Lucas 3

3 ¹Nang ikalabinlimang taon ng paghahari ni Tiberio Cesar, nang si Poncio Pilato ay gobernador ng Judea, si Herodes ay tetrarka ng Galilea, ang kapatid niyang si Felipe ng lupain ng Iturea at Traconite, at si Lisanias ng Abilene, ²sa panahon ng mga punong saserdoteng sina Anas at Caifas, dumating ang salita ng ating Ama kay Juan na anak ni Zacarias sa ilang. ³Nilibot niya ang buong lupain sa palibot ng Jordan, na ipinapangaral ang isang bautismo ng pagsisisi para sa kapatawaran ng mga kasalanan, ⁴tulad ng nasusulat sa aklat ng mga salita ni propeta Isaias: “Isang tinig ng sumisigaw sa ilang: Ihanda ninyo ang daan ng Panginoon, tuwirin ninyo ang kanyang mga landas. ⁵Ang bawat libis ay pupunuin, at ang bawat bundok at burol ay papatagin. Ang mga daang liku-liko ay magiging matuwid, at ang mga daang baku-bako ay magiging patag, ⁶at makikita ng lahat ng laman ang kaligtasang mula sa ating Ama.”

⁷Kaya't sinabi ni Juan sa mga taong lumalapit upang magpabautismo sa kanya: “Kayong lahi ng mga ahas! Sino ang nagbabala sa inyo upang tumakas sa darating na poot? ⁸Kaya't mamunga kayo ng karapat-dapat sa pagsisisi. Huwag ninyong simulang sabihin sa inyong sarili, ‘Si Abraham ang aming ama.’ Sapagkat sinasabi ko sa inyo, kaya ng ating Ama na magpalitaw ng mga anak para kay Abraham mula sa mga batong ito. ⁹Nakalapat na ang palakol sa ugat ng mga puno; ang bawat punong hindi namumunga ng mabuting bunga ay pinuputol at inihahagis sa apoy.”

¹⁰At tinanong siya ng mga tao, “Ano ngayon ang dapat naming gawin?”

¹¹Sumagot siya, “Ang sinumang may dalawang damit ay magbahagi sa wala; ang sinumang may pagkain ay gayundin ang gawin.”

¹²Dumating din ang mga maniningil ng buwis upang magpabautismo, at sinabi nila sa kanya, “Guro, ano ang dapat naming gawin?”

¹³“Huwag kayong maningil nang higit sa itinakdang dapat singilin,” sabi niya sa kanila.

¹⁴Nagtanong din ang mga kawal sa kanya, “At kami—ano ang dapat naming gawin?” Sinabi niya sa kanila, “Huwag kayong mangikil kaninuman sa pamamagitan ng dahas o maling paratang; masiyahan kayo sa inyong sahod.”

¹⁵Ang mga tao ay naghihintay, at nag-iisip-isip sa kanilang mga puso kung si Juan mismo kaya ang Cristo. ¹⁶Sumagot si Juan sa kanilang lahat, “Binabautismuhan ko kayo sa tubig. Ngunit may darating na mas makapangyarihan kaysa sa akin—hindi ako karapat-dapat na magkalag ng panali ng kanyang sandalyas. Babautismuhan niya kayo sa Espiritu Santo at apoy. ¹⁷Hawak ang kalaykay na pantahip, lilinisin niya ang kanyang giikan, titipunin ang trigo sa kanyang kamalig, ngunit susunugin ang ipa sa apoy na hindi mapapatay.”

¹⁸At sa pamamagitan ng maraming iba pang salita ng panghihikayat, ipinahayag ni Juan ang mabuting balita sa mga tao. ¹⁹Ngunit hinarap ni Juan si Herodes na tetrarka tungkol kay Herodias, na asawa ng kanyang kapatid, at tungkol sa lahat ng kasamaang ginawa ni Herodes, ²⁰Idinagdag pa ito ni Herodes sa lahat ng iba pa: ipinabilanggo niya si Juan.

Tinawag ng Ama na Minamahal ang Kanyang Anak

²¹Nang mabautismuhan ang lahat ng tao, si Jesus ay nabautismuhan din. Habang siya ay nananalangin, nabuksan ang langit,

²²at bumaba sa kanya ang Espiritu Santo sa anyong pisikal na tulad ng isang kalapati. At may tinig na nagmula sa langit: “Ikaw ang aking minamahal na Anak; sa iyo ako nalulugod.”

²³Si Jesus ay mga tatlumpung taong gulang nang simulan niya ang kanyang ministeryo, ang anak—ayon sa akala—ni Jose, na anak ni Heli, ²⁴na anak ni Matat, na anak ni Levi, na anak ni Melqui, na anak ni Janai, na anak ni Jose, ²⁵na anak ni Matatias, na anak ni Amos, na anak ni Nahum, na anak ni Esli, na anak ni Nagai, ²⁶na anak ni Maat, na anak ni Matatias, na anak ni Semei, na anak ni Josec, na anak ni Joda, ²⁷na anak ni Joanan, na anak ni Resa, na anak ni Zorobabel, na anak ni Salatiel, na anak ni Neri, ²⁸na anak ni Melqui, na anak ni Adi, na anak ni Cosam, na anak ni Elmadam, na anak ni Er, ²⁹na anak ni Josue, na anak ni Eliezer, na anak ni Jorim, na anak ni Matat, na anak ni Levi, ³⁰na anak ni Simeon, na anak ni Juda, na anak ni Jose, na anak ni Jonam, na anak ni Eliakim, ³¹na anak ni Melea, na anak ni Mena, na anak ni Matata, na anak ni Natan, na anak ni David, ³²na anak ni Jesse, na anak ni Obed, na anak ni Booz, na anak ni Salmon, na anak ni Naason, ³³na anak ni Aminadab, na anak ni Admin, na anak ni Arni, na anak ni Hezron, na anak ni Fares, na anak ni Juda, ³⁴na anak ni Jacob, na anak ni Isaac, na anak ni Abraham, na anak ni Tera, na anak ni Nacor, ³⁵na anak ni Serug, na anak ni Reu, na anak ni Peleg, na anak ni Heber, na anak ni Sela, ³⁶na anak ni Cainan, na anak ni Arfaxad, na anak ni Sem, na anak ni Noe, na anak ni Lamec, ³⁷na anak ni Matusalem, na anak ni Enoc, na anak ni Jared, na anak ni Mahalalel, na anak ni Cainan, ³⁸na anak ni Enos, na anak ni Set, na anak ni Adan, na anak ng ating Ama.