Lucas 4

4 ¹Si Jesus, nga puno sa Espiritu Santo, mibalik gikan sa Jordan, ug gigiyahan sa Espiritu ngadto sa kamingawan. ²Sulod sa kap-atan ka adlaw, gitintal siya sa yawa, ug walay gikaon niadtong mga adlawa; sa pagkatapos niini, gigutom siya.

³Miingon kaniya ang yawa, “Kon ikaw ang Anak sa Dios, sugoa kining bato nga mahimong tinapay.”

⁴Ug mitubag si Jesus kaniya, “Nahisulat na, ‘Dili mabuhi ang tawo sa tinapay lamang.’”

⁵Unya gidala siya sa yawa sa itaas ug gipakita kaniya ang tanang gingharian sa kalibotan sa usa lamang ka gutlo. ⁶Miingon siya kaniya, “Ihatag ko kanimo kining tanang gahom ug ang ilang himaya, kay gitugyan kini kanako, ug ihatag ko kini kang bisan kinsa nga akong buot hatagan. ⁷Busa kon mosimba ka kanako, maimo kining tanan.”

⁸Ug mitubag si Jesus kaniya, “Nahisulat na, ‘Simbaha ang imong Amahan, ug siya lamang ang imong alagaron.’”

⁹Unya gidala siya ngadto sa Jerusalem, gipatindog siya sa kinatas-ang bahin sa templo, ug miingon, “Kon ikaw ang Anak sa Dios, ambak gikan dinhi, ¹⁰kay nahisulat na, ‘Sugoon niya ang iyang mga anghel mahitungod kanimo, sa pagbantay kanimo,’ ¹¹ug ‘Sa ilang mga kamot pagasapnayon ka nila, aron dili mapandol sa bato ang imong tiil.’”

¹²Ug mitubag si Jesus kaniya, “Giingon na, ‘Dili mo sulayan ang imong Amahan.’”

¹³Ug sa natapos na sa yawa ang tanang pagtintal, mibiya siya kaniya hangtod sa laing higayon.

Mibalik nga Gamhanan ang Anak sa Amahan

¹⁴Mibalik si Jesus sa Galilea diha sa gahom sa Espiritu Santo, ug mikaylap ang balita mahitungod kaniya sa tibuok nga rehiyon. ¹⁵Ug nagtudlo siya sa ilang mga sinagoga, ug ang tanan midayeg kaniya.

¹⁶Miadto siya sa Nazaret, diin siya nagdako, ug sumala sa iyang nabatasan misulod siya sa sinagoga sa adlaw nga Igpapahulay, ug mitindog aron sa pagbasa. ¹⁷Gihatag kaniya ang linukot nga basahon sa propeta nga si Isaias, ug sa pagbukhad niini, nakaplagan niya ang dapit diin nahisulat:

¹⁸“Ang Espiritu sa atong Amahan ania kanako, kay gidihogan niya ako sa pagmantala sa maayong balita ngadto sa mga kabos. Gipadala niya ako sa pagmantala sa kagawasan ngadto sa mga binihag ug sa pagpahiuli sa panan-aw ngadto sa mga buta, sa paghatag ug kagawasan ngadto sa mga dinaugdaog, ¹⁹sa pagmantala sa tuig sa kahimuot sa atong Amahan.” ^a a v19 Naghisgot sa Tuig sa Hubileo — sa dihang ang mga utang gipasaylo, ang mga binihag gibuhian, ug ang yuta giuli.

²⁰Gilukot niya ang basahon, giuli kini sa tig-alagad, ug milingkod. Ang tanang mata sa sulod sa sinagoga nagtutok kaniya.

²¹Ug misugod siya sa pag-ingon kanila, “Karong adlawa natuman kini nga Kasulatan diha sa inyong pagpamati.”

²²Ang tanan nagsulti ug maayo mahitungod kaniya, ug nahibulong sa madanihong mga pulong nga migula sa iyang baba, ug miingon, “Dili ba kini anak ni Jose?”

²³Miingon siya kanila, “Sigurado nga isulti ninyo kanako kining panultihon: ‘Doktor, ayoha ang imong kaugalingon.’ Buhata usab dinhi sa imong kaugalingong lungsod ang among nadungog nga nahitabo sa Capernaum.” ²⁴Ug miingon siya, “Sa pagkatinuod, sultihan ko kamo, walay propeta nga dinawat sa iyang kaugalingong lungsod. ²⁵Apan sa pagkatinuod sultihan ko kamo, daghang mga balo ang nanagpuyo sa Israel sa mga adlaw ni Elias, sa dihang natakpan ang langit sulod sa tulo ka tuig ug unom ka bulan ug dihay dakong gutom nga miabot sa tibuok yuta, ²⁶apan si Elias wala ipadala kang bisan kinsa kanila kondili ngadto lamang sa usa ka balo sa Sarepta sa Sidon. ²⁷Daghan ang may sanla sa Israel sa mga adlaw sa propeta nga si Eliseo, apan walay usa kanila nga nahinloan gawas kang Naaman nga Siryanhon.”

²⁸Sa pagkadungog nila niini, ang tanan nga didto sa sinagoga nangasuko pag-ayo. ²⁹Mitindog sila, giabog siya pagawas sa lungsod, ug gidala siya ngadto sa ngilit sa bungtod diin gitukod ang ilang lungsod, aron itukmod siya sa pangpang. ³⁰Apan milakaw siya latas sa panon sa katawhan ug mipahawa.

Gipahilom ni Jesus ang Mahugaw nga Espiritu

³¹Milugsong siya sa Capernaum, usa ka lungsod sa Galilea, ug nagtudlo kanila sa adlaw nga Igpapahulay, ³²ug nahibulong sila sa iyang pagpanudlo, kay ang iyang pulong may gahom. ³³Sa sulod sa sinagoga dihay usa ka tawo nga gisudlan sa espiritu sa mahugaw nga yawa; misinggit siya sa makusog nga tingog, ³⁴Ha! Unsay imong tuyo kanamo, Jesus nga taga-Nazaret? Mianhi ka ba aron sa paglaglag kanamo? Nakaila ako kon kinsa ka—ang Balaan sa Dios.

³⁵Gibadlong siya ni Jesus: “Paghilom ug gumula kaniya!” Gilamba siya sa yawa sa atubangan nilang tanan, migula, ug wala siya pasipad-i.

³⁶Ang tanan nahibulong ug nagpangutan-anay sa usag usa, “Unsa ba kining pulonga? Uban sa gahom ug pagbulot-an iyang gisugo ang mahugaw nga mga espiritu, ug nanggula sila!” ³⁷Ug mikaylap ang balita mahitungod kaniya sa tanang dapit sa palibot nga rehiyon.

Nag-ayo ang Amahan Pinaagi sa iyang Anak

³⁸Ug mitindog siya ug mibiya sa sinagoga ug misulod sa balay ni Simon. Karon ang ugangan nga babaye ni Simon gidaot sa hilabihang hilanat, ug nangamuyo sila kaniya nga tabangan siya. ³⁹Mitindog siya sa ibabaw niya ug gibadlong ang hilanat; mibiya kini kaniya, ug diha-diha mibangon siya ug nagsugod sa pag-alagad kanila. ⁴⁰Sa pagsalop sa adlaw, ang tanang may sakit sa nagkadaiyang balatian gidala kaniya; gitapion niya ang iyang mga kamot sa matag usa kanila, ug giayo niya sila. ⁴¹Nanggula usab ang mga yawa gikan sa daghan, nga naninggit, “Ikaw ang Anak sa Dios!” Gipahilom niya sila, gidid-an sila sa pagsulti, kay nahibalo sila nga siya mao ang Cristo.

⁴²Sa pagbanag-banag sa adlaw, migula siya ngadto sa usa ka mingaw nga dapit. Ang mga panon sa katawhan nangita kaniya, miduol kaniya, ug naningkamot sa pagpugong kaniya aron dili siya mobiya kanila.

⁴³Apan miingon siya kanila, “Kinahanglan nga imantala ko usab ang maayong balita sa gingharian sa atong Amahan ngadto sa ubang mga lungsod—kay mao kini ang hinungdan nga gipadala ako.”

⁴⁴Ug nagwali siya sa mga sinagoga sa Judea.