லூக்கா 3

3 ¹திபேரியு காயிசர் அரசாண்ட பதினைந்தாம் வருஷத்திலே, பொந்தியு பிலாத்து யூதேயாவுக்குத் தேசாதிபதியாயும், ஏரோது கலிலேயாவுக்குக் காற்பங்கு அதிபதியாயும், அவனுடைய சகோதரனாகிய பிலிப்பு இத்துரேயா திராகோனீத்து நாட்டுக்குக் காற்பங்கு அதிபதியாயும், லிசானியா அபிலேனேக்குக் காற்பங்கு அதிபதியாயும் இருந்தபோது, ²அன்னாவும் காய்பாவும் பிரதான ஆசாரியர்களாயிருந்த காலத்தில், வனாந்தரத்திலே சகரியாவின் குமாரனாகிய யோவானுக்கு எங்கள் பிதாவின் வார்த்தை உண்டாயிற்று. ³அப்பொழுது அவன் யோர்தான் நதிக்கு அடுத்த நாடெங்கும் போய், பாவமன்னிப்புக்கென்று மனந்திரும்புதலின் ஞானஸ்நானத்தைப் பிரசங்கித்தான். ⁴தீர்க்கதரிசியாகிய ஏசாயாவின் வசனங்களின் புத்தகத்தில் எழுதியிருக்கிறபடியே: “வனாந்தரத்திலே கூப்பிடுகிறவனுடைய சத்தமாவது: கர்த்தருக்கு வழியை ஆயத்தப்படுத்துங்கள், அவருடைய பாதைகளைச் செவ்வைப்படுத்துங்கள். ⁵பள்ளத்தாக்குகளெல்லாம் நிரப்பப்படும், மலைகளும் குன்றுகளுமெல்லாம் தாழ்த்தப்படும். கோணலானவைகள் செவ்வையாகும், கரடுமுரடானவைகள் சமமான வழிகளாகும், ⁶மாம்சமான யாவரும் எங்கள் பிதாவின் இரட்சிப்பைக் காண்பார்கள்.”

⁷அப்பொழுது அவனிடத்தில் ஞானஸ்நானம் பெறும்படி வந்த திரளான ஜனங்களை நோக்கி அவன்: “விரியன் பாம்புக் குட்டிகளே! வரப்போகிற கோபாக்கினைக்குத் தப்பித்துக்கொள்ள உங்களுக்கு எச்சரிப்பு அளித்தவன் யார்? ⁸ஆகையால் மனந்திரும்புதலுக்கு ஏற்ற கனிகளைக் கொடுங்கள். ‘ஆபிரகாம் எங்களுக்குத் தகப்பன்’ என்று உங்களுக்குள்ளே சொல்லிக்கொள்ளத் தொடங்காதேயுங்கள். எங்கள் பிதா இந்தக் கல்லுகளினாலே ஆபிரகாமுக்குப் பிள்ளைகளை எழும்பப்பண்ண வல்லவராயிருக்கிறாரென்று உங்களுக்குச் சொல்லுகிறேன். ⁹இப்பொழுதே கோடரியானது மரங்களின் வேரிலே வைக்கப்பட்டிருக்கிறது; ஆகையால் நல்ல கனிகொடாத மரமெல்லாம் வெட்டப்பட்டு அக்கினியிலே போடப்படும்.”

¹⁰அப்பொழுது ஜனங்கள் அவனை நோக்கி, “அப்படியானால் நாங்கள் என்ன செய்யவேண்டும்?” என்று கேட்டார்கள்.

¹¹அவன் அவர்களுக்குப் பிரதியுத்தரமாக: “இரண்டு அங்கிகளையுடையவன் இல்லாதவனுக்குக் கொடுக்கக்கடவன்; ஆகாரமுடையவனும் அப்படியே செய்யக்கடவன்” என்றான்.

¹²ஆயக்காரரும் ஞானஸ்நானம் பெறுவதற்காக வந்து, அவனை நோக்கி, “போதகரே, நாங்கள் என்ன செய்யவேண்டும்?” என்று கேட்டார்கள்.

¹³அதற்கு அவன்: “உங்களுக்குக் கட்டளையிடப்பட்டதைவிட அதிகமாய் ஒன்றும் வாங்காதிருங்கள்” என்றான்.

¹⁴போர்ச்சேவகரும் அவனை நோக்கி, “நாங்கள் என்ன செய்யவேண்டும்?” என்று கேட்டார்கள். அதற்கு அவன்: “நீங்கள் பலவந்தமாயாவது பொய்யாய்க் குற்றஞ்சாட்டியாவது ஒருவரிடத்திலும் பறித்துக்கொள்ளாமல், உங்கள் சம்பளமே போதுமென்றிருங்கள்” என்றான்.

¹⁵ஜனங்கள் காத்திருந்து, யோவானே கிறிஸ்துவாயிருப்பானோ என்று எல்லாரும் தங்கள் இருதயங்களில் சிந்தித்துக்கொண்டிருந்தார்கள். ¹⁶யோவான் எல்லாருக்கும் பிரதியுத்தரமாக: “நான் தண்ணீரினால் உங்களுக்கு ஞானஸ்நானங் கொடுக்கிறேன்; என்னிலும் வல்லவர் ஒருவர் வருகிறார், அவருடைய பாதரட்சையின் வாரை அவிழ்க்கிறதற்கும் நான் பாத்திரன் அல்ல; அவர் பரிசுத்த ஆவியினாலும் அக்கினியினாலும் உங்களுக்கு ஞானஸ்நானங் கொடுப்பார். ¹⁷தூற்றுமுறம் அவருடைய கையில் இருக்கிறது; அவர் தமது களத்தை நன்றாய் விளக்கி, கோதுமையைத் தமது களஞ்சியத்தில் சேர்ப்பார்; பதரையோ அவியாத அக்கினியினால் சுட்டெரிப்பார்” என்றான்.

¹⁸வேறே அநேக புத்திமதிகளையும் சொல்லி, யோவான் ஜனங்களுக்குச் சுவிசேஷத்தைப் பிரசங்கித்தான். ¹⁹காற்பங்கு அதிபதியாகிய ஏரோதுவோ, தன் சகோதரனுடைய மனைவியாகிய ஏரோதியாள் நிமித்தமாகவும், தான் செய்த மற்றெல்லாத் தீமைகள் நிமித்தமாகவும், யோவானால் கடிந்துகொள்ளப்பட்டபோது, ²⁰மற்றெல்லாவற்றோடும் இதையும் கூட்டி, யோவானைக் காவல்கூடத்தில் அடைத்துவைத்தான்.

பிதாவானவர் தமது குமாரனை நேசகுமாரன் என்று அழைக்கிறார்

²¹ஜனங்களெல்லாரும் ஞானஸ்நானம் பெற்றபோது, இயேசுவும் ஞானஸ்நானம் பெற்று, ஜெபம்பண்ணுகையில், வானம் திறக்கப்பட்டது;

²²பரிசுத்த ஆவியானவர் புறாவைப்போலச் சரீரரூபமாய் அவர்மேல் இறங்கினார். அன்றியும், “நீர் என்னுடைய நேசகுமாரன், உம்மில் பிரியமாயிருக்கிறேன்” என்று வானத்திலிருந்து ஒரு சத்தம் உண்டாயிற்று.

²³இயேசு தமது ஊழியத்தைத் தொடங்கினபோது ஏறக்குறைய முப்பது வயதுள்ளவராயிருந்தார்; அவர் ஜனங்களால் நினைக்கப்பட்டபடி யோசேப்பின் குமாரன்; யோசேப்பு ஏலியின் குமாரன், ²⁴மாத்தாத்தின் குமாரன், லேவியின் குமாரன், மெல்கியின் குமாரன், யன்னாவின் குமாரன், யோசேப்பின் குமாரன், ²⁵மத்தத்தியாவின் குமாரன், ஆமோசின் குமாரன், நாகூமின் குமாரன், எஸ்லியின் குமாரன், நங்காயின் குமாரன், ²⁶மகாத்தின் குமாரன், மத்தத்தியாவின் குமாரன், சேமேயின் குமாரன், யோசேக்கின் குமாரன், யோதாவின் குமாரன், ²⁷யோவனானின் குமாரன், ரேசாவின் குமாரன், செருபாபேலின் குமாரன், சலாத்தியேலின் குமாரன், நேரியின் குமாரன், ²⁸மெல்கியின் குமாரன், அத்தியின் குமாரன், கோசாமின் குமாரன், எல்மோதாமின் குமாரன், ஏரின் குமாரன், ²⁹யோசுவாவின் குமாரன், எலியேசரின் குமாரன், யோரீமின் குமாரன், மாத்தாத்தின் குமாரன், லேவியின் குமாரன், ³⁰சிமியோனின் குமாரன், யூதாவின் குமாரன், யோசேப்பின் குமாரன், யோனானின் குமாரன், எலியாக்கீமின் குமாரன், ³¹மெலெயாவின் குமாரன், மென்னாவின் குமாரன், மத்தாத்தாவின் குமாரன், நாத்தானின் குமாரன், தாவீதின் குமாரன், ³²ஈசாயின் குமாரன், ஓபேதின் குமாரன், போவாசின் குமாரன், சல்மோனின் குமாரன், நகசோனின் குமாரன், ³³அம்மினதாபின் குமாரன், அத்மினின் குமாரன், அர்னியின் குமாரன், எஸ்ரோனின் குமாரன், பாரேசின் குமாரன், யூதாவின் குமாரன், ³⁴யாக்கோபின் குமாரன், ஈசாக்கின் குமாரன், ஆபிரகாமின் குமாரன், தேராகின் குமாரன், நாகோரின் குமாரன், ³⁵செரூக்கின் குமாரன், ரெகூவின் குமாரன், பேலேக்கின் குமாரன், ஏபேரின் குமாரன், சாலாவின் குமாரன், ³⁶காயினானின் குமாரன், அர்பகசாத்தின் குமாரன், சேமின் குமாரன், நோவாவின் குமாரன், லாமேக்கின் குமாரன், ³⁷மெத்தூசலாவின் குமாரன், ஏனோக்கின் குமாரன், யாரேதின் குமாரன், மகலலெயேலின் குமாரன், காயினானின் குமாரன், ³⁸ஏனோசின் குமாரன், சேத்தின் குமாரன், ஆதாமின் குமாரன், எங்கள் பிதாவின் குமாரன்.