Uhambo Olusingisa EYerusalem

Isitophu ngasinye sizisa isilumkiso sokuba angaqhubeki, umprofeti athi azibophe izandla ngombhinqo kaPawulos. UPawulos uthi ukulungele ukufela khona. EYerusalem indimbane etempileni, icinga ukuba ungenise umGrike ngaphakathi, imbetha iphantse ukumbulala ngaphambi kokuba amajoni amrhole amkhuphe.

Isahluko 21.

Sakuba sizikhwebule kubo, sasuka saqonda eKos, saza ngengomso saya eRodes, sisuka khona saya ePatara. Safumana inqanawa eyayiwelela eFenike, sangena kuyo, sasuka. Sayibona iSipro, sayishiya ngasekhohlo, sahamba sisiya eSiriya, safika saphumela eTire, apho inqanawa yayiza kuthulula khona impahla yayo. Sabafumana khona abafundi, sahlala iintsuku ezisixhenxe. Ngokuthetha ngoMoya oyiNgcwele babesithi kuPawulos anganyatheli eYerusalem. Lakuba lugqityiwe ixesha lethu apho, saphuma sahamba, bonke bephelekelela nathi ukuphuma komzi, benabafazi nabantwana babo. Saguqa ngamadolo elunxwemeni sathandaza, Sabulisana. Sandula ke sangena enqanaweni, babuyela ekhaya bona.

Sakuluqukumbela uhambo lwethu lwaselwandle sivela eTire, safika ePtolemayi, sababulisa abazalwana, sahlala nabo usuku olunye.

Ngengomso sahamba saya eKesareya, sangena endlwini kaFilipu umvangeli, omnye waba basixhenxe, sahlala naye. Yena wayeneentombi ezine ezingaganiweyo, eziprofetayo. Sithe sisahlala apho iintsuku ezininzi, kwehla umprofeti othile egama linguAgabho, evela elakwaYuda.

Weza kuthi, wawuthabatha umbhinqo kaPawulos, wabopha iinyawo nezandla zakhe, wathi: “Utsho ngolu hlobo uMoya oyiNgcwele, uthi: amaYuda aseYerusalem aya kumbopha ngolu hlobo umnini wombhinqo lo, andule ke amnikele ezandleni zeentlanga.”

Sithe ke sakukuva oku, thina kunye nabemi baloo ndawo, sambongoza uPawulos ukuba anganyuki aye eYerusalem. Waphendula uPawulos wathi: “Yintoni na le nto nililayo, niyityumza intliziyo yam? Mna sendikulungele kungekhona ukubotshwa kuphela, kodwa nokufa eYerusalem ngenxa yegama leNkosi uYesu.” Wathi akubon' ukuba akavumi ukweyiselwa, sathi cwaka, sathi: “Makwenziwe okuthandwa yiNkosi.”

Emveni kwezo ntsuku salungisa saza senyuka saya eYerusalem. Baye behamba nathi abanye abafundi baseKesareya, basisa kuMnason, umntu waseSipro, umfundi wasekuqaleni, esasiza kuhlala naye.

Sathi sakufika eYerusalem, basamkela ngovuyo abazalwana. Ngomhla olandelayo uPawulos wangena nathi kuYakobi, aye ekho onke amadoda amakhulu. Wababulisa, waza wabaxelela ngabanye ngabanye izinto awazenzileyo uBawo wethu phakathi kweentlanga ngalo ulungiselelo lwakhe. Bathe ke bakukuva oku, bamdumisa uBawo wethu, baza bathi kuye: “Uyabona, mzalwana, zingamawaka angakanani na amaYuda akholiweyo, kanti onke anekhwele ngomthetho. Aye exelelwe ngawe ukuba ufundisa onke amaYuda aphakathi kweentlanga ukuba amshiye uMoses, uwathi makanganqumli abantwana bawo, anganyatheli emasikweni ethu. Ngoko ke singenza ntoni na? Aya kuva ngokuqinisekileyo ukuba ufikile. Ngoko yenza oko sikuxelelayo. Sinamadoda amane abophelelwe sisibhambathiso. ^a Thabatha la madoda, uzihlambulule kunye nawo, uwahlawulele indleko yawo ukuze achebe iintloko zawo. Bandula ke bonke ukwazi ukuba akukho nyaniso kwiindaba abazive ngawe, nokuba nawe ngokwakho uyawugcina umthetho. Ke ngazo iintlanga ezikholiweyo, sele sibhalile isigqibo sethu: ukuba mazidele ukutya okubingelelwe izithixo, negazi, nezinto ezikrwitshiweyo, nombulo.”

Waza ke uPawulos wawathabatha la madoda, ngengomso wathi akuba ezihlambulule kunye nawo, wangena etempileni, ebhengeza ukuba iintsuku zokuhlanjululwa ziya kuzaliseka nini, kwenziwe umnikelo ngamnye wawo.

UPawulos Ubanjwa ETempileni

Zithe iintsuku ezisixhenxe sezizakuphela, amaYuda aphuma elaseAsiya ambona etempileni, aziphehlelela zonke izihlwele, ambamba, edanduluka esithi: “Madoda akwaSirayeli, sincedeni! Lo ngulaa mntu ufundisa bonke abantu kwiindawo zonke echasene nohlanga lwethu, nomthetho, nale ndawo. Phezu koko ke uze namaGrike etempileni, wayenza inqambi le ndawo ingcwele.” Kaloku babekhe bambona uTrofimo waseEfese enoPawulos emzini, baba kukho into yokuba uPawulos umngenise etempileni.

Wonke umzi waba sisiphithiphithi, bagidimelana abantu, bambamba uPawulos, bamtsalela phandle kwetempile, aza kwaoko amasango avalwa. Bathe befuna ukumbulala, lafika kumphathi-mkhosi welikhulu ilizwi lokuba iYerusalem iphela isesidubedubeni. Kwaoko wathabatha amasoldati nabathetheli-makhulu, wehla waya kubo ngesiqhushumba. Bathe bakubona umphathi-mkhosi namasoldati, bayeka ukubetha uPawulos. Weza umphathi-mkhosi, wambamba, wawisa umthetho ukuba abotshwe ngemixokelelwane emibini, waza wabuza ukuba ungubani na, wenze ntoni na. Phakathi kwesihlwele abanye babedanduluka besithi oku, abanye besithi okuya. Wathi akungabi nako ukwazi okuyinyaniso ngenxa yengxokozelo, wawisa umthetho ukuba uPawulos angeniswe enqabeni. Wathi uPawulos esakufika ezinyukweni, kwafuneka ukuba amasoldati amthwale ngenxa yogonyamelo lwesihlwele, kuba ingxokolo yabantu yayilandela, idanduluka isithi: “Msuseni!”

UPawulos Uthetha Nesihlwele

Uthe uPawulos esele eza kungeniswa enqabeni, wathi kumphathi-mkhosi: “Ndingathetha into kuwe na?” Wathi yena: “Uyazi na isiGrike?

Akunguwe na umYiputa lowo waziphehlelayo izidubedube ngaphambili, wakhokelela amawaka amane ababulali entlango?”

Waphendula uPawulos wathi: “Mna ndingumYuda, waseTarso waseKilikiya, ndivela kumzi ongengongelutho. Ndiyakubongoza, ndivumele ndithethe ebantwini.”

Esamvumele, uPawulos wema ezinyukweni, waqhweba abantu ngesandla sakhe. Yakufika incwadi encwina, wathetha nabo ngesiHebhere, esithi: