آتا اؤز سسئنی گؤندَ‌رئر
یحیا چؤلده وعظ ادر و اوندان دفه‌لرله سوروشولور کی، آداملار اصلئنده نه اتمه‌لی‌دئرلر: بئر کؤینک پایلاشسینلار، آرتیق آلماسینلار، زور ائله آلماسینلار. او، هئرودون گوناهینین آدینی چکئر و اونا گؤره زئندانا آتیلیر. عئسا هامی ائله بئرلئکده تعمئد آلیر، و آتاسی اونو سِودئیی اوغول آدلاندیریر.
3 1تئبرئیوس قیصرئن حؤکمرانلیغینین اون بشئنجی ائلئنده، پونتئیوس پئلاطوس یهودئیه‌نئن والئسی، هئرود جلئلئن حاکئمی، قارداشی فئلئپوس ائتورئیه و تراخونئتئس بؤلگه‌سئنئن حاکئمی، و لئسانئیاس آبئلئنه‌نئن حاکئمی ائدی، 2باش کاهئنلر حَنّا و قیافانین زامانیندا، آتامیزین سؤزو چؤلده زکریانین اوغلو یحیانین یانینا گلدی. 3یحیا بوتون اوردون بؤلگه‌سئنی گَزئب، گوناهلارین باغیشلانماسی اوچون تؤوبه تعمئدئنی وعظ ادئردی، 4نجه کی اِشَعیا پیغمبرئن سؤزلری کئتابیندا یازیلیب: «چؤلده نئدا ادن بئرئنئن سسی: ربّئن یولونو حاضیرلایین، اونون یوللارینی دوز ادئن. 5هر دره دولدورولاجاق، و هر داغ و تپه آشاغی اِندئرئله‌جک. اَیری یوللار دوز اولاجاق، و کَله-کؤتور یوللار هامار اولاجاق، 6و بوتون بشر آتامیزین نئجاتینی گؤره‌جک.»
7یحیا او زامان یانینا تعمئد آلماغا گلن جاماعاتا ددی: «ای افعئلر نسئلی! گله‌جک قضبدن قاچماغا سئزه کئم خبر وردی؟ 8ائندی تؤوبه‌یه لایئق ثمره گتئرئن. اؤز-اؤزونوزه دیمه‌یه باشلامایین: ”بئزئم آتامیز ائبراهئمدئر.“ چونکی سئزه دیئرم کی، آتامیز بو داشلاردان ائبراهئمه اؤولادلار یاراتماغا قادئردئر. 9بالتا آرتیق آغاجلارین کؤکونده حاضیر دورور؛ یاخشی بار ورمه‌ین هر آغاج کسئلئب اودا آتیلیر.»
10جاماعات اوندان سوروشدو: «بس بئز نه اِدَک؟»
11جاواب ورئب ددی: «کئمئن ائکی کؤینه‌یی وار، اولمایان آداما ورسئن؛ کئمئن یمه‌یی وار، او دا بله اتسئن.»
12باج ییغانلار دا تعمئد آلماغا گلئب اونا ددئلر: «استاد، بئز نه اِدَک؟»
13اونلارا ددی: «سئزه تعیئن اولاندان آرتیق ییغمایین.»
14عسگرلر ده اوندان سوروشدولار: «بس بئز نه اِدَک؟» اونلارا ددی: «هچ کسی زورلا یا یالان ائتّئهام ائله سویمایین؛ اؤز مواجئبئنئزه قانع اولون.»
15خالق گؤزله‌یئردی و هامیسی اؤز اورَکلرئنده دوشونوردو کی، گؤره‌سن یحیا اؤزو مسئح‌دئر؟ 16یحیا اونلارین هامیسینا جاواب وردی: «من سئزی سو ائله تعمئد ورئرم. آمّا مندن داها قووّتلی اولان گلئر ـ من اونون آیاق قابیسینین باغینی آچماغا لایئق بله دیئلم. او، موقدّس روح و اودلا سئزی تعمئد وره‌جک. 17شنه‌سی الئنده، خرمنئنی تمئزله‌یئب بوغداسینی آنبارا ییغاجاق، لاکئن سامانی سؤنمه‌ین اودلا یاندیراجاق.»
18یحیا داها بئرچوخ نصئحت سؤزلری ائله خالقا خوش خبری وعظ ادئردی. 19آمّا یحیا حاکئم هئرودو قارداشینین آروادی هئرودئیا باره‌ده و هئرودون اتدئیی بوتون پئسلئکلر باره‌ده دانلادی، 20هئرود بوتون بونلارین اوستونه بونو دا آرتیردی: یحیانی زئنداندا حبس اتدی.
آتا اؤز اوغلونو سِوگئلی آدلاندیریر
21بوتون خالق تعمئد آلاندا، عئسا دا تعمئد آلدی. او دوعا ادنده، گؤی آچیلدی،
22و موقدّس روح جئسمانی شکئلده، گؤیرچئن کئمی اونون اوستونه اِندی. و گؤیدن بئر سس اشئدئلدی: «سن منئم سِودئیئم اوغلومسان؛ سندن چوخ راضی‌یام.»
23عئسا اؤز خئدمتئنه باشلایاندا تخمینن اوتوز یاشیندا ائدی. گومان اولوندوغو کئمی، او، یوسئفئن اوغلو ائدی، یوسئف حِلی‌نئن اوغلو، 24مَتّاتین اوغلو، لاوی‌نین اوغلو، مِلکی‌نئن اوغلو، یَنّای‌ین اوغلو، یوسئفئن اوغلو، 25مَتّاتیانین اوغلو، عاموسون اوغلو، ناحومون اوغلو، اِسلی‌نئن اوغلو، نَگّای‌ین اوغلو، 26مَاَتین اوغلو، مَتّاتیانین اوغلو، سِمعینئن اوغلو، یوسِکئن اوغلو، یودانین اوغلو، 27یوحانانین اوغلو، رِسانین اوغلو، زِروبّابئلئن اوغلو، سِعَلتی‌اِلئن اوغلو، نِری‌نئن اوغلو، 28مِلکی‌نئن اوغلو، اَدّی‌نئن اوغلو، قوسامین اوغلو، اِلمادامین اوغلو، عِرئن اوغلو، 29یوشَعئن اوغلو، اِلئعِزِرئن اوغلو، یورئمئن اوغلو، مَتّاتین اوغلو، لاوی‌نین اوغلو، 30شَمعونون اوغلو، یهودانین اوغلو، یوسئفئن اوغلو، یونامین اوغلو، اِلیاقئمئن اوغلو، 31مِلیانین اوغلو، مِنّانین اوغلو، مَتّاتانین اوغلو، ناتانین اوغلو، داوودون اوغلو، 32یَسّه‌نئن اوغلو، عوبِدئن اوغلو، بوعَزئن اوغلو، سَلمونون اوغلو، نَخشونون اوغلو، 33عَمّئنادابین اوغلو، اَدمئنئن اوغلو، اَرنی‌نئن اوغلو، خِصرونون اوغلو، پِرِصئن اوغلو، یهودانین اوغلو، 34یعقوبون اوغلو، ائسحاقین اوغلو، ائبراهئمئن اوغلو، تِرَخئن اوغلو، ناخورون اوغلو، 35سِروگ اوغلو، رِعو اوغلو، پِلِگ اوغلو، عِبِر اوغلو، شِلَخ اوغلو، 36قِنان اوغلو، اَرفَکشَد اوغلو، سام اوغلو، نوح اوغلو، لَمِک اوغلو، 37مَتوشِلَخ اوغلو، خَنوخ اوغلو، یِرِد اوغلو، مَهه‌له‌لِل اوغلو، قِنان اوغلو، 38اِنوش اوغلو، شِت اوغلو، آدَم اوغلو، آتامیزین اوغلو.
