Luke 3

3 ¹Fọ Tiberius Caesar im fifteenth year, wen Pontius Pilate bin be govnor for Judea, Herod bin be tetrarch for Galilee, im broda Philip dey rule di region of Ituraea and Trachonitis, and Lysanias dey rule Abilene, ²for di time wey Annas and Caiaphas bin be high priest, our Papa word come to John, Zechariah im pikin, for di wilderness. ³E waka go round di whole Jordan region, dey preach baptism of repentance so dat sin go fit forgive, ⁴as e dey written for di book of di words of Isaiah di prophet: “Person dey shout for di wilderness: Prepare di way for Oga, make im paths straight. ⁵Every valley go full up, and every mountain and hill dem go bring am low. Di crooked road dem go come straight, and di rough way dem go come smooth, ⁶and all flesh go see di salvation of our Papa.”

⁷John come tell di crowd wey come make e baptize dem: “Una pikin of snake! Na who warn una make una run comot from di anger wey dey come? ⁸So make una bear fruit wey show say una don repent true-true. No start to dey tell una sef, ‘We get Abraham as our papa.’ Because I dey tell una, our Papa fit raise pikin for Abraham even from dis stones. ⁹Already di axe don dey for di root of di trees; every tree wey no dey bear good fruit, dem go cut am down and throw am inside fire.”

¹⁰Di crowd come ask am, “So wetin we go do?”

¹¹E answer, “Whoever get two shirt, make e share give di one wey no get; whoever get food, make e do di same thing.”

¹²Tax collector dem come too make e baptize dem, and dem ask am, “Teacher, wetin we go do?”

¹³“No collect pass wetin dem tell una to collect,” e tell dem.

¹⁴Soldier dem too ask am, “And us—wetin we go do?” E tell dem, “No use force or lie collect money from anybody; make wetin dem dey pay una make una belle full.”

¹⁵Di people dey expect, everybody dey wonder for dem heart wheda John im sef fit be di Christ. ¹⁶John answer dem all, “I dey baptize una with water. But one person wey get power pass me dey come—I no fit even loose im sandal rope. E go baptize una with the Holy Spirit and fire. ¹⁷E hold di thing wey dem dey take separate corn for im hand, e go clean im threshing floor well, gather di wheat put for im barn, but e go burn di chaff with fire wey dem no fit quench.”

¹⁸And with plenty other words wey dey encourage, John preach di good news give di people. ¹⁹But John talk true to Herod di tetrarch about Herodias, im broda im wife, and about all di evil wey Herod don do, ²⁰Herod come add dis one on top all di rest: e lock John up for prison.

Di Papa Call Im Pikin di One Wey E Love

²¹Wen dem don baptize all di people, dem baptize Jesus too. As e dey pray, heaven open,

²²and the Holy Spirit come down on top am for body form like dove. And a voice come from heaven: “You be my Pikin wey I love; my heart dey sweet with you.”

²³Jesus be like thirty years wen e start im work, di pikin—as people bin dey think—of Joseph, wey be Heli im pikin, ²⁴wey be Matthat im pikin, wey be Levi im pikin, wey be Melchi im pikin, wey be Jannai im pikin, wey be Joseph im pikin, ²⁵wey be Mattathias im pikin, wey be Amos im pikin, wey be Nahum im pikin, wey be Esli im pikin, wey be Naggai im pikin, ²⁶wey be Maath im pikin, wey be Mattathias im pikin, wey be Semein im pikin, wey be Josech im pikin, wey be Joda im pikin, ²⁷wey be Joanan im pikin, wey be Rhesa im pikin, wey be Zerubbabel im pikin, wey be Shealtiel im pikin, wey be Neri im pikin, ²⁸wey be Melchi im pikin, wey be Addi im pikin, wey be Cosam im pikin, wey be Elmadam im pikin, wey be Er im pikin, ²⁹wey be Joshua im pikin, wey be Eliezer im pikin, wey be Jorim im pikin, wey be Matthat im pikin, wey be Levi im pikin, ³⁰wey be Simeon im pikin, wey be Judah im pikin, wey be Joseph im pikin, wey be Jonam im pikin, wey be Eliakim im pikin, ³¹wey be Melea im pikin, wey be Menna im pikin, wey be Mattatha im pikin, wey be Nathan im pikin, wey be David im pikin, ³²wey be Jesse im pikin, wey be Obed im pikin, wey be Boaz im pikin, wey be Salmon im pikin, wey be Nahshon im pikin, ³³wey be Amminadab im pikin, wey be Admin im pikin, wey be Arni im pikin, wey be Hezron im pikin, wey be Perez im pikin, wey be Judah im pikin, ³⁴wey be Jacob im pikin, wey be Isaac im pikin, wey be Abraham im pikin, wey be Terah im pikin, wey be Nahor im pikin, ³⁵wey be Serug im pikin, wey be Reu im pikin, wey be Peleg im pikin, wey be Eber im pikin, wey be Shelah im pikin, ³⁶wey be Cainan im pikin, wey be Arphaxad im pikin, wey be Shem im pikin, wey be Noah im pikin, wey be Lamech im pikin, ³⁷wey be Methuselah im pikin, wey be Enoch im pikin, wey be Jared im pikin, wey be Mahalalel im pikin, wey be Cainan im pikin, ³⁸wey be Enosh im pikin, wey be Seth im pikin, wey be Adam im pikin, wey be di pikin of our Papa.