Bouei Haoeibü Ngühlang Hautida
Johan yamlamanga ngekko kikei, hoba müt ai kümla mubü dogo ladangdang hao to phekei: nyingkou lumbo kushi, khüm yaang akujan, müt la ayepjan. Haoei Herodeibü shabü ngakei hoba kho shangabü jenaa kipbü kikei. Jisu müt pendou yoa baptikukei, hoba haoeibü Bouei hao to maangangbü Shou dogo laukei.
3 1Kaisar Tiberius sangle thüka kibü po anthükngaoboubüa, Pontia Pilat Jihuda governor kijinei, Herod Galil thükkabou kijinei, haoeibü na Filip Ituria si Trakhoniti kaonyek thükkabou kijinei, hoba Lusania Abilene thükkabou kijinei, 2thükkabou ungshedbou Anna si Kaifa chaloua, seneibü Boueibü ngüh Zekharia shou Johan jungto yamlamanga loukei. 3Haoei Jordan kaophei kaonyek pendou jembo haukei, hoba shabü apla shanga müt maangpon sepeian baptila shanga ngekkei, 4Isaia thuseibü ngüh laia Laishibaei lenbü tegü: “Yamlamanga müt cheei ngekko kia: Bunyubou shanga lam lamleashi, haoeibü lamnyu tangbü kümashi. 5Kaokhong pendou shentilabü, hoba shongh pendou yomang la yeitilabü. Kombünongbü lamkhong pendou tangshaitham yeilabü, hoba tokbükhongbü lam pendou lenglengtham yeilabü, 6hoba müt pendouei seneibü Boueibü khümenbü haplabü.”
7Kheijinei noknyüh hao jungto baptikula shanga louko kikei, hoba Johanei haoen to laukei, “Kan kho pinyu meten! Loulabü maangshat ka satenjan dogo aoei kan to thungeijangeikei? 8Kheijinei maangpon sepeibü tetsibü lang ehekjan. ‘Abraham seneibü bou ki’ dogo kan lolo kan to lauko akhangjan; aishanga ngei kan to lenda, seneibü Boueikei habü laang ka Abraham shanga shousi shuong longtila thükda. 9Chühashi, wou kho bunyu chungthema tenan kia; lang maibü aehekbü bunyu weko aklabü hoba wana aplabü.”
10Hobaje noknyühei hao to phekei, “Kheijinei künei ai kümla?”
11Haoei jongaikei, “Aoei nei nyi kibü, akibou to phejan; aoei shausiyung kibü, kho tegü ong kümjan.”
12Khüm hebü shuongeikei baptila shanga loukei, hoba haoenei hao to laukei, “Lenbou, künei ai kümla?”
13Haoei haoen to laukei, “Kan la hilabü ka juong ong akhüm hejan.”
14Sepai shuongeikei yoan hao to phekei, “Hoba künei—ai kümla?” Haoei haoen to laukei, “Aoyou to ong hau kibüei ayingsi amlangbü aukhünei nam ate asungjan; kaneibü mu to senyühshemjan.”
15Mütshuongei chüheiko kikei, hoba Johan himshuong Khrista yingkao dogo haoen pendouei honeibü maanga maangpangko kikei. 16Johanei haoen pendou to jongaikei, “Ngei kan deia baptikuda. Lausikei küto hau kibou che louada; ngo haoeibü nguoklüh sengkula amukei. Haoei kho kan to Soushou Saopobüa hoba wana baptikulabü. 17Haoeibü ika wansou jungan kia; haoei haoeibü amshang küpjemlabü, hoba whet youshou haoeibü bung to yoshaikulabü; lausikei anyetbü wana sho kho jikan aplabü.”
18Hobaje lubü ngüh juong yoan Johanei mütshuong huiletkei hoba haoen to Ngühlang Maibü songlenkei. 19Lausikei Johanei thükkabou Herod to, haoeibü na yak Herodia shanga, hoba Herodei kümbü amaibü pendou shanga, thenyek lenkei, 20Herodei ho kho pendou thüka toukei longentikei, haoei Johan thüngdanga khinkukei.
Bouei Haoeibü Shou Sanoubü dogo Lauda
21Mütshuong pendou baptikukei chaloua, Jisueikei baptikukei. Hoba haoei welaukei jiha, khuthük ipbukei,
22hoba Soushou Saopobü manga mang kibü dukutuk tegü hao thüka louyenkei. Hoba khuthük ka ngüh cheei laukei, “No kü sanoubü Shou ki; kato ngei maang haida.”
23Jisuei haoeibü khangenbü khangbü jiha po 30 thüng onkei. Hao kho, dogo dambei, Josefeibü shou kikei, Helieibü shou, 24Matthateibü shou, Levieibü shou, Melkieibü shou, Jannaieibü shou, Josefeibü shou, 25Matathiaeibü shou, Amoseibü shou, Nahumeibü shou, Eslieibü shou, Nagaieibü shou, 26Maateibü shou, Matathiaeibü shou, Semeineibü shou, Josekeibü shou, Jodaeibü shou, 27Joananeibü shou, Resaeibü shou, Zerubabeleibü shou, Shealtieleibü shou, Nerieibü shou, 28Melkieibü shou, Addieibü shou, Kosameibü shou, Elmadameibü shou, Ereibü shou, 29Joshuaeibü shou, Eliezereibü shou, Jorimeibü shou, Matthateibü shou, Levieibü shou, 30Simeoneibü shou, Jihudaeibü shou, Josefeibü shou, Jonameibü shou, Eliakimeibü shou, 31Meleaeibü shou, Mennaeibü shou, Matathaeibü shou, Nathaneibü shou, Dawideibü shou, 32Jesseeibü shou, Obedeibü shou, Boazeibü shou, Salmoneibü shou, Nashoneibü shou, 33Aminadabeibü shou, Admineibü shou, Arnieibü shou, Hezroneibü shou, Perezeibü shou, Jihudaeibü shou, 34Jakobeibü shou, Isakeibü shou, Abrahameibü shou, Teraeibü shou, Nahoreibü shou, 35Serugeibü shou, Reueibü shou, Pelegeibü shou, Ebereibü shou, Shelaeibü shou, 36Kananeibü shou, Arpakshadeibü shou, Shemeibü shou, Noaeibü shou, Lamekeibü shou, 37Methuselaeibü shou, Enokeibü shou, Jaredeibü shou, Mahalaleleibü shou, Kananeibü shou, 38Enosheibü shou, Setheibü shou, Adameibü shou, seneibü Boueibü shou.
