Luka 3 FHB Father's Heart Bible™

3 ¹Muna luyalu lwa Tibediyadi Khayisala, muna mvula ya kumi yi tanu, tangwa Phosi Philatu kákala yala Yuteya, Eloti kákala yala Ngadidi, Fidiphu phangi wandi kákala yala kinzunga kya Ituleya yi Talakoniti, amana Lisaniyasi kákala yala Abileni, ²Muna tangwa dya bambuta ba banganga Nzambi Ana yi Khayifu, Ndinga ya Tata wetu yakwísa kwena Yowani mwana wa Zakadiya muna nganga. ³Wenda muna kinzunga kyosu kya Yolutani, kakala longa mbotika ya kubalula mbundu mu kulolokila masumu, ⁴Bwosu básonika muna mukanda wa mambu ma mbikudi Yesaya: «Ndinga ya mutu mosi wuna, ku nganga, wisi kalunga: Yidikenu nzila kwena Pfumu, amana sungikenu mikinda myandi. ⁵Sambwa yosu yakázadiswa, amana mongu wosu yi londi dyosu byakákulumunwa. Nzila za zangana zakákhituka zasungama, amana nzila za ningana zakákhituka lengu, ⁶amana batu boosu bámona luhulusu lwa Tata wetu.»

⁷Yowani wuzimbudi buna kwena batu bana bakala kwisa ku mbotika ya yandi: «Mbandu ya masawa! Nati wululongisidi mu kutina khabu zazi zakwísa? ⁸Buna butenu bibundu bifwanana yi kubalula mbundu. Lubika yandika kudizonzila: “Tuenina yi Bulahami hanga tata wetu.” Mukuma yiluzimbwadini, Tata wetu kalenda tedimisa bana ba Bulahami tukila mu matadi mama. ⁹Kisoka kedi kyenina hana sina dya miti; muti wosu wuna kabutaku bibundu bya mboti, bawukwanga amana bawulosa ku mbawu.»

¹⁰Amana batu bámuhyula: «Buna biki tufwani kusala?»

¹¹Wávutula: «Mutu wuna wenina yi miledi myodi, kahana yi wuna kakonda; amana mutu wuna wenina yi bidya, kasala phila mosi.»

¹²Balaki ba phaku phi bakwísa ku mbotika, amana bámuzimbwala: «Mulongi, biki tufwani kusala?»

¹³Wubazimbwadini: «Lubika bonga kuluta mana balulombini.»

¹⁴Makesa mpi bámuhyula: «Betu buna, biki tufwani kusala?» Wubazimbwadini: «Lubika yiba mutu kima mu ngolu ho mu kufunda kwa bukamvi; luyukutila mfutu wenu.»

¹⁵Batu bakala hingila, boosu bakala dihyula mu mbundu za bawu kana Yowani kibeni kenina Kidisitu. ¹⁶Yowani wubavutwadini boosu: «Meni, mbati lubotika mu mamba. Kaasi kwena kabati kwisa wuna wenina yi ngolu kuluta meni—meni, kutu ndungiku mu kukutumuna musinga wa sanda zandi. Yandi kakwisa lubotika mu Kitembu Kyatoma yi mu mbawu. ¹⁷Wenina yi muyungulu hana koku dyandi mu kuhambula ngenza yandi; kasóla bukheti bwandi, kalumbika muna khila yandi, kaasi tswala, kayóka mu mbawu yina yilendaku zima.»

¹⁸Amana mu mambu ma lawu ma kulongisa, Yowani wálonga Musamu wa Bukheti kwena batu. ¹⁹Kaasi Yowani waléwula Eloti wuna wákala yala, kikuma kya Elodyadi mukhetu wa phangi wandi, yi kikuma kya mambu moosu mambi mana kásala Eloti, ²⁰Eloti wabwedila dyadi hana mambu moosu mankaka: wákotisa Yowani mu boloku.

Tata Watela Mwana Wandi Watondama

²¹Tangwa batu boosu bábotama, Yesu phi wábotama. Bwosu kakala sambila, zilu dikanguki,

²²amana Kitembu Kyatoma kakulumuka kwena yandi mu lutu hanga yembi. Amana ndinga yátuka ku zilu: «Ngeyi wenina Mwana wama wuna yitondidi; mwena ngeyi tsidini kyesi kyama.»

²³Yesu wákala hamu-hamu mvula makumatatu tangwa kayandika kisalu kyandi. Yandi wákala mwana—bwosu bábanza—wa Yozefu, mwana wa Heli, ²⁴mwana wa Mathata, mwana wa Lefi, mwana wa Meleki, mwana wa Yanayi, mwana wa Yozefu, ²⁵mwana wa Matatyasi, mwana wa Amosi, mwana wa Nahumi, mwana wa Esili, mwana wa Nangayi, ²⁶mwana wa Mati, mwana wa Matatyasi, mwana wa Semeyini, mwana wa Yoseki, mwana wa Yota, ²⁷mwana wa Yowanani, mwana wa Lesa, mwana wa Zolubabedi, mwana wa Salasyedi, mwana wa Nedi, ²⁸mwana wa Meleki, mwana wa Adi, mwana wa Kosami, mwana wa Elimadami, mwana wa Edi, ²⁹mwana wa Yosuwe, mwana wa Eliyezeli, mwana wa Yolimi, mwana wa Mathata, mwana wa Lefi, ³⁰mwana wa Simeyoni, mwana wa Yuta, mwana wa Yozefu, mwana wa Yonami, mwana wa Edyakimi, ³¹mwana wa Meleya, mwana wa Mena, mwana wa Matata, mwana wa Natani, mwana wa Tavidi, ³²mwana wa Yese, mwana wa Yobedi, mwana wa Bowasi, mwana wa Salamani, mwana wa Nasoni, ³³mwana wa Aminatabi, mwana wa Adimini, mwana wa Alami, mwana wa Hesiloni, mwana wa Fwalesi, mwana wa Yuta, ³⁴mwana wa Yakobi, mwana wa Yizaki, mwana wa Bulahami, mwana wa Tela, mwana wa Nakodi, ³⁵mwana wa Selugi, mwana wa Lewu, mwana wa Felegi, mwana wa Ebeli, mwana wa Sela, ³⁶mwana wa Kaynani, mwana wa Alafakisati, mwana wa Semi, mwana wa Nowa, mwana wa Lameki, ³⁷mwana wa Matusalemi, mwana wa Noki, mwana wa Yaledi, mwana wa Mahalaleli, mwana wa Kaynani, ³⁸mwana wa Enosi, mwana wa Seti, mwana wa Atamu, mwana wa Tata wetu.