Luke 3

3 ¹Tiberias Caesarwui khamunga sāsai tharāda kaphangā zingkum, Pontius Pilatena Judeawui governor, Herodna Galileewui khamunga, awui achinā Philipna Ituraea eina Trachonitis ngaleiwui khamunga, kala Lysaniasna Abilenewui khamunga sāda leilakha, ²Annas eina Caiaphas pāngmon kharei sākasā tharan, lamhāngli khalei Zechariahwui naomayara Johnli ithumwui Avāwui tui chi rāhānga. ³Ana Jordanwui ngalei katongali zatta morei pheomi khavai moreiwui eina ning ngateida ra̱kahikwui pao hāshoka, ⁴Isaiah marānwui tui lairikli kapihaida lei thada: "Lamhāngli hoi khame akhawui akhon: Prohowui shongfa ngarānlu, awui shongfa ngarong ngasaklu. ⁵Leiwuk kachiva̱ chipem ngasakra, kala phungrei phungrā kachiva̱ nem ngasakra. Kha̱khamakhei shongfabing ngatar ngasakra, kala kokataro shongfabing khayam ngasakra, ⁶kala phasā khavai saikorana ithumwui Avāwui huikhami chi theira."

⁷Chitharan Johnna ali ra̱hikmi khavai rā khame yaruili hānga: "Phara̱wui naongarābing! Rā khame malungkhavātwui eina yāmshok khavai khipāna nathumli ning ngasharda? ⁸Chiwui vang eina ning ngateichaohaira kaji athei chitheilu. 'Ithumwui avā Abrahamna' da nathum kapupta mahāngphokalu. Kaja ina nathumli hāngna, ithumwui Avāna hi lungguibing eina Abrahamwui vang naongarā sāshapra. ⁹Ngahā chi aruila thingrongbingwui angayungli parhaida lei; thingrong kachiva̱ athei khamathā makhamathei chi ta̱teklaga meilungli horsanghaora."

¹⁰Kala yaruina ali ngahāna, "Chithākha ithumna khi sāra?"

¹¹Ana ngahānkai, "Kachikathāna shirimthing khani lei china, makhalei pāngli akha milu; kachikathāna kashakazā lei china chithada sāranu."

¹²Khāshinā khalokabingnala ra̱hikmikida khavai rālaga ali hānga, "Ojā, ithumna khi sāra?"

¹³"Nathumli miphalungki kaji eina mataimeida makhuialu," da ana athumli hānga.

¹⁴Shipaibingnala ali ngahāna, "Kala ithumva, ithumna khi sāra?" Ana athumli hānga, "Khipālikha pangmeida lah kakapik phen sāda lupā makhuialu; nathumwui samkaphang eina ningyāng unglu."

¹⁵Mibing chi ngaraida leilakha, John khalatta Khrista sāki da athum saikorana athumwui wuklungli ningkashai. ¹⁶Johnna athum saikorali ngahānkai, "Ina nathumli tara̱ eina ra̱hikmi. Kha ili hakkhameiya mi akha rāra; I awui pheihop khara̱ khalāmi khavai matik machāmana. Ana nathumli Manglā Kathara kala mei eina ra̱hikmira. ¹⁷Awui pāngli yāmkok lei, ana awui lanpum hurmathā khuida, awui chumli mā chi kazipkhuira, kha ahikbing chi mashimitkapai meilungli riktāhaora."

¹⁸Kala malung pangsangwui tui kachungkha khangatei einala, Johnna mibingli paokaphā hāshoka. ¹⁹Kha agato preiva̱ Herodiaswui vang eina kala Herodna sākahai makaphā saikorawui vang eina Johnna khamunga Herodli hāngkharā sai, ²⁰Herodna atung saikorali hi ngarumsangda, Johnli phātop shimli sanghai.

Avāna Awui Naomayarali Khaluma da Hoi

²¹Mi saikora ra̱hikmihailaga, Jishula ra̱hikmi. Ana seihā sālakha kazingram shohaowa,

²²kala Manglā Kathara chi mikumowui azak eina nāsha̱ thada awuitungli tākapa̱. Kala kazingramwui eina akhon akha vaorai, "Na iwui khaluma Naomayarana; Ina nali ningyāng unglaka."

²³Jishuna awui otram haophoklaga zingkum thumrā shakha kāhairasai, mina kaphaning thāda, Josephwui naomayarana, Heliwui naomayara, ²⁴Matthatwui naomayara, Leviwui naomayara, Melchiwui naomayara, Janna-iwui naomayara, Josephwui naomayara, ²⁵Mattathiaswui naomayara, Amoswui naomayara, Nahumwui naomayara, Esliwui naomayara, Nagga-iwui naomayara, ²⁶Maathwui naomayara, Mattathiaswui naomayara, Seme-inwui naomayara, Josechwui naomayara, Jodawui naomayara, ²⁷Joananwui naomayara, Rhesawui naomayara, Zerubbabelwui naomayara, Shealtielwui naomayara, Neriwui naomayara, ²⁸Melchiwui naomayara, Addiwui naomayara, Cosamwui naomayara, Elmadamwui naomayara, Erwui naomayara, ²⁹Joshuawui naomayara, Eliezerwui naomayara, Jorimwui naomayara, Matthatwui naomayara, Leviwui naomayara, ³⁰Simeonwui naomayara, Judahwui naomayara, Josephwui naomayara, Jonamwui naomayara, Eliakimwui naomayara, ³¹Meleawui naomayara, Mennawui naomayara, Mattathawui naomayara, Nathanwui naomayara, Davidwui naomayara, ³²Jessewui naomayara, Obedwui naomayara, Boazwui naomayara, Salmonwui naomayara, Nahshonwui naomayara, ³³Amminadabwui naomayara, Adminwui naomayara, Arniwui naomayara, Hezronwui naomayara, Perezwui naomayara, Judahwui naomayara, ³⁴Jacobwui naomayara, Isaacwui naomayara, Abrahamwui naomayara, Terahwui naomayara, Nahorwui naomayara, ³⁵Serugwui naomayara, Reuwui naomayara, Pelegwui naomayara, Eberwui naomayara, Shelahwui naomayara, ³⁶Cainanwui naomayara, Arpachshadwui naomayara, Shemwui naomayara, Noahwui naomayara, Lamechwui naomayara, ³⁷Methuselahwui naomayara, Enochwui naomayara, Jaredwui naomayara, Mahalalelwui naomayara, Cainanwui naomayara, ³⁸Enoshwui naomayara, Sethwui naomayara, Adamwui naomayara, ithumwui Avāwui naomayarana.