路加福音 3

3 ¹凱撒提庇留在位第十五年,本丟·彼拉多做猶太嘅總督,希律做加利利嘅分封王,佢嘅兄弟腓力做以土利亞同特拉可尼一帶嘅分封王,呂撒聶做亞比利尼嘅分封王, ²喺亞那同該亞法做大祭司嗰陣,我哋嘅父嘅話喺曠野臨到撒迦利亞嘅仔約翰。 ³佢就走遍約旦河一帶所有地方,宣講悔改嘅洗禮,叫人罪得赦免, ⁴正如先知以賽亞嘅言論集所寫嘅:「喺曠野有人喊叫: 預備主嘅道路, 修直祂嘅路徑。 ⁵一切山谷都要填滿, 大小山岡都要削平; 彎曲嘅道路要變直, 崎嶇嘅路要變平坦, ⁶凡有血氣嘅都要睇見我哋嘅父嘅救恩。」

⁷約翰就對嗰啲嚟搵佢受洗嘅群眾講:「你哋呢班毒蛇嘅種!邊個警告你哋逃避將要嚟到嘅忿怒呢? ⁸所以你哋要結出同悔改相稱嘅果子。唔好喺心裏面對自己講:『我哋有亞伯拉罕做我哋嘅祖宗。』因為我話你哋知,我哋嘅父可以叫呢啲石頭為亞伯拉罕興起後代。 ⁹而家斧頭已經放咗喺樹根度;凡係唔結好果子嘅樹,都會被砍落嚟,掉落火裏面。」

¹⁰群眾就問佢:「噉我哋應該點做呢?」

¹¹佢回答講:「有兩件衫嘅,就要分俾冇嘅人;有食物嘅,都要照樣噉做。」

¹²又有啲稅吏嚟受洗,問佢:「老師,我哋應該點做呢?」

¹³佢對佢哋講:「除咗規定嘅之外,唔好多收。」

¹⁴又有啲兵問佢:「噉我哋呢?我哋應該點做呢?」佢對佢哋講:「唔好用暴力或者誣告勒索人;要滿足於自己嘅糧餉。」

¹⁵百姓正在盼望等候,人人心裏面都猜想約翰係唔係基督。 ¹⁶約翰回答佢哋大家講:「我係用水俾你哋受洗。但係有一位比我更大能嘅就嚟緊——我連解佢鞋帶都唔配。佢會用聖靈同火俾你哋受洗。 ¹⁷佢手裏面攞住簸箕,要清理佢嘅禾場,將麥子收入佢嘅倉裏面,但係會用唔滅嘅火燒盡啲糠秕。」

¹⁸約翰仲用好多其他嘅話勸勉百姓,向佢哋傳福音。 ¹⁹但係分封王希律因為佢兄弟嘅老婆希羅底嘅事,同埋佢所做嘅一切惡事,受到約翰嘅責備, ²⁰希律喺呢一切之上又加多一件:佢將約翰關入監獄。

天父稱祂嘅兒子做愛子

²¹眾人都受洗嗰陣,耶穌都受咗洗。佢禱告嘅時候,天就開咗,

²²聖靈以身體嘅形狀好似鴿子噉降喺佢身上。又有聲音從天上嚟:「你係我嘅愛子,我喜悅你。」

²³耶穌開始佢嘅工作嗰陣大約三十歲。人哋以為佢係約瑟嘅仔,約瑟係希里嘅仔, ²⁴瑪塔嘅仔,利未嘅仔,麥基嘅仔, 雅拿嘅仔,約瑟嘅仔, ²⁵瑪達提亞嘅仔,亞摩斯嘅仔,拿鴻嘅仔, 以斯利嘅仔,拿該嘅仔, ²⁶瑪押嘅仔,瑪達提亞嘅仔,西美嘅仔, 約細嘅仔,約大嘅仔, ²⁷約亞拿嘅仔,利撒嘅仔,所羅巴伯嘅仔, 撒拉鐵嘅仔,尼利嘅仔, ²⁸麥基嘅仔,亞底嘅仔,哥桑嘅仔, 以摩當嘅仔,珥嘅仔, ²⁹約書亞嘅仔,以利以謝嘅仔,約令嘅仔, 瑪塔嘅仔,利未嘅仔, ³⁰西緬嘅仔,猶大嘅仔,約瑟嘅仔, 約南嘅仔,以利亞敬嘅仔, ³¹米利亞嘅仔,買南嘅仔,瑪達他嘅仔, 拿單嘅仔,大衛嘅仔, ³²耶西嘅仔,俄備得嘅仔,波阿斯嘅仔, 撒門嘅仔,拿順嘅仔, ³³亞米拿達嘅仔,亞得民嘅仔, 亞尼嘅仔, 希斯崙嘅仔,法勒斯嘅仔,猶大嘅仔, ³⁴雅各嘅仔,以撒嘅仔,亞伯拉罕嘅仔, 他拉嘅仔,拿鶴嘅仔, ³⁵西鹿嘅仔,拉吳嘅仔,法勒嘅仔, 希伯嘅仔,沙拉嘅仔, ³⁶該南嘅仔,亞法撒嘅仔,閃嘅仔, 挪亞嘅仔,拉麥嘅仔, ³⁷瑪土撒拉嘅仔,以諾嘅仔,雅列嘅仔, 瑪勒列嘅仔,該南嘅仔, ³⁸以挪士嘅仔, 塞特嘅仔,亞當嘅仔, 我哋嘅父嘅仔。