Me basika na mukanda
Dibuku

Tata ke fidisa Ndinga ya yandi

Yowane vwandaka samuna na yinsi ya kuyuma, mpe ba yufulaka yandi mbala na mbala mambu yina bantu fwana kusala kibeni: kukabula kinkuti, kubaka mbongo ya kuluta ve, kubotola muntu ve. Yandi tubaka masumu ya Elode mpe bawu kotisaka yandi na boloko samu na yawu. Yesu bakaka mbotokolo kintwadi na bantu nyonso, mpe Tata ya yandi tubaka ti yandi kele Mwana ya yandi ya zola.

Tata ya beto ke zonza na vese 22

Kapu 3.

Na mvula ya kumi na tanu ya kuyala ya Sezare Tibele, ntangu Ponse Pilate vwandaka mfumu ya kizunga ya Zude, Elode vwandaka ntinu ya Ngalili, Filipe mpangi ya yandi vwandaka ntinu ya kizunga ya Itule mpe Tilakonite, mpe Lizanyase vwandaka ntinu ya Abilene, ntangu Anase mpe Kayife vwandaka banganga-Nzambi ya ntete, mambu ya Tata ya beto kwizaka na Yowane, mwana ya Zakali, na yinsi ya kuyuma. Yandi kwendaka na kizunga nyonso ya pene-pene ya Yolodani, yandi vwandaka samuna mbotokolo ya kusoba nkadulu samu ti bantu kuzwa mulemvo ya masumu, Yawu kele ya kusonama na mukanda ya mambu ya mumbikudi Esaya: «Ndinga ya muntu mosi ke na kulooka kuna na yinsi ya kuyuma, yandi ke tuba: Beno kubika nzila samu na Mfumu, beno sungika banzila ya yandi. Mabenga nyonso ke fuluka, mpe myongo nyonso ya nene ti ya fyoti ke kukuluka na nsi. Banzila yina kele ya kutengama ke kuma ya kusungama, mpe banzila ya mabulu ke yilama, mpe bantu nyonso ke tala mpulusu ya Tata ya beto.»

Na yina, Yowane zabisaka nkonga ya bantu yina kwizaka samu na kuzwa mbotokolo na yandi: «Beno dikanda ya bampidi! Nani lakisaka beno mutindu ya kukima lufundusu yina ke kwiza? Na yina, beno buta bambuma ya mbote yina ke lakisa ti beno me soba nkadulu. Beno yantika ve na kutuba na ntima ya beno ti: “Beto kele na Abalayami bonso tata ya beto.” Samu mu ke zabisa beno ti Tata ya beto lenda basisa bana samu na Abalayami na matadi yayi. Ntangu yayi, disoka kele na myanzi ya bayinti; konso yinti yina ke butaka ve bambuma ya mbote, ba ke zenga yawu mpe ba ke losa yawu na tiya.»

Nkonga ya bantu yufulaka yandi: «Yinki beto fwana kusala?»

Yandi vutulaka: «Muntu yina kele na bilele zole, bika yandi kabula yawu na muntu yina kele na yawu ve; mpe muntu yina kele na madya, bika yandi sala mutindu mosi.»

Bilokoti-mpaku mpe kwizaka samu na kuzwa mbotokolo, mpe bawu tubaka na yandi: «Mulongisi, beto fwana kusala yinki?»

Yandi tubilaka bawu: «Beno katula ve kuluta yina ba tumisaka beno.»

Basoda mpe yufulaka yandi: «Mpe beto, beto fwana kusala yinki?» Yandi tubilaka bawu: «Beno baka ve mbongo ya muntu na ngolo to na mambu ya luvunu; beno vwanda na kyese na mfutu ya beno.»

Bantu vwandaka na kivingilu, mpe bawu nyonso vwandaka kuyindula na ntima ya bawu kana Yowane yandi mosi lenda vwanda Klisto. Yowane vutulaka bawu nyonso: «Mu ke botika beno na maza. Kasi muntu yina me lutila munu ngolo ke kwiza, mu kele ve ya kulunga na kunyangula basinga ya mapapa ya yandi. Yandi ke pesa beno mbotokolo ya Mpeve ya Longo mpe ya tiya. Yandi me simba na diboko kisalulu ya kupepila; yandi ke sala bunkete ya kisika ya yandi ya kukabudila bambuma, yandi ke yonzika bambuma na kisika yina ba ke bumbaka yawu, kasi ke yoka matiti na tiya yina ba lenda zima ve.»

Na mambu mingi ya nkaka ya kukebisa, Yowane zabisaka Nsangu ya Mbote na bantu. Kasi Yowane nganinaka Elode ntinu samu na Elodiyasi, kento ya mpangi ya yandi, mpe samu na mambu nyonso ya yimbi yina Elode salaka, Elode yikaka dyaka dyambu yayi na mambu nyonso ya nkaka: yandi kangaka Yowane na boloko.

Tata ke bokila Mwana ya yandi Muzolani

Ntangu bantu nyonso bakaka mbotokolo, Yesu mpe bakaka mbotokolo. Ntangu yandi vwandaka samba, zulu kangukaka,

mpe Mpeve ya Longo kulumukaka na yandi na nitu bonso yembe. Mpe ndinga wakanaka na zulu: «Nge kele Mwana ya munu yina mu ke zolaka mingi; ni na nge kele kilengi nyonso ya munu.»

Yesu vwandaka ti na bamvula makumi tatu ntangu yandi yantikaka kisalu ya yandi. Bantu vwandaka banza ti yandi vwandaka mwana ya Yosefi, mwana ya Eli, mwana ya Matate, mwana ya Levi, mwana ya Meleki, mwana ya Yanayi, mwana ya Yosefi, mwana ya Matatiyasi, mwana ya Amose, mwana ya Naume, mwana ya Esli, mwana ya Nangayi, mwana ya Maate, mwana ya Matatiyasi, mwana ya Semeyi, mwana ya Yoseke, mwana ya Yoda, mwana ya Yoanane, mwana ya Lesa, mwana ya Zolobabele, mwana ya Salatyele, mwana ya Neli, mwana ya Meleki, mwana ya Adi, mwana ya Kosame, mwana ya Elemadame, mwana ya Ere, mwana ya Yeswa, mwana ya Elyezele, mwana ya Yolime, mwana ya Matate, mwana ya Levi, mwana ya Simewone, mwana ya Yuda, mwana ya Yosefi, mwana ya Yoname, mwana ya Elyakime, mwana ya Melea, mwana ya Mena, mwana ya Matata, mwana ya Natane, mwana ya Davidi, mwana ya Yisayi, mwana ya Obede, mwana ya Bowaze, mwana ya Salemone, mwana ya Nasone, mwana ya Aminadabe, mwana ya Amine, mwana ya Arni, mwana ya Esome, mwana ya Falese, mwana ya Yuda, mwana ya Yakobi, mwana ya Izaki, mwana ya Abalayami, mwana ya Tela, mwana ya Nawole, mwana ya Selunge, mwana ya Lewu, mwana ya Pelenge, mwana ya Ebele, mwana ya Sela, mwana ya Kenane, mwana ya Alepakesade, mwana ya Seme, mwana ya Nowa, mwana ya Lameke, mwana ya Metusela, mwana ya Enoke, mwana ya Yelede, mwana ya Maalalele, mwana ya Kenane, mwana ya Enose, mwana ya Sete, mwana ya Adami, mwana ya Tata ya beto.