Oreet ne Koba Jerusalem
Komosta age tugul koboorun kateunet kole matogoste tai, ak konam maotindet eunekyik ineegei ak pireneetap Paulo. Kole Paulo kagochopchigei kome eng' olooto. Eng' Jerusalem, kole chumbeetap Hekaluut kagoip ineendet Yunanindet oriit, kobar ineendet rubeeny po kome, kotom koisto asigarik ineendet.
21 1Kingo kakiwirtoegei kong'etee icheek, keba eng' melisyek keit kat Kos, ak eng' peetuut ne isubu keba Rhodes, ak kong'etee olooto keba Patara. 2Kingo kinyoor melisyek ne kat katoi Foinike, kechut eng' melisyek ak keba. 3Kingo kigeer Kipro ak keibakta eng' kaataam, keba Syria ak kelandae eng' Tyro, ole kimachei melisyek koisto tuguuk. 4Kinyoor kasubik eng' olooto ak kemeny peetuusyek tisap. Komwachi Paulo kotokyin Kabuuset ne Tiliil kole matogoste Jerusalem. 5Kingo kagogees peetuusyekyok eng' olooto, keng'eet keba, ak kiunech icheek tugul kobooto kwonyiikwak ak lagoguk kot koit saang'utap nganaseet. Kigutunyech eng' komostap araraita ak kesaa, 6ak keyaktogei. Yeityo kechut eng' melisyek, ak koweektagei icheek koonnywa.
7Kingo kagogees walendanyok kong'etee Tyro, keit Ptolemai, kegat tupcho, ak kemeny peetuut agenge kobooto icheek.
8Eng' peetuut ne isubu keng'eet keba Kaisarea ak kiit kootap Philipu logoiywandet, agenge eng' tisap, ak kemeny kobooto ineendet. 9Ki tinyei ineendet tiibiik ang'wan che tomo kitun, che maotenso. 10Ye kita kemeny eng' olooto peetuusyek che chaang', konyo maotindet age ne kiguure Agabo kobun Judea.
11Konyoonech, konam pireneetap Paulo, korat keelyekyik ak eunekyik, ak kole, “Mwaei Kabuuset ne Tiliil kou ni: Keratei Yahudik che mi Jerusalem chiito ne tinyei pireneet ni ko uu nooto, yeityo koipchi eunegap Pororyosyek.”
12Kingo kigas niito, kesoom Paulo echeek ak piigap olooto kole motogos Jerusalem. 13Kowol Paulo kole, “Amune oriirye ak oteran muguleldanyu? Kaanyalalit anee ma keratwo kityo, ago agot amee Jerusalem agobo kainetap Kiptaiyat Jeso.” 14Amu ma iyan ineendet, kesisye ak keele, “Ingoyaksei mageetap Kiptaiyat.”
15Kingo kagoba peetuusyechooto, kiyaegei ak ketogoste Jerusalem. 16Kiba kobooto echeek kora alak che po kasubik che punu Kaisarea, koibei ole kemeny kap Mnason, Kiproindet ak kasubindet ne po tai.
17Kingo keit Jerusalem, kitaachech tupcho eng' poiboiyet. 18Eng' peetuut ne isubu koba Paulo kobooto echeek kogeer Jakobo, ak ki mi poisyek tugul. 19Kigat icheek, yeityo komwachi agetugul ko agenge tuguuk che ki yai Kwandanyo among Pororyosyek eng' poisyennyi. 20Kingo kagas niito, kolas Kwandanyo, yeityo komwachi koleenji, “Igeer, tupchennyo, eliphuusyek che chaang' che po Yahudik che kaiyan, ak koama tugul ng'etkong' agobo ng'atuutik. 21Kigemwachi icheek kole inetei Yahudik tugul che mi among Pororyosyek kole kobagakta Musa, imwachi kole matmuratan lagoguk ak matisup pitonwekyok. 22Keyai nee anyun? Kogasei iman kole kaginyo. 23Yai anyun kiit ne kimwachin. Kimi echeek murenik ang'wan che tinyei sioot. a a v23 Ki konam murenichu siootap Nasiri — kayomiset ne po sait ne mining' ne kagogesei ye kicher metit ak koigochin kagoochinet eng' Temple. 24Ib murenichu, ianyinygei kobooto icheek, ak ilin libanetkwak si kocher metowekwak. Yeityo kongen chii tugul kole ng'aleek che kimwaei agobo inyee ko yomotin, ak kole iriip inyee ineegei ng'atuutik. 25Agobo Pororyosyek che kaiyan ko, kagikasir rwoogennyo, kole kobagakta amitwogik che ki kigoochi tapotapisik, ak korotiik, ak tiong'ik che ki kibir, ak chorset.”
26Koname Paulo anyun murenichooto, ak eng' peetuut ne isubu, kingo koanyinygei kobooto icheek, koit Temple, komwa sait ne kagogeskei peetuusyegap katiliilet ak ne koigochinee kagoochinet agetugul ko agenge.
Kinam Paulo eng' Temple
27Ye kita kogeskei peetuusyek tisap, kogeer Yahudik che punu Asia ineendet eng' Temple, ak koising'ei piik tugul koboldos, ak koname, 28kowaach kole, “Murenik che po Israel, otoretech! Chi ni ko chiito ne netei piik tugul komoswek tugul ne teren piikyok, ak ng'atuutik, ak oldani. Ak agot koip Yunanik eng' Temple, ak komurwon oldani ne tiliil.” 29Amu ki kigeer icheek eng' tai Trophimo ne po Efeso kobooto Paulo eng' nganaseet, kobwaati kole koip Paulo Trophimo Temple.
30Komong' nganaseet komugul; kolabat piik tuwai, konam Paulo, ak kola koistoe saang' eng' Temple, ak koma tyanit koger kurgotik. 31Ye kita kocheeng' kobar ineendet, koit ng'olyoot taiyandetap asigarik kole kagomong' Jerusalem komugul. 32Koma tyanit konam asigarik ak taiyanigap pogol, ak koamdaati ole mi icheek. Kingo kogeer taiyandet ak asigarik, komang'une piik kobir Paulo. 33Konyo taiyandet, konam ineendet, korwoogchin kole keratei sirimwek aeng', yeityo koteebe kole ng'oo ineendet ak ne yai nee. 34Kowaach piik alak kiit age, alak kiit age. Kingo mata komuuch konai iman amu polateet, korwoogchin kole keip Paulo kootap asigarik. 35Kingo koit Paulo lang'eiywot, koip asigarik ineendet amu koroomnatetap piik, 36amu kosupkei piik, kowaach kole, “Istoe ineendet!”
Kong'alaalji Paulo Piik
37Ye kita keip Paulo kootap asigarik, koteebe taiyandet kole, “Tos amuuchi amwaun kiit?” Kowol kole, “Tos ingen inyee Kiyunaniit?”
38Tos ma ii inyee Misirindet ne ki itoi ng'etunet eng' tai ak koindochi piik che bareen eliphuusyek ang'wan koba surkwen?
39Kowol Paulo kole, “Aa Yahudyot anee, ne po Tarso ne mi Kilikia, chiitap nganaseet ne ma ming'in. Asoomin ale, chamji ang'alaalji piik.”
40Kingo kigoochin chameet, kotonon Paulo eng' lang'eiywot ak koboorchi piik eunnyi. Kingo kobata silem ne oo, kong'alaalji icheek eng' ng'aleegap Hebranik: