Luku 3

3 ¹Ní ọdún kẹ́ẹdógún ìjọba Tiberiu Kesari, nígbà tí Pọntiu Pilatu jẹ́ gómìnà Judea, tí Herodu jẹ́ ọba àgbègbè Galili, tí Filipi arákùnrin rẹ̀ jẹ́ ọba àgbègbè Ituraea àti Trakoniti, tí Lisania sì jẹ́ ọba àgbègbè Abilene, ²lásìkò tí Annasi àti Kaiafa jẹ́ àwọn olórí àlùfáà, ọ̀rọ̀ Baba wa wá sọ́dọ̀ Johanu ọmọ Sakariah ní aginjù. ³Ó sì la gbogbo agbègbè Jordani kọjá, ó ń wàásù ìtẹ̀bọmi ìrònúpìwàdà fún ìdáríjì ẹ̀ṣẹ̀, ⁴gẹ́gẹ́ bí a ti kọ ọ́ nínú ìwé ọ̀rọ̀ Isaiah wòlíì pé: “Ohùn ẹni tí ń kígbe ní aginjù pé: Ẹ tún ọ̀nà Olúwa ṣe, ẹ mú ipa ọ̀nà rẹ̀ tọ́. ⁵Gbogbo àfonífojì ni a ó kún, gbogbo òkè ńlá àti òkè kékeré ni a ó rẹ̀ sílẹ̀. Àwọn ọ̀nà wíwọ́ yóò di títọ́, àwọn ọ̀nà kọnkọ̀sọ̀ yóò sì di dídán, ⁶gbogbo ẹ̀dá yóò sì rí ìgbàlà Baba wa.”

⁷Nígbà náà, Johanu wí fún ọ̀pọ̀ ènìyàn tí ń wá fún ìtẹ̀bọmi lọ́dọ̀ rẹ̀ pé: “Ẹ̀yin ọmọ paramọ́lẹ̀! Ta ni ó kìlọ̀ fún yín láti sá fún ìbínú tí ń bọ̀? ⁸Nítorí náà ẹ so èso tí ó yẹ ìrònúpìwàdà. Ẹ má ṣe bẹ̀rẹ̀ sí í wí fún ara yín pé, ‘Abrahamu ni baba wa.’ Nítorí mo wí fún yín pé, Baba wa lè gbé àwọn ọmọ dìde fún Abrahamu láti inú àwọn òkúta wọ̀nyí. ⁹Nísinsìnyí àáké ti wà ní ìdí àwọn igi; gbogbo igi tí kò bá so èso rere ni a ó gé lulẹ̀, a ó sì sọ ọ́ sínú iná.”

¹⁰Àwọn ọ̀pọ̀ ènìyàn sì béèrè lọ́wọ́ rẹ̀ pé, “Kí ni kí àwa wá ṣe?”

¹¹Ó dáhùn pé, “Ẹni tí ó bá ní ẹ̀wù méjì, kí ó pín fún ẹni tí kò ní; ẹni tí ó bá sì ní oúnjẹ, kí ó ṣe bákan náà.”

¹²Àwọn agbowó orí pẹ̀lú wá fún ìtẹ̀bọmi, wọ́n sì wí fún un pé, “Olùkọ́, kí ni kí àwa ṣe?”

¹³Ó wí fún wọn pé, “Ẹ má gba ju èyí tí a yàn fún yín lọ.”

¹⁴Àwọn ọmọ ogun pẹ̀lú béèrè lọ́wọ́ rẹ̀ pé, “Àwa ńkọ́—kí ni kí àwa ṣe?” Ó wí fún wọn pé, “Ẹ má fi agbára tàbí ẹ̀sùn èké gba owó lọ́wọ́ ẹnikẹ́ni; ẹ jẹ́ kí ọ̀yà yín tẹ́ yín lọ́rùn.”

¹⁵Àwọn ènìyàn sì ń retí, gbogbo wọn ń ṣe kàyéfì nínú ọkàn wọn bóyá Johanu fúnra rẹ̀ ni Kristi. ¹⁶Johanu dáhùn fún gbogbo wọn pé, “Èmi fi omi tẹ̀ yín bọmi. Ṣùgbọ́n ẹni tí ó lágbára jù mí lọ ń bọ̀—èmi kò tó láti tú okùn bàtà rẹ̀. Òun yóò fi Ẹ̀mí Mímọ́ àti iná tẹ̀ yín bọmi. ¹⁷Ọ̀pá ìyànkà rẹ̀ wà ní ọwọ́ rẹ̀, yóò gbá ilẹ̀ ìpakà rẹ̀ mọ́, yóò kó alìkámà jọ sínú àká rẹ̀, ṣùgbọ́n yóò fi iná tí kò lè kú sun ìyàngbò.”

¹⁸Pẹ̀lú ọ̀pọ̀ ọ̀rọ̀ ìyànjú mìíràn, Johanu wàásù ìhìnrere fún àwọn ènìyàn. ¹⁹Ṣùgbọ́n Johanu bá Herodu ọba àgbègbè wí nítorí Herodia, aya arákùnrin rẹ̀, àti nítorí gbogbo ibi tí Herodu ti ṣe, ²⁰Herodu fi èyí kún gbogbo ìyókù: ó há Johanu mọ́ inú ọgbà ẹ̀wọ̀n.

Baba Pe Ọmọ Rẹ̀ Ní Olùfẹ́

²¹Nígbà tí a tẹ gbogbo àwọn ènìyàn bọmi, a tẹ Jesu bọmi pẹ̀lú. Bí ó ti ń gbàdúrà, ọ̀run ṣí sílẹ̀,

²²Ẹ̀mí Mímọ́ sì sọ̀kalẹ̀ sórí rẹ̀ ní àwòrán ara bí àdàbà. Ohùn kan sì ti ọ̀run wá pé: “Ìwọ ni Ọmọ mi olùfẹ́; inú mi dùn sí ọ.”

²³Jesu tó nǹkan bí ọgbọ̀n ọdún nígbà tí ó bẹ̀rẹ̀ iṣẹ́ òjíṣẹ́ rẹ̀, ọmọ—gẹ́gẹ́ bí a ti rò—Josefu, ọmọ Heli, ²⁴ọmọ Mattati, ọmọ Lefi, ọmọ Melki, ọmọ Jannai, ọmọ Josefu, ²⁵ọmọ Mattatia, ọmọ Amosi, ọmọ Nahumu, ọmọ Esli, ọmọ Naggai, ²⁶ọmọ Maati, ọmọ Mattatia, ọmọ Semein, ọmọ Joseki, ọmọ Joda, ²⁷ọmọ Joanani, ọmọ Resa, ọmọ Serubbabeli, ọmọ Ṣealtieli, ọmọ Neri, ²⁸ọmọ Melki, ọmọ Addi, ọmọ Kosamu, ọmọ Elmadamu, ọmọ Eri, ²⁹ọmọ Joṣua, ọmọ Elieseri, ọmọ Jorimu, ọmọ Mattati, ọmọ Lefi, ³⁰ọmọ Simeoni, ọmọ Juda, ọmọ Josefu, ọmọ Jonamu, ọmọ Eliakimu, ³¹ọmọ Melea, ọmọ Menna, ọmọ Mattata, ọmọ Natani, ọmọ Dafidi, ³²ọmọ Jese, ọmọ Obedi, ọmọ Boasi, ọmọ Salmoni, ọmọ Nahṣoni, ³³ọmọ Amminadabu, ọmọ Admini, ọmọ Arni, ọmọ Hesroni, ọmọ Peresi, ọmọ Juda, ³⁴ọmọ Jakọbu, ọmọ Isaaki, ọmọ Abrahamu, ọmọ Tera, ọmọ Nahori, ³⁵ọmọ Serugu, ọmọ Reu, ọmọ Pelegi, ọmọ Eberi, ọmọ Ṣela, ³⁶ọmọ Kainani, ọmọ Arfaksadi, ọmọ Ṣemu, ọmọ Noa, ọmọ Lameki, ³⁷ọmọ Metuṣela, ọmọ Enoku, ọmọ Jaredi, ọmọ Mahalaleli, ọmọ Kainani, ³⁸ọmọ Enoṣi, ọmọ Seti, ọmọ Adamu, ọmọ Baba wa.