Luka 3 FHB Father's Heart Bible™

3 ¹Na mobu ya zomi na mitano ya bokonzi ya Tiberio Kaisala, tango Ponsio Pilato azalaki guvernere ya Yude, Elode azalaki tetraka ya Galile, ndeko na ye Filipo ya etando ya Iturea mpe Trakonite, mpe Lisania ya Abilene, ²na tango ya bakonzi ya banganga-nzambe Ana mpe Kayifa, liloba ya Tata na biso eyelaki Yoane mwana ya Zakalia kati na esobe. ³Ayaki na etando mobimba ya Yordani, azali kosakola batisimo ya boyamboli mpo na bolimbisi ya masumu, ⁴lokola ekomami na buku ya maloba ya mosakoli Izaya : « Mongongo ya moto oyo azali kobelela na esobe : Bobongisa nzela mpo na Nkolo, bosala banzela na Ye polele. ⁵Lobwaku nyonso ekotondisama, mpe ngomba nyonso na ngomba moke ekokitisama. Banzela ya mabaku-baku ekokoma polele, mpe banzela ya mabanga ekokoma pelepele, ⁶mpe nzoto nyonso ekomona lobiko ya Tata na biso. »

⁷Boye Yoane alobaki na ebele ya bato oyo bazalaki koya mpo ete babatisama na ye : « Bino bana ya banyoka ya ngenge ! Nani ayebisaki bino ete bokima nkanda oyo ezali koya ? ⁸Boye bobota mbuma oyo ebongi na boyamboli. Bobanda koloba na mitema na bino te : ‹ Tozali na Abalayama lokola tata na biso. › Pamba te nazali koloba na bino ete Tata na biso akoki kotelemisa bana mpo na Abalayama uta na mabanga oyo. ⁹Sik’oyo demolo ezali na misisa ya banzete ; nzete nyonso oyo ebotaka mbuma ya malamu te ekatami mpe ebwakami na moto. »

¹⁰Mpe ebele ya bato batunaki ye : « Boye tosala nini ? »

¹¹Azongisaki : « Moto oyo azali na bilamba mibale apesa moto oyo azali na yango te ; mpe moto oyo azali na bilei asala bongo mpe. »

¹²Basolo-mpako mpe bayaki mpo ete babatisama, mpe balobaki na ye : « Molakisi, tosala nini ? »

¹³« Bosenga mpako koleka oyo etindami na bino te », alobaki na bango.

¹⁴Basoda mpe batunaki ye : « Mpe biso, tosala nini ? » Alobaki na bango : « Bozwa eloko na moto moko na makasi te, mpe bopamela moto moko lokuta te ; bosepela na lifuta na bino. »

¹⁵Bato bazalaki kozela, mpe bango nyonso bazalaki komituna na mitema na bango soki Yoane ye moko nde azali Klisto. ¹⁶Yoane azongisaki bango nyonso : « Nabatisaka bino na mai. Kasi moto moko oyo azali makasi koleka ngai azali koya ; ngai nabongi te ata kobongola mokanda ya sandale na Ye. Ye akobatisa bino na Molimo Mosantu mpe na moto. ¹⁷Azali na mbeli ya kopepa na loboko, akopetola esika na Ye ya kobeta mbuma, akoyanganisa masango na etuka na Ye, kasi akotumba mposo na moto oyo ekozima te. »

¹⁸Mpe na maloba mosusu mingi ya kolendisa, Yoane asakolaki Nsango Malamu epai ya bato. ¹⁹Kasi Yoane apamelaki Elode tetraka mpo na Elodiya, mwasi ya ndeko na ye, mpe mpo na mabe nyonso oyo Elode asalaki, ²⁰Elode akotisaki likambo oyo likolo ya nyonso : akangaki Yoane na boloko.

Tata abengi Mwana na Ye oyo alingami

²¹Tango bato nyonso babatisamaki, Yesu abatisamaki mpe. Wana azali kobondela, Likolo efungwamaki,

²²mpe Molimo Mosantu akitaki likolo na Ye na lolenge ya nzoto lokola ejoli. Mpe mongongo euti na Likolo : « Yo ozali Mwana na Ngai oyo alingami ; nasepelaka mingi na Yo. »

²³Yesu azalaki na mibu soko tuku misato tango abandaki mosala na Ye, mwana — lokola bazalaki kokanisa — ya Yosefu, mwana ya Eli, ²⁴mwana ya Matati, mwana ya Levi, mwana ya Meleki, mwana ya Yanai, mwana ya Yosefu, ²⁵mwana ya Matatiya, mwana ya Amosi, mwana ya Nahumu, mwana ya Esili, mwana ya Nagai, ²⁶mwana ya Maati, mwana ya Matatiya, mwana ya Semeyin, mwana ya Yosek, mwana ya Yoda, ²⁷mwana ya Yoanan, mwana ya Resa, mwana ya Zorobabele, mwana ya Salatiele, mwana ya Neri, ²⁸mwana ya Meleki, mwana ya Adi, mwana ya Kosami, mwana ya Elmadama, mwana ya Eri, ²⁹mwana ya Yosua, mwana ya Eliezele, mwana ya Yorima, mwana ya Matati, mwana ya Levi, ³⁰mwana ya Simeone, mwana ya Yuda, mwana ya Yosefu, mwana ya Yonama, mwana ya Eliakimi, ³¹mwana ya Melea, mwana ya Mena, mwana ya Matata, mwana ya Natani, mwana ya Davidi, ³²mwana ya Yese, mwana ya Obede, mwana ya Boaze, mwana ya Salmona, mwana ya Nahasone, ³³mwana ya Aminadabu, mwana ya Admini, mwana ya Arni, mwana ya Hesirone, mwana ya Perese, mwana ya Yuda, ³⁴mwana ya Yakobo, mwana ya Izaake, mwana ya Abalayama, mwana ya Tela, mwana ya Nahori, ³⁵mwana ya Seruge, mwana ya Rewu, mwana ya Peleke, mwana ya Eberi, mwana ya Sela, ³⁶mwana ya Kainana, mwana ya Arpakisadi, mwana ya Seme, mwana ya Noa, mwana ya Lameki, ³⁷mwana ya Metusela, mwana ya Enoke, mwana ya Yaredi, mwana ya Mahalaleli, mwana ya Kainana, ³⁸mwana ya Enose, mwana ya Seti, mwana ya Adama, mwana ya Tata na biso.