Luka 3 FHB Father's Heart Bible™

3 ¹Mwaka-inĩ wa ikũmi na ĩtaano wa wathani wa Kaisari Tiberio, hĩndĩ ĩrĩa Pontio Pilato aarĩ barũthi wa Judea, na Herode aarĩ mũthamaki wa Galili, na mũrũ wa nyina Filipo aarĩ mũthamaki wa rũgongo rwa Iturea na Tarakoniti, na Lusania aarĩ mũthamaki wa Abilene, ²hĩndĩ ĩrĩa Anasi na Kaiafa maarĩ athĩnjĩri Ngai anene, ũhoro wa Ithe witũ ũgĩkinyĩra Johana mũrũ wa Zakaria arĩ werũinĩ. ³Naake agĩthiĩ bũrũriinĩ wothe ũrĩa ũrĩ hakuhĩ na Rũũĩ rwa Jorodani, akĩhunjia ũbatithio wa kũĩrira nĩ ũndũ wa kũrekerwo mehia, ⁴o ta ũrĩa kwandĩkĩtwo ibukuinĩ rĩa ciugo cia Isaia ũrĩa mũnabii: “Mũgambo wa mũndũ ũkũgũthũka werũinĩ: Haarĩriai njĩra ya Mwathani, rũngariai tũcĩra twake. ⁵Mĩkuru yothe nĩĩkaiyũrio, nacio irĩma na tũrĩma tuothe nĩtũkanyiihio. Njĩra iria ciogomete nĩikarũngario, nacio njĩra iria itarĩ njega ituĩke theri, ⁶nao andũ othe nĩmakoona ũhonokio wa Ithe witũ.”

⁷Naake Johana akĩĩra kĩrĩndĩ kĩrĩa gĩokaga nĩguo abatithie atĩrĩ, “Inyuĩ rũciaro rwa nyoka! Nũũ ũmũtaarĩte mũũrĩre mangʼũrĩ marĩa marooka? ⁸Nĩ ũndũ ũcio ciarai maciaro marĩa maagĩrĩire kwĩrira. Mũtikambĩrĩrie kwĩĩra atĩrĩ, ‘Ithuĩ tũrĩ na Iburahĩmu taarĩ ithe witũ.’ Nĩgũkorwo ngũmwĩra atĩ, Ithe witũ no aarahũrĩre Iburahĩmu ciana kuuma mahigainĩ maya. ⁹Na rĩu ithanwa rĩigĩtwo mĩriinĩ ya mĩtĩ; nĩ ũndũ ũcio o mũtĩ ũtaciaraga maciaro mega nĩũgũtemwo ũikio mwakiinĩ.”

¹⁰Nakĩo kĩrĩndĩ gĩkĩmũũria atĩrĩ, “Tũgwĩka atĩa?”

¹¹Naake agĩcookia atĩrĩ, “Mũndũ ũrĩa ũrĩ na nguo igĩrĩ, nĩagaĩre ũrĩa ũtarĩ; nake ũrĩa ũrĩ na irio eeke o ũguo.”

¹²O nao etia mbeeca cia igooti magĩũka nĩguo mabatithio, makĩmũũria atĩrĩ, “Mũrutani, tũgwĩka atĩa?”

¹³Naake akĩmeera atĩrĩ, “Mũtikanetie mbeeca makĩria ya ĩrĩa mwathĩtwo kũnetia.”

¹⁴O nacio thigari ikĩmũũria atĩrĩ, “Na ithuĩ—tũgwĩka atĩa?” Naake akĩmeera atĩrĩ, “Mũtikanatunye mũndũ o na ũrĩkũ indo na hinya kana na maũndũ ma maheeni; iganagwo nĩ mũcaara wanyu.”

¹⁵Nao andũ maarĩ na mwĩhoko, othe magĩĩcũũrania ngoroinĩ ciao kana hihi Johana we mwene nĩ we Kristũ. ¹⁶Naake Johana akĩmacookeria othe atĩrĩ, “Niĩ ndĩmũbatithagia na maaĩ. No nĩ gũgũũka ũrĩa ũrĩ na hinya kũngĩra niĩ—niĩ ndiagĩrĩire o na gũkuohora rũkwa rwa iraatũ ciake. We nĩakamũbatithia na Roho Mũtheru na mwaki. ¹⁷Naake arĩ na kĩhũũrano guokoinĩ gwake, nĩagatheria kĩhuhĩro gĩake, acookanĩrĩrie ngano ikũmbĩinĩ rĩake, no acine mahuti na mwaki ũrĩa ũtangĩhoorio.”

¹⁸Na rĩrĩ, na ciugo ingĩ nyingĩ cia gũtaara, Johana akĩhunjĩria andũ Ũhoro-Mwega. ¹⁹No Johana nĩakaanirie Herode ũrĩa mũthamaki nĩ ũndũ wa Herodia, mũtumia wa mũrũ wa nyina, na nĩ ũndũ wa maũndũ mothe mooru marĩa Herode eekĩte, ²⁰Herode agĩkĩrĩrĩria ũndũ ũyũ harĩ marĩa mangĩ mothe: akĩhingĩra Johana njeera.

Ithe Eeta Mũũriũ Wake Mwendwe

²¹Na rĩrĩ, rĩrĩa andũ othe maarĩkirie kũbatithio, o nake Jesũ akĩbatithio. Na o akĩhooya, igũrũ rĩkĩhingũka,

²²nake Roho Mũtheru agĩikũrũkĩra igũrũ rĩake ũhaana ta ndutura. Naguo mũgambo ũkiuma igũrũ ũkiuga atĩrĩ, “Wee nĩ we Mũũriũ wakwa mwendwe; nĩngenagĩra thĩinĩ waku.”

²³Nake Jesũ aarĩ ta mĩaka mĩrongo ĩtatũ rĩrĩa aambĩrĩirie wĩra wake, aarĩ mũrũ—o ta ũrĩa gwĩciiragio—wa Jusufu, mũrũ wa Heli, ²⁴mũrũ wa Matathi, mũrũ wa Lawi, mũrũ wa Meliki, mũrũ wa Janai, mũrũ wa Jusufu, ²⁵mũrũ wa Matathia, mũrũ wa Amosi, mũrũ wa Nahumu, mũrũ wa Eseli, mũrũ wa Nagai, ²⁶mũrũ wa Maathi, mũrũ wa Matathia, mũrũ wa Semeini, mũrũ wa Joseki, mũrũ wa Joda, ²⁷mũrũ wa Joanani, mũrũ wa Resa, mũrũ wa Zerubabeli, mũrũ wa Shealitieli, mũrũ wa Neri, ²⁸mũrũ wa Meliki, mũrũ wa Adi, mũrũ wa Kosamu, mũrũ wa Elimadamu, mũrũ wa Eri, ²⁹mũrũ wa Joshua, mũrũ wa Eliezeri, mũrũ wa Jorimu, mũrũ wa Matathi, mũrũ wa Lawi, ³⁰mũrũ wa Simeoni, mũrũ wa Juda, mũrũ wa Jusufu, mũrũ wa Jonamu, mũrũ wa Eliakimu, ³¹mũrũ wa Melea, mũrũ wa Mena, mũrũ wa Matatha, mũrũ wa Nathani, mũrũ wa Daudi, ³²mũrũ wa Jese, mũrũ wa Obedi, mũrũ wa Boazu, mũrũ wa Salimoni, mũrũ wa Nahashoni, ³³mũrũ wa Aminadabu, mũrũ wa Adimini, mũrũ wa Arini, mũrũ wa Hezironi, mũrũ wa Perezi, mũrũ wa Juda, ³⁴mũrũ wa Jakubu, mũrũ wa Isaka, mũrũ wa Iburahĩmu, mũrũ wa Tera, mũrũ wa Nahori, ³⁵mũrũ wa Serugu, mũrũ wa Reu, mũrũ wa Pelegi, mũrũ wa Eberi, mũrũ wa Shela, ³⁶mũrũ wa Kainani, mũrũ wa Aripakishadi, mũrũ wa Shemu, mũrũ wa Nuhu, mũrũ wa Lameki, ³⁷mũrũ wa Methusela, mũrũ wa Enoku, mũrũ wa Jaredi, mũrũ wa Mahalaleli, mũrũ wa Kainani, ³⁸mũrũ wa Enoshi, mũrũ wa Sethi, mũrũ wa Adamu, mũrũ wa Ithe witũ.