Luke 3 FHB Father's Heart Bible™

3 ¹Tiberius Caesar pora raj kora laga pondroh saal te, jitia Pontius Pilate Judea desh laga shashonkorta thakise, Herod Galilee laga raja thakise, tar bhai Philip Ituraea aru Trachonitis desh laga raja thakise, aru Lysanias Abilene laga raja thakise, ²jitia Annas aru Caiaphas mukhyo purohit thakise, amar Pitri laga kotha tu jongol te Zechariah laga putro John logot te ahhise. ³Tai pura Jordan desh laga sob jagah te jai kene, paap khyoma pabole nimite mon ghurai diya laga baptizma laga kotha prachar korise, ⁴bhabobadi Isaiah laga kotha laga kitab te likha thaka nisena: “Jongol te mati thaka ekjon laga awaj: Prabhu nimite rasta taiyar koribi, Tar laga rasta khan sidha koribi. ⁵Sob nichala jagah bhorti hobo, aru sob pahar aru tila niche kori dibo. Beka rasta khan sidha hoi jabo, aru ogra-bogra rasta khan saman hobo, ⁶aru sob manuh amar Pitri laga poritran dikhibo.”

⁷Titia John pora tar logote baptizma lobole aha bhir manuh khan ke koise, “Tumikhan saph laga bacha khan! Ahi thaka khong pora polabole kun pora tumikhan ke hoshiar korise? ⁸Etu nimite mon ghura laga layak phol ulabi. Aru nijor bhitor te, ‘Amikhan laga pitri Abraham ase,’ eneka kobole shuru nakoribi. Kilemane moi tumikhan ke koi ase, amar Pitri pora etu pathor khan pora bhi Abraham nimite bacha khan uthai dibole pare. ⁹Etiya bhi kurhal to gos khan laga jor te rakhi ase; bhal phol nadhura sob gos ke kati kene jui te phelai dibo.”

¹⁰Aru bhir manuh khan pora tai ke hudise, “Tinehoile amikhan ki koribo lage?”

¹¹Tai jawab di koise, “Jun logote duita kapor ase, eku nathaka ke bhag kori dibi; aru jun logote kha-luwa ase, tai bhi eneka he koribi.”

¹²Kor utha manuh khan bhi baptizma lobole ahise, aru tarkhan pora tai ke koise, “Guruji, amikhan ki koribo lage?”

¹³Tai tarkhan ke koise, “Tumikhan nimite jiman thik korise, tar pora bisi nalobi.”

¹⁴Sipahi khan bhi tai ke hudise, “Aru amikhan—ki koribo lage?” Tai tarkhan ke koise, “Kun ke bhi joborjosti pora na misa doshi lagai kene eku nalobi; nijor laga mojuri te khushi thakibi.”

¹⁵Manuh khan asha kori rukhi thakise, aru sob nijor mon te John nijor he Khrista hobo naki koi kene bhabona korise. ¹⁶John pora sob ke jawab di koise, “Moi to tumikhan ke pani pora baptizma di ase. Kintu moi pora bhi takot thaka ekjon ahi ase—Tar laga chapal laga fita khuli dibole bhi moi layak nahoi. Tai tumikhan ke Pobitro Atma aru jui pora baptizma dibo. ¹⁷Tar hath te uri diya kata loi kene, Tai nijor kheti sapha koribo, aru gehu to nijor bhoral te joma koribo, kintu bhusa to kitia bhi nabhuja jui pora julai dibo.”

¹⁸Aru dusra bisi upodesh laga kotha khan pora, John pora manuh khan ke susamachar prachar korise. ¹⁹Kintu John pora Herod raja ke, tar bhai laga maiki Herodias laga karone, aru Herod pora kora sob biya kaam laga karone, galti dikhai dise, ²⁰Herod pora sob laga uporte etu bhi jorise: tai John ke bondi ghor te bondh kori dise.

Pitri pora Tar laga Putro ke Morom Kora Bulikena Mate

²¹Jitia sob manuh khan baptizma loise, Jisu bhi baptizma loise. Aru jitia Tai prathana kori thakise, sorgo khuli jaise,

²²aru Pobitro Atma gau laga rup loi kene kabotar nisena Tar uporte namise. Aru sorgo pora ekta awaj ahise, “Tumi Moi laga morom kora Putro ase; Moi Tumi logote bisi khushi ase.”

²³Jisu pora Tar sewa shuru kora homoi te, Tai labhag tis saal umor laga thakise, aru manuh khan bhabise ki Tai Joseph laga putro asile, Joseph to Heli laga putro, ²⁴Matthat laga putro, Levi laga putro, Melchi laga putro, Jannai laga putro, Joseph laga putro, ²⁵Mattathias laga putro, Amos laga putro, Nahum laga putro, Esli laga putro, Naggai laga putro, ²⁶Maath laga putro, Mattathias laga putro, Semein laga putro, Josech laga putro, Joda laga putro, ²⁷Joanan laga putro, Rhesa laga putro, Zerubbabel laga putro, Shealtiel laga putro, Neri laga putro, ²⁸Melchi laga putro, Addi laga putro, Cosam laga putro, Elmadam laga putro, Er laga putro, ²⁹Joshua laga putro, Eliezer laga putro, Jorim laga putro, Matthat laga putro, Levi laga putro, ³⁰Simeon laga putro, Judah laga putro, Joseph laga putro, Jonam laga putro, Eliakim laga putro, ³¹Melea laga putro, Menna laga putro, Mattatha laga putro, Nathan laga putro, David laga putro, ³²Jesse laga putro, Obed laga putro, Boaz laga putro, Salmon laga putro, Nahshon laga putro, ³³Amminadab laga putro, Admin laga putro, Arni laga putro, Hezron laga putro, Perez laga putro, Judah laga putro, ³⁴Jacob laga putro, Isaac laga putro, Abraham laga putro, Terah laga putro, Nahor laga putro, ³⁵Serug laga putro, Reu laga putro, Peleg laga putro, Eber laga putro, Shelah laga putro, ³⁶Cainan laga putro, Arphaxad laga putro, Shem laga putro, Noah laga putro, Lamech laga putro, ³⁷Methuselah laga putro, Enoch laga putro, Jared laga putro, Mahalalel laga putro, Cainan laga putro, ³⁸Enosh laga putro, Seth laga putro, Adam laga putro, amar Pitri laga putro.