Jisu na Bakama Potroi Rwan Ding Koune
Peter na zingpha pum na khatchale namnu make, atiyeda Jisu om chong paan bina ngaa taswang khak namnu briakpina, maanna Jisu khou se swak lang bathaiye. Ri kasia khutnu manpa khat ding takhap tin rwe. Badam lou bacham manpa khat ding in bakhok khouna lat sulu thangluga ani Pa om ngam paan bina baom noh nganne, haga aiya hiaknu rwan ga balung pwan rwe. Levi na baom ramkhai khomnu riak ding tasaan swake.
5 1Ni khat, mi khangna ani Pa om chong ngaisu langna Bating sui bwat ong ngaaknu kaan bi, Jisu na Gennesaret tuipui paan bi han ngaake. a a v1 Gennesaret tuipui dinu ga Galilee tuipui om meng khat danga gaye. 2Maanna tuipui paan bi li pat ni han ongnu mu rwe; ngaa namnu mi nunna li ga thangsialuga bani kalang kasin ong ngaake. 3Jisu na li pat ni lak pina Simon om li bi khutluga, tui paan khouna titcha pi santa lang bakhou rinne, haba nung bi badung taluga li chung bina mi khang ding bachu thang ngaake.
4Maanna kabia thang dam nung bi, Simon khou rinne, “Tui thwei la santa thouluga, ngaa nam langna naom kalang bing ga saam ta ngo.”
5Simon na katake, “Bachuthangnupa, anina zingpha pumna naat toga le pot khatcha nale nam lan rwe. Atiyeda Nachong paan bina, eina kalang bing ga saam ta lune.” 6Hadanga tonu kaan bi, banina ngaa taswang khak namluga bani kalang bing ga raan thou drwe. 7Banina li babaang la ongnu badam lou bacham rwan ding pi sa thang langna kut danga kou rwe; bani hungluga li rwei ga pi sip thangnu briakpina li rwei ga imphum ta thou drwe. 8Haga munu kaan bi, Simon Peter na Jisu om kekhok bi kuntaluga rinne, “Pukraangba, ei khouna thangsia ta ngo, balangbe ei noh mi khat gaye!” 9Balangbe banina namnu ngaa bing langna, maan khatle maan le diga ongnu nun lu chung bi loh lonuna sip rwe,
10hadanga Zebedee sa kapaisa James le John, Simon om badam lou bacham rwan le danga sip rwe. Jisu na Simon khou rinne, “Kachi mako; atun khouna nangna mi nun ding nam lune.”
11Atibriakpina banina bani li bing ga tui paan la kai swakluga, pot bingza ga thangsialuga, Banung sui drwe.
Manpa Khat Pi Bathiang Thangnu
12Jisu na nampui pat ni lak pi ongnu kaan bi, bapum ding naanu karit karitnu sipka amnu manpa khat hung phaang rwe. Jisu ding munu kaan bi, maan mai kum talei la kuntaluga kalumga rinne, “Pukraangba, Nang bathai nge dabe, Nangna ei ding pi bathiang thang ngamne.”
13Jisu na Bakut ka balaan swakluga maan ding lou thangga rinne, “Ei bathaiye. Bathiang ongro.” Haba kahan bina naanu ga maan khouna sa drwe.
14Jisu na maan ding pakhatcha khou le rin swak mako diga zathang rwe, “atiyeda seluga, napum bahak tako khou pi muwo, khatle nating to bathiang thangnu langna, bani khou sake toga Moses na zathang pi thangnu pot bing ga katro.”
15Atiyeda Balang bi thei chang thou dam ngaake; mi khang pui gana Bating chong ngaisu langna khatle bani naanu bing khouna sa lang hung sip rwe. 16Atiyeda Jisu na tutna rim rimnu riak bing la seluga kalum ngaake.
Pa na Noh Kok Thang Ngamnu Ngam
17Ni khat Maanna bachu thangnu kaan bi, Galilee om inmwan bing, Judea khatle Jerusalem bina hungnu Pharisee rwan le chongtan bachuthangnu rwan badung ong ngaake. Atiga naanu nun ding pi sa thang lang ani Pa om ngam habei ga ong ngaake. 18Haba kaan bi, manpa kasemna pum baang thinu manpa khat ria bi phun hungluga, maan ding insung la khut thangga Jisu meithaan bi thang lang chwan ga ngaake. 19Mi khang briakpina maan ding insung la khut thang lang lampui mu ngamlanruga, banina in chung la kaluga in chung ga rai satluga, maan ding baria le diga Jisu meithaan bi, taqwat bina basaam ta rwe.
20Jisu na bani balumsanu munu kaan bi, Maanna rinne, “Baan, nanoh bing ga nang khou kok thang rwe.”
21Chongtan bachuthangnu rwan le Pharisee rwanna chong kae thou rwe, “Rikrwang ding rin basiatnu heiba manpa tubo? Rikrwang khatchana makka tudannuna noh kok thang ngamgabo?”
22Bani thingnu ga theiluga, Jisu na bani khou katake, “Nani sung bi pa-aam lang kakhan ongnubo? 23‘Nanoh bing ga nang khou kok thang rwe’ diga rinnu le ‘Lon thouluga sero’ dinu le ingaana bai inkubo? 24Atiyeda Misa Sa Kapaisa na talei chung bi noh kok thang lang ngam amnu nani theinu langna”—Maanna pum baang thinu manpa khou rinne—“Eina nakhou rinnuwe, lon thouluga, naria ka louluga, nain la sero.”
25Haba kahan bina maan bani meithaan bi lon thouluga, baria ka louluga, ani Pa ding lwat liannu ding swanga bain la se drwe. 26Bani mi nun ga loh lonuna sip rwe; bani kachinuna sipluga ani Pa ding lwat liannu ding swanga rinne, “Anina chini loh lonu bing ga mu rwe.”
Jisu na Levi Ding Koune
27Hei bing nung bi, Jisu na insaang la swakluga, ramkhai khom riak bi Levi diga meng amnu ramkhai khomnu manpa khat badung ongnu ding mu rwe. Jisu na maan khou, “Anung suiro,” diga rinne.
28Atibriakpina Levi na lon thouluga, pot bingza ga thangsialuga, Banung sui drwe. 29Haba nung bi Levi na baom in bi balou pui khat Jisu lang thaisaak rwe, atiga ramkhai khomnu rwan le mi kasem mi khang pui gana bani le diga sa in riak pi badung ong ngaake. 30Atiyeda Pharisee rwan le bani chongtan bachuthangnu rwanna Baom potroi rwan khou tu tu tam tamga rinne, “Nanina ramkhai khomnu rwan le noh mi nun le diga pa-aam lang sa in bacham ongnubo?”
31Jisu na bani khou katake, “Pum sanu mi nun lang kathiam bathaang maake atiyeda naanu nun langbe bathaang amme. 32Ei ririak senu mi nun ding kou lang hungnu make atiyeda noh mi nun ding sung le langna kou lang hungnuwe.”
Kalumsanu Lang Bi Tangai
33Banina Bakhou rinne, “John om potroi rwanna tutna kalumsanga kalumme, hadanga Pharisee rwan om potroi rwan le, atiyeda Naom potroi rwanna sa in ongnuwe.”
34Jisu na bani khou rinne, “Tazwanpa baan rwan le diga tazwanpa ong raangga nanina bani ding kalumsan thang ngamgabo? 35Atiyeda tazwanpa bani khouna lou thangnu ni bing ga hunglune, atiga haba ni bing bi, banina kalumsanlune.”
36Maanna bani khou paratnu khat le rinne, “Pakhatchanale pwan kathan khat khouna phot ka kailuga pwan tut khat bi phot thang kale make. Atiye dabe, maanna pwan kathan ding re basiatlune, khatle pwan kathan khouna kainu phot ga pwan tut le danga ong thang laye. 37Pakhatchanale drakha tui kathan ding zan mun khao tut bi thang make; atiye dabe drakha tui kathanna zan mun khao raan ding ga pi pwak baklune, drakha tui ga lwang sate khatle zan mun khao ga le braanlune. 38Mak, drakha tui kathan ga zan mun khao kathan bi thang lang nge. 39Khatle pakhatchanale drakha tui tut innu nung bi kathan ding bathai make, balangbe maanna, ‘Tut ga sanuwe,’ diga rinnuwe.”