Kajadian 42 FHB Father's Heart Bible™

42 ¹Waktu Yakub uninga yen di Mesir aya gandum, tuluy ngalahir ka putra-putrana, “Ku naon maraneh silih pelong bae?” ²Saurna deui, “Bapa ngadenge beja, di Mesir aya gandum. Geura arindit ka ditu, meuli keur urang, supaya urang harirup, ulah nepi ka paraeh.” ³Tuluy dulur-dulur Yusup nu sapuluh arindit ka Mesir seja meuli gandum. ⁴Tapi Benyamin, adi Yusup, ku Yakub teu dibawakeun ka dulur-dulurna, bawaning sieun manawi aya karerepet. ⁵Jadi putra-putra Israil teh milu jeung nu rek mareuli gandum sejenna, da di tanah Kanaan keur paceklik. ⁶Yusup teh harita keur jadi pangagung di eta nagri, anu ngatur dagang gandum ka sakumna rahayat. Dulur-dulurna daratang tuluy sarujud ka anjeunna, bari nyuuh kana taneuh. ⁷Yusup teu kolemong ngenal ka dulur-dulurna, tapi api-api teu wawuh sarta nyarios tarik: “Ti mana maraneh teh?” Tembalna, “Ti tanah Kanaan, seja meuli bahan dahareun.”

⁸Yusup wawuheun ka dulur-dulurna, tapi maranehna henteu wawuheun ka anjeunna. ⁹Yusup inget kana impian-impianana bareto ngeunaan maranehna, tuluy ngalahir, “Maraneh teh mata-mata! Daratang ka dieu teh rek nalengteng bagian-bagian anu ripuh di ieu nagri.”

¹⁰Tapi tembalna, “Sanes kitu, juragan, abdi sadaya teh sumping seja mésér bahan tedaeun. ¹¹Abdi sadaya teh putra-putra ti hiji bapa; abdi sadaya jalma jujur. Abdi sadaya mah tacan kungsi jadi mata-mata.”

¹²Tapi waler anjeunna, “Lain! Maraneh teh daratang rek nalengteng bagian-bagian anu ripuh di ieu nagri.”

¹³Tembalna, “Abdi sadaya teh dua belas dulur, putra ti hiji bapa di tanah Kanaan. Nu bungsu ayeuna keur jeung bapa, ari nu saurang deui geus euweuh.”

¹⁴Saur Yusup ka maranehna, “Enya cara ceuk kami tadi: maraneh teh mata-mata. ¹⁵Ieu cara kami nyoba maraneh: demi hirupna Piraon, maraneh moal diidinan ninggalkeun ieu tempat, kajaba lamun adi maraneh nu bungsu geus datang ka dieu. ¹⁶Jig saurang ti maraneh indit mawa adi maraneh, ari sesana kudu cicing di panjara, supaya katara bener henteuna omongan maraneh. Lamun teu bener, demi hirupna Piraon, maraneh teh enya mata-mata.” ¹⁷Tuluy maranehna kabeh dikerem babarengan tilu poe lilana. ¹⁸Dina poe nu katilu Yusup ngalahir ka maranehna, “Lampahkeun kieu, maraneh bakal harirup, karana kami teh sieun ku Rama urang. ^a a v18 Yusup nyebut jenengan Allah anu dipikasieunna — nya eta Rama urang — jadi saksi kana kasatiaanana nu saestu najan keur nyamur di hareupeun dulur-dulurna. Rama anu panangana-Na nyumput geus nungtun unggal lengkah dina lalakon Yusup teh nya eta Rama anu sarua disembah ku dulur-dulurna. ¹⁹Lamun enya maraneh jujur, sina aya saurang dulur maraneh nu tinggal di panjara di dieu, ari nu sejenna geura arindit, mawa gandum pikeun ngaleungitkeun paceklik di imah maraneh. ²⁰Tuluy bawa adi maraneh nu bungsu ka kami, supaya tetela bener omongan maraneh, jeung maraneh moal paraeh.” Tuluy ku maranehna dilampahkeun kitu.

²¹Tuluy pada ngomong papada batur, “Urang teh enya salah ka adi urang, sabab urang geus narenjo kasieun jiwana basa manehna melas-melis ka urang, ari urang arembungeun ngadenge. Nya ku lantaran kitu ieu karerepet teh tumiba ka urang.” ²²Ruben nembalan, “Lain ceuk kami ge, maraneh ulah migawe dosa ka budak teh? Tapi maraneh arembungeun ngadenge. Ayeuna getihna dipundut tanggung jawabna.” ²³Maranehna teu nyarahoeun yen Yusup ngarti kana omonganana, sabab aya juru basa nu nganteur omonganana. ²⁴Anjeunna ngejat ti maranehna tuluy ceurik, geus kitu balik deui nyarios ka maranehna. Tuluy nyandak Simeon ti maranehna sarta diborgol hareupeun maranehna.

²⁵Yusup marentah sangkan karung maranehna dieusian gandum, perakna masing-masing dibalikkeun deui kana karungna, sarta dibere bekel keur di jalan. Tuluy kitu dilampahkeunana ka maranehna. ²⁶Tuluy gandumna dimuat kana kaledena, geus kitu arindit ti dinya. ²⁷Di tempat eureun, aya saurang nu muka karungna rek mere kadaharan kaledena, katingali perakna aya di dinya, dina sungut karungna. ²⁸Pok ngomong ka dulur-dulurna, “Perak kami dibalikkeun deui— tuh, aya dina karung kami!” Hatena jadi ngenes; bari ratug awakna, pada ngomong papada batur, “Naon nu geus dipidamel ku Rama urang ka urang teh?” ^b b v28 Ieu panggeuing nu pangheulana ka para dulur kana damelna panangan Rama — sanajan keur sieun ge, maranehna ngarasa yen ieu teh lain kabeneran wungkul. Rama kalawan sabar nungtun maranehna mulang ka imah ngaliwatan kurnia Yusup nu nyamur. ²⁹Maranehna narepi ka Yakub, bapana, di tanah Kanaan, tuluy nyaritakeun sagala rupa nu geus karandapanana: ³⁰“Eta jalmi anu jadi pangagung di eta nagri nyarios tarik ka abdi sadaya, sarta nganggap abdi sadaya mata-mata nagri. ³¹Tapi ku abdi sadaya diwalon, ‘Abdi sadaya teh jalmi jujur; abdi sadaya mah teu kungsi jadi mata-mata. ³²Abdi sadaya teh dua belas dulur, putra ti hiji bapa. Nu saurang geus euweuh; ari nu bungsu ayeuna keur jeung bapa di tanah Kanaan.’ ³³Eta jalmi anu jadi pangagung di eta nagri nyarios ka abdi sadaya, ‘Ieu cara kami nyaho maraneh jujur: tinggalkeun saurang dulur jeung kami, bawa gandum keur ngaleungitkeun paceklik di imah maraneh, tuluy geura arindit. ³⁴Bawa adi maraneh nu bungsu ka kami, supaya kami nyaho yen maraneh teh lain mata-mata tapi jalma jujur. Geus kitu dulur maraneh bakal dibalikkeun deui, jeung maraneh meunang dagang di ieu nagri.’”

³⁵Waktu ngarosongkeun karungna, masing-masing manggih buntelan perakna aya dina karungna sewang-sewangan. Barang narenjo buntelan perakna, maranehna jeung bapana jadi sarieuneun. ³⁶Yakub, bapana, ngalahir ka maranehna, “Maraneh teh geus nyababkeun kami leungiteun anak: Yusup geus euweuh, Simeon geus euweuh, ayeuna rek mawa Benyamin deui. Kabeh ge ngarempak ka kami!”

³⁷Ruben unjukan ka bapana, “Pupus bae dua anak abdi, upami Benyamin teu kenging dicandak deui ka Ama. Pasrahkeun ka abdi, tangtos ku abdi dicandak deui ka Ama.”

³⁸Tembal Yakub, “Anak kami ulah dibawa ka ditu, sabab lanceukna geus maot, ngan manehna hiji-hijina nu nyesa. Lamun manehna nepi ka cilaka di jalan nu ku maraneh rek diliwatan, tangtu maraneh bakal nyababkeun kami nu geus huis ieu asup ka kubur bari nalangsa.”