa taron da suke zuwa domin yă yi musu baftisma, “Ya ku 'ya'yan macizai! Wa ya gargaɗe ku ku guje wa fushin nan mai zuwa? ⁸Saboda haka ku ba da 'ya'yan da suka dace da tuba. Kada ku fara ce wa kanku, ‘Muna da Ibrahim mahaifinmu.’ Gama ina gaya muku, Ubanmu yana iya tā da 'ya'ya wa Ibrahim daga duwatsun nan. ⁹Ga shi gatari ya riga ya kwanta a gun saiwar itatuwa; duk itacen da bai ba da 'ya'ya masu kyau ba, za a sare shi a jefa cikin wuta.”

¹⁰Sai taron suka tambaye shi, “To, me za mu yi?”

¹¹Ya amsa musu ya ce, “Duk wanda yake da taguwa biyu, sai yă raba wa wanda ba shi da ita; wanda yake da abinci kuma, sai yă yi haka.”

¹²Masu karɓar haraji su ma suka zo domin a yi musu baftisma, suka ce masa, “Malam, me za mu yi?”

¹³“Kada ku karɓa fiye da abin da aka ƙayyade muku,” ya ce musu.

¹⁴Sojoji su ma suka tambaye shi, “Mu fa—me za mu yi?” Ya ce musu, “Kada ku ƙwace wa kowa da ƙarfi ko da zargin ƙarya; ku gamsu da albashinku.”

¹⁵Mutane suna cikin zuzzurfan tsammani, duka suna tunani a zukatansu ko Yahaya kansa shi ne Almasihu. ¹⁶Sai Yahaya ya amsa musu duka ya ce, “Ni dai ina yi muku baftisma da ruwa. Amma wani mai ƙarfi fiye da ni yana zuwa—ban isa in kunce igiyar takalminsa ba. Shi zai yi muku baftisma da Ruhu Mai Tsarki da kuma wuta. ¹⁷Yana riƙe da matankaɗi a hannunsa, zai share masussukarsa, yă tara alkama a cikin rumbunsa, amma yă ƙone yayi da wutar da ba a iya kashewa.”

¹⁸Yahaya ya yi wa mutane wa'azin bishara da waɗansu kalmomi masu yawa na gargaɗi. ¹⁹Amma Yahaya ya tsawata wa Hirudus sarki saboda Hirudiya, matar ɗan'uwansa, da kuma saboda dukan muguntar da Hirudus ya aikata, ²⁰Sai Hirudus ya ƙara wannan a kan dukan sauran: ya tsare Yahaya a kurkuku.

Uba Ya Kira Ɗansa Ƙaunatacce

²¹Sa'ad da aka yi wa dukan mutane baftisma, sai aka yi wa Yesu ma baftisma. Yana cikin addu'a, sai sama ta buɗe,

²²Ruhu Mai Tsarki kuma ya sauko a kansa a siffar jiki kamar kurciya. Sai murya ta zo daga sama ta ce, “Kai ne Ɗana ƙaunataccena; a gare ka nake jin daɗi.”

²³Yesu yana da kimanin shekara talatin sa'ad da ya fara hidimarsa. Shi ɗa ne—kamar yadda ake tsammani—na Yusufu, ɗan Heli, ²⁴ɗan Mattat, ɗan Lawi, ɗan Melki, ɗan Yannai, ɗan Yusufu, ²⁵ɗan Mattatiyas, ɗan Amos, ɗan Nahum, ɗan Esli, ɗan Naggai, ²⁶ɗan Ma'at, ɗan Mattatiyas, ɗan Shimeyi, ɗan Yoshek, ɗan Yoda, ²⁷ɗan Yohanan, ɗan Resa, ɗan Zerubbabel, ɗan Sheyaltiyel, ɗan Neri, ²⁸ɗan Melki, ɗan Addi, ɗan Kosam, ɗan Elmadam, ɗan Er, ²⁹ɗan Yoshuwa, ɗan Eliyezer, ɗan Yorim, ɗan Mattat, ɗan Lawi, ³⁰ɗan Siman, ɗan Yahuda, ɗan Yusufu, ɗan Yonam, ɗan Eliyakim, ³¹ɗan Meleya, ɗan Menna, ɗan Mattata, ɗan Natan, ɗan Dawuda, ³²ɗan Yesse, ɗan Obed, ɗan Bo'az, ɗan Salmon, ɗan Nashon, ³³ɗan Amminadab, ɗan Admin, ɗan Arni, ɗan Hezron, ɗan Feres, ɗan Yahuda, ³⁴ɗan Yakubu, ɗan Ishaku, ɗan Ibrahim, ɗan Tera, ɗan Nahor, ³⁵ɗan Serug, ɗan Reyu, ɗan Feleg, ɗan Eber, ɗan Shela, ³⁶ɗan Kainan, ɗan Arfakshad, ɗan Shem, ɗan Nuhu, ɗan Lamek, ³⁷ɗan Metusela, ɗan Anuhu, ɗan Yared, ɗan Mahalaleyel, ɗan Kainan, ³⁸ɗan Enosh, ɗan Shitu, ɗan Adamu, ɗan Ubanmu.