Lucas 3

3 ¹Sa ikapulog-lima ka tuig sa paghari ni Tiberio Cesar, sa dihang si Poncio Pilato mao ang gobernador sa Judea, si Herodes mao ang tetrarka sa Galilea, ang iyang igsoon nga si Felipe tetrarka sa rehiyon sa Ituraea ug Trakonite, ug si Lisanias sa Abilinia, ²ubos sa mga pangulong pari nga si Anas ug si Caifas, ang pulong sa atong Amahan midangat kang Juan nga anak ni Zacarias didto sa kamingawan. ³Milibot siya sa tibuok rehiyon sa Jordan, nga nagwali ug bautismo sa paghinulsol alang sa kapasayloan sa mga sala, ⁴sumala sa nahisulat sa basahon sa mga pulong ni propeta Isaias: “Usa ka tingog sa nagatawag sa kamingawan: Andama ninyo ang dalan alang sa Ginoo, tul-ira ang iyang mga agianan. ⁵Ang matag walog pagatambakan, ug ang matag bukid ug bungtod pagapatagon. Ang baliko nga mga dalan matul-id, ug ang gansangon nga mga agianan mahamis, ⁶ug ang tanang katawhan makakita sa kaluwasan sa atong Amahan.”

⁷Unya miingon si Juan ngadto sa mga panon sa katawhan nga nangabot aron magpabautismo kaniya, “Kamong mga anak sa bitin! Kinsa ang nagpasidaan kaninyo sa pagkalagiw gikan sa umaabot nga kapungot? ⁸Busa pamunga kamog bunga nga takos sa paghinulsol. Ayaw kamo pagsugod sa pag-ingon sa inyong kaugalingon, ‘Si Abraham mao ang among amahan.’ Kay sultihan ko kamo, ang atong Amahan makahimo sa pagpatungha ug mga anak alang kang Abraham gikan niining mga bato. ⁹Ang atsa karon anaa na sa gamot sa mga kahoy; ang matag kahoy nga dili mamunga ug maayong bunga pagaputlon ug ilabay ngadto sa kalayo.”

¹⁰Ug nangutana kaniya ang mga panon sa katawhan, “Nan, unsa may among buhaton?”

¹¹Mitubag siya, “Si bisan kinsa nga adunay duha ka bisti, hatagi ang walay bisti; ug si bisan kinsa nga adunay pagkaon, buhata usab ang ingon.”

¹²Ang mga maniningil ug buhis miabot usab aron magpabautismo, ug miingon sila kaniya, “Magtutudlo, unsa may among buhaton?”

¹³“Ayaw kamo pagsingil ug kapin sa gitakda kaninyo,” miingon siya kanila.

¹⁴Ang mga sundalo nangutana usab kaniya, “Ug kami—unsa may among buhaton?” Miingon siya kanila, “Ayaw ninyo kuhaa ang kuwarta ni bisan kinsa pinaagi sa pugos o bakak nga sumbong; kontento kamo sa inyong suhol.”

¹⁵Ang mga tawo nagpaabot, ang tanan naghunahuna diha sa ilang mga kasingkasing kon si Juan ba gayod mao ang Cristo. ¹⁶Mitubag si Juan kanilang tanan, “Ako magabautismo kaninyo sa tubig. Apan adunay moabot nga labing kusgan pa kay kanako—dili ako takos sa paghubad sa higot sa iyang sandalyas. Siya magabautismo kaninyo sa Espiritu Santo ug sa kalayo. ¹⁷Ang igpapahangin anaa sa iyang kamot, hinloan niya ang iyang giokanan, tigomon ang trigo ngadto sa iyang kamalig, apan sunogon ang tahop sa kalayo nga dili mapalong.”

¹⁸Ug uban sa daghan pang mga pulong sa pagtambag, si Juan nagmantala sa maayong balita ngadto sa mga tawo. ¹⁹Apan gisaway ni Juan si Herodes nga tetrarka mahitungod kang Herodias, ang asawa sa iyang igsoon, ug mahitungod sa tanang daotan nga nabuhat ni Herodes, ²⁰Gidugang kini ni Herodes sa tanan nga uban pa: gipabilanggo niya si Juan.

Gitawag sa Amahan nga Pinalangga ang Iyang Anak

²¹Sa dihang nabautismohan na ang tanang tawo, si Jesus nabautismohan usab. Samtang siya nag-ampo, naabli ang langit,

²²ug ang Espiritu Santo mikunsad diha kaniya sa lawasnong dagway sama sa salampati. Ug may tingog nga miabot gikan sa langit, “Ikaw ang akong Anak nga pinalangga; kanimo ako nahimuot.”

²³Si Jesus mga katloan ka tuig ang panuigon sa dihang gisugdan niya ang iyang ministeryo, anak—sumala sa gituohan—ni Jose, nga anak ni Heli, ²⁴anak ni Matat, anak ni Levi, anak ni Melqui, anak ni Janai, anak ni Jose, ²⁵anak ni Matatias, anak ni Amos, anak ni Nahum, anak ni Esli, anak ni Nagai, ²⁶anak ni Maat, anak ni Matatias, anak ni Semei, anak ni Josec, anak ni Joda, ²⁷anak ni Joanan, anak ni Resa, anak ni Zorobabel, anak ni Salatiel, anak ni Neri, ²⁸anak ni Melqui, anak ni Adi, anak ni Cosam, anak ni Elmadam, anak ni Er, ²⁹anak ni Josue, anak ni Eliezer, anak ni Jorim, anak ni Matat, anak ni Levi, ³⁰anak ni Simeon, anak ni Juda, anak ni Jose, anak ni Jonam, anak ni Eliakim, ³¹anak ni Melea, anak ni Mena, anak ni Matata, anak ni Natan, anak ni David, ³²anak ni Jese, anak ni Obed, anak ni Booz, anak ni Salmon, anak ni Naason, ³³anak ni Aminadab, anak ni Admin, anak ni Arni, anak ni Hezron, anak ni Fares, anak ni Juda, ³⁴anak ni Jacob, anak ni Isaac, anak ni Abraham, anak ni Tera, anak ni Nacor, ³⁵anak ni Serug, anak ni Reu, anak ni Peleg, anak ni Eber, anak ni Sela, ³⁶anak ni Cainan, anak ni Arfaxad, anak ni Sem, anak ni Noe, anak ni Lamec, ³⁷anak ni Matusalem, anak ni Enoc, anak ni Jared, anak ni Mahalaleel, anak ni Cainan, ³⁸anak ni Enos, anak ni Set, anak ni Adan, anak sa atong Amahan.