Luke 4

4 ¹Manglā Katharana pemting kahai Jishuva Jordanwui eina latunga, kala Manglāna ali lamhāngli thānmi. ²Zimiksho hangmatithang chipeena ali sui. Chi atambingli ana khikha mazāmana; chi peiuda a thaihaowa.

³Chipeena ali hānga, "Na Varewui Naomayarana jiakha ngalung hi khamui onkhavai kasolu."

⁴Kala Jishuna ali hānga, "Hithada kapihaida lei, 'Mina khamuimāng maningla eina maringpaimana.'"

⁵Chieina chipeena ali khuikāluishita, kala mikkhayip akhawui alungli okathuiwui wungram saikora ali chithei. ⁶Ana ali hānga, "Hi sāshap-pangshap saikora kala athumwui tekhamatei ina nali mira, kaja hi iwui pāngli horsangkhamina, kala ina ningkachāngkhangai chili mira. ⁷Chieina nana ili khorumakha, hi saikora nawuisera."

⁸Kala Jishuna ngahānkai, "Hithada kapihaida lei, 'Nana nawui Avāli khorumra, kala amāngli otram ngatha̱ra.'"

⁹Chieina ana ali Jerusalemli khuivāda, khorumshimwui khamato atonli kānganing ngasaka, kala hānga, "Na Varewui Naomayarana jiakha, hiwui eina nakhalatta ngawoktālu, ¹⁰kaja hithada kapihaida lei, 'Nali yangmi khavai ana awui kazingraobingli nawui pongli kasora,' ¹¹kala 'Athumwui pāng eina nali khāngkāra, chithada napheila lungguili masāza̱khuimara.'"

¹²Kala Jishuna ngahānkai, "Hithada hānghaira, 'Nana nawui Avāli masuiphalungmara.'"

¹³Kala chipeena kasui saikora sākuphaida apong kachā atam eina tangda a awui eina thuihaowa.

Avāwui Naomayara Pangshap eina Latunga

¹⁴Manglā Katharawui pangshap eina Jishuna Galileeli latunga, kala awui pao ngalei chiwui apam hupta ngayaovai. ¹⁵Kala ana athumwui synagogueli tamchithei, kala mi saikorana ali sochikata.

¹⁶Ana a nganui eina leikasā keinung Nazarethli rai, kala awui khangachā eina sabbaththang synagogueli vāzanga, chieina pākup khavai nganinga. ¹⁷Marān Isaiahwui lairik akhalui ali mihaira, kala ana chi makāda, hithada kapihaida lei kakā apam chi samphanga:

¹⁸"Ithumwui Avāwui Manglā iwuili zanghaira, kaja kachāma mibingli khamathā pao hāngkhavai ana ili neomihaira. Narkahaibingli ningkhān hāngkhavai kala mik khangapeobingli mik theiluikhavai, rekharek kahaiabingli ningkhān ngasak khavai, ¹⁹ithumwui Avāwui ngahānkhangai zingkum chi hāngkhavai ana ili chihovāhaira." ^a a v19 Jubilee Kum chi mayaina — leiman ngalatmihai, narkahaibing ningkhānhai, kala ngalei latunghai atam chi.

²⁰Ana akhalui chi khalaphailaga, raopāli latunglaga, ngasoda pama. Synagogueli khalei mi saikorana ali khayangchinga.

²¹Kala ana athumli hāngda wuk sai, "Aja zimiksho kathara tui hi nathumwui khanāli ungshunghaira."

²²Mi saikorana ali kaphā hānga, awui khamor eina shokkahai lumashan tuili matakhakhaida hānga, "Hi Josephwui nao maningmala?"

²³Ana athumli hānga, "Kachangkhat eina nathumna ili chānsam hi chānsamra: 'Raimipā, nakhalatta raimilu.' Capernaumli shokkahaina da ithumna kashā chi, hili nawui aramli tākam eina sālu." ²⁴Kala ana hānga, "Kachangkhat eina ina nathumli kahāngna, marān khipālikha awui aramli khayākashi mangachāmana. ²⁵Kha kachangkhat eina ina nathumli kahāngna, Elijahwui atamli kazing zingkum kathum kala kachāng tharuk shunghai tharan, kala ngalei hupta zāt kahaka shoka tharan, Israelli ra̱meinao kachungkha leisai, ²⁶kala Elijahli athumwui khipālikhawuili machihovāmana, kha Sidonwui Zarephathli khalei ra̱meinao akhali maningla chihovā. ²⁷Marān Elishawui atamli Israelli phārrei kakazā kachungkha leisai, kha Syriawui Naaman maningla khipākha matharchaomana."

²⁸Saikora hi kashā tharan, synagogueli khalei mi saikora malungvātlakhaowa. ²⁹Athumna ngakarthuida, ali keinungwui eina kashamshoklaga, ali lunghār eina hortā khavai, athumwui keinung leikahai kaphungwui thariwui eina khuivai. ³⁰Kha ana mishangwui ngachaili kānlaga vāhaowa.

Jishuna Makathar Manglā Akhali Khuithuimihai

³¹Ana Galileewui keinung Capernaumli tunga, kala sabbaththang athumli tamchitheida hānga, ³²kala athumna awui tamkachithei chili matakhakhaowa, kaja awui tuili sāshap-pangshap leisai. ³³Synagogueli makathar kameowui manglā kazanga mi akha leisai; ana akhon panglāk eina vaoda hānga, ³⁴Ah! Nazarethwui Jishu, ithumla nawui khi leikhala? Ithumli sāshimān khavai na rāhaira? Na khipāna kaji ina thei; na Varewui Katharapā china.

³⁵Jishuna ali khararda hānga, "Kasainakha pamlu, kala awui eina shokhaolu!" Kameo china ali athum katongawui mangāli ngaleili horkarsanghaida shokhaowa, kala ali sākashi masāmana.

³⁶Athum saikora matakhakhaida akha eina akha hāngngaroka, "Hi khi tuikhala? Sāshap pangshap eina ana makathar manglābingli kasoi, kala athumna shokhaora!" ³⁷Chieina awui mingzat chi kuikhamareiwui apam saikorali ngayaovāserhaowa.

Avāna Awui Naomayara eina Raimi

³⁸Chieina ana ngakarthuida synagoguewui eina thuihailaga Simonwui shimli azanga. Chitharan Simonwui aniva̱ kakharur panglāk eina kazāda pisai, kala athumna ali awui vang khangachon khavai poi. ³⁹Ana awui atungli rānganinga kala kakharur kahara; chieina awui kakharur phāhaoda, ana ngalāngda ngakarthuida athumli otram ngatha̱mi. ⁴⁰Zimik zingtunlakha, kazātyur ayāyāva̱ eina kazākahai naobing leikachang saikorana athumli Jishuwuili khuirai; kala ana mi kachiva̱li pāng parrorda athumli raimisera. ⁴¹Kameobingla mi kachungkhawui eina shoklaga, "Na Varewui Naomayarana!" da vaowa. Kha ana athumli khararda matui khavai khāma, kaja athumna a Khristana da thei.

⁴²Kazing kathang eina ana shoklaga ngachakyāng kahai apam akhali vāhaowa. Yaruina ali phāda awuili rai, kala ali athumwui eina mathuihaimi khavai hotnai.

⁴³Kha ana athumli hānga, "Ina khangatei keinungbinglila ithumwui Avā wungramwui paokaphā hāshokphalungra; kaja hiwui vang eina ili chihovāhaira."

⁴⁴Kala ana Judeawui synagoguebingli pao hāshoka.