ኣቦ ድምፁ ይልእኽ

ዮሃንስ ኣብ ምድረ በዳ ይሰብኽ፤ ደጋጊሞም ከዓ እቶም ህዝቢ እንታይ ክገብሩ ኸም ዘለዎም ይሓትዎ፦ ቐሚሽ ተማቐሉ፥ ካብ ግቡእ ንላዕሊ ኣይትቀበሉ፥ ኣይትግፍዑ። ንሓጢኣት ሄሮድስ ድማ ሰመዮ፥ በዙይ ከዓ ተኣስረ። ኢየሱስ ምስ ኵሉ ሰብ ተጠመቐ፤ ኣቦኡ ድማ ፍቑር ወዱ ኢሉ ፀውዖ።

ምዕራፍ 3።

ብመበል ዓሰርተ ሓሙሽተ ዓመት መንግስቲ ጢባርዮስ ቄሳር፥ ጶንጥዮስ ጲላጦስ ሹም ይሁዳ እንተሎ፥ ሄሮድስ ኣብ ገሊላ ገዛኢ፥ ሓዉ ፊልጶስ ከዓ ኣብ ሃገር ኢጡርያን ጥራኮኒትስን ገዛኢ፥ ሉሳንዮስ ድማ ኣብ ኣብሌኔ ገዛኢ እንተለዉ፥ ሊቀ ካህናት ሃናን ቀያፋን እንተለዉ፥ ቃል ኣቦና ናብ ዮሃንስ ወዲ ዘካርያስ ኣብ ምድረ በዳ መፀ። ንሱ ኸዓ ንስርየት ሓጢኣት ዝኸውን ናይ ንስሃ ጥምቀት እናሰበኸ፥ ኣብ ኵሉ ሃገር ዙርያ ዮርዳኖስ ዞረ፤ ከምቲ ኣብ መፅሓፍ ቃላት ነቢይ ኢሳይያስ ተፂሒፉ ዘሎ፦ “ኣብ ምድረ በዳ ዝእውጅ ድምፂ፦ መንገዲ እግዚኣብሄር ፅረጉ፥ መንገዱ ኣቕንዑ፤ ኵሉ ስንጭሮ ይመላእ፥ ኵሉ እምባን ኰረብታን ድማ ትሕት ይበል፤ እቲ ቀይናን መንገዲ ይቕናዕ፥ እቲ ድንጕር መንገዲ ድማ ልሙፅ ይኹን፤ ኵሉ ስጋ ድማ ምድሓን ኣቦና ክርኢ እዩ።”

ዮሃንስ ከዓ ነቶም ክጥመቑ ዝመፁ ህዝቢ ከምዙይ በሎም፦ “ኣቱም ውሉድ ኣትማን፥ ካብቲ ዝመፅእ ቝጥዓ ኽትሃድሙ መን ኣጠንቀቐኩም? እምበኣር ንንስሃ ዘብቅዕ ፍረ ኣፍርዩ፤ ‘ኣብርሃም ኣቦና ኣለና’ ኢልኩም ንርእስኹም ክትብሉ ኣይትጀምሩ፤ ኣቦና ካብዞም ኣእማን እዚኣቶም ንኣብርሃም ውሉድ ከተንስኣሉ ይኽእል እዩ እብለኩም ኣለኹ እሞ። ድሮ ማሕፀ ናብ ሱር ኦም ተቐሪቡ ኣሎ፤ ሰናይ ፍረ ዘይፈሪ ኵሉ ኦም ይቝረፅ እሞ ናብ ሓዊ ይድርበ።”

እቶም ህዝቢ ድማ “እምበኣር እንታይ ንግበር?” ኢሎም ጠየቕዎ።

ንሱ ኸዓ መሊሱ “እቲ ኽልተ ቐሚሽ ዘለዎ፥ ነቲ ዘይብሉ የማቕል፤ እቲ ብልዒ ዘለዎ ድማ ከምኡ ይግበር” በሎም።

ተቐበልቲ ቐረፅ ድማ ክጥመቑ መፁ እሞ “መምህር፥ እንታይ ንግበር?” በልዎ።

“ካብቲ ዝተኣዘዝኩሞ ንላዕሊ ኣይትቀበሉ” በሎም።

ወተሃደራት ድማ “ንሕናስ እንታይ ንግበር?” ኢሎም ጠየቕዎ። ንሱ ኸዓ “ንዝኾነ ሰብ ብሓይሊ ወይ ብሓሰት ክሲ ኣይትግፍዑ፤ ብዓስብኹም ዕገቡ” በሎም።

እቶም ህዝቢ ተስፋ እናገበሩ፥ ኵሎም ድማ ምናልባሽ ዮሃንስ ባዕሉ ክርስቶስ እንተ ኾይኑ ኢሎም ብልቦም ይሓስቡ ነበሩ። ዮሃንስ ድማ ንዅሎም መሊሱ ከምዙይ በሎም፦ “ኣነ ብማይ ኣጥምቐኩም ኣለኹ፤ ካባይ ዝሕይል ግና ይመፅእ ኣሎ፤ ኣነ መእሰሪ ኣሳእኑ ኽፈትሕ እኳ ኣይበቅዕን እየ፤ ንሱ ግና ብመንፈስ ቅዱስን ብሓዊን እዩ ዘጥምቐኩም። መስአ ኣብ ኢዱ ሒዙ፥ ዓውዱ ኼፅሪ፥ ስርናዩ ናብ ቆፎኡ ኼክብ፥ ነቲ ሓሰር ግና ብዘይጠፍእ ሓዊ ኼቃፅሎ እዩ።”

ብብዙሕ ካልእ ናይ ምዕዶ ቓላት ድማ ንህዝቢ ወንጌል ይሰብኸሎም ነበረ። ዮሃንስ ግና ንሄሮድስ እቲ ገዛኢ ብዛዕባ ሄሮድያዳ ሰበይቲ ሓዉን ብዛዕባ እቲ ሄሮድስ ዝገበሮ ዅሉ ክፉእን ገሲፅዎ ነበረ፤ ሄሮድስ ድማ ኣብ ልዕሊ እቲ ዅሉ እዙይ ወሰኸሉ፦ ንዮሃንስ ኣብ ቤት ማእሰርቲ ዓፀዎ።

ኣቦ ንወዱ ፍቑር ይብሎ

ኵሉ ህዝቢ ምስ ተጠመቐ፥ ኢየሱስውን ተጠመቐ። ክፅሊ እንተሎ ድማ፥ ሰማይ ተኸፈተ፤

መንፈስ ቅዱስ ድማ ብኣካላዊ መልክዕ ከም ርግቢ ኣብ ልዕሊኡ ወረደ። ካብ ሰማይ ከዓ “ዝፈትወካ ወደይ ንስኻ ኢኻ፤ ብኣኻ ባህ ይብለኒ” ዝብል ድምፂ መፀ።

ኢየሱስ ዕዮኡ ክጅምር እንተሎ ኣስታት ሰላሳ ዓመት ዝዕድሚኡ ነበረ፤ ከም ዝሕሰብ ከዓ ወዲ ዮሴፍ ነበረ፤ ዮሴፍ ወዲ ሄሊ፥ ወዲ ማታት፥ ወዲ ሌዊ፥ ወዲ መልኪ፥ ወዲ ያናይ፥ ወዲ ዮሴፍ፥ ወዲ ማቲትዩ፥ ወዲ ኣሞፅ፥ ወዲ ናሆም፥ ወዲ ኤስሊ፥ ወዲ ናጋይ፥ ወዲ ማኣት፥ ወዲ ማቲትዩ፥ ወዲ ሰሜን፥ ወዲ ዮሴክ፥ ወዲ ዮዳ፥ ወዲ ዮሃናን፥ ወዲ ሬሳ፥ ወዲ ዘሩባቤል፥ ወዲ ሰላትያል፥ ወዲ ኔሪ፥ ወዲ መልኪ፥ ወዲ ኣዲ፥ ወዲ ቆሳም፥ ወዲ ኤልማዳም፥ ወዲ ኤር፥ ወዲ ኢያሱ፥ ወዲ ኤልኤዘር፥ ወዲ ዮሪም፥ ወዲ ማታት፥ ወዲ ሌዊ፥ ወዲ ስምኦን፥ ወዲ ይሁዳ፥ ወዲ ዮሴፍ፥ ወዲ ዮናም፥ ወዲ ኤልያቄም፥ ወዲ ሜልያ፥ ወዲ ሜና፥ ወዲ ማታታ፥ ወዲ ናታን፥ ወዲ ዳዊት፥ ወዲ እሴይ፥ ወዲ ኢዮቤድ፥ ወዲ ቦኤዝ፥ ወዲ ሰልሞን፥ ወዲ ነኣሶን፥ ወዲ ኣሚናዳብ፥ ወዲ ኣድሚን፥ ወዲ ኣርኒ፥ ወዲ ኤስሮም፥ ወዲ ፋሬስ፥ ወዲ ይሁዳ፥ ወዲ ያእቆብ፥ ወዲ ይስሓቅ፥ ወዲ ኣብርሃም፥ ወዲ ታራ፥ ወዲ ናኮር፥ ወዲ ሴሮሕ፥ ወዲ ራግው፥ ወዲ ፋሌቅ፥ ወዲ ዔቦር፥ ወዲ ሳላ፥ ወዲ ቃይናን፥ ወዲ ኣርፋክስድ፥ ወዲ ሴም፥ ወዲ ኖህ፥ ወዲ ላሜህ፥ ወዲ ማቱሳላ፥ ወዲ ሄኖክ፥ ወዲ ያሬድ፥ ወዲ መላልኤል፥ ወዲ ቃይናን፥ ወዲ ሄኖስ፥ ወዲ ሴት፥ ወዲ ኣዳም፥ ወዲ ኣቦና።