Job 3

3 ¹Chiwui thili Jobna khamor makāda awui pharāthang zimiksholi khonshiya. ²Ana hānga: ³"Ili pharāthang zimiksho chi shimānranu, kala 'Mayarnao akha vaihaira' da kahāng ngayā chila shimānranu. ⁴Chithang zimiksho chi tangkhamang ngasāranu! Atungshong khalei Varena chi maphaaranu, kala kahorna chiwuitungli mahormiranu. ⁵Tangkhamang eina tangmangting kahaina chi khuiranu; muiyā akhana chiwuitungli pamsāranu; zimikshowui tangkhamangna chi sāmachitranu. ⁶Chithang ngayā chi tangkhamang kashāna tukkhuiranu; zingkumwui zimiksho alungli maringphāranu, kala kachāng alungli mashānkhuiranu. ⁷Mha, chithang ngayā chi kashum ngasāranu; chiwuili khamathān khavao akha maraaranu. ⁸Leviathanli ngakarthui khavai ngavaiser, zimiksho khonkashe bingna chi khonshiranu. ^a a v8 Rāthang okathuili, khonshi kasā mibingna ringkaphā kala makhayā zimikshobingwuitungli pangshap lei da miyurna shitkasanga. ⁹Chiwui ngathorwui sirābing tangmangtingranu; kahorwui vang chihānda maphaaranu, kala ngathorwui zingrān khare matheilakranga, ¹⁰khikhalajila china ishava̱wui naopamwui khāmong mashungmana, kala imikwui eina kakhanang mathummana. ¹¹Khisāda I kapharā tharan mathimana, naopamwui eina shokta thivāhaokhala? ¹²Khisāda ili samphang khavai khukti leikhala, lah I na̱ shiman khavai sungthei leikhala? ^b b v12 Rāthang Near East ramli, angangnao akha achinangarāwui khuktili haipam hi nao chi khuisangwui khangarān otna. ¹³Kaja ara I chingri kahaili ngayaipamhaora; I pida ngasāmkhuipaira, ¹⁴athum khalattawui vang ramchobing sākahai okathuiwui awungabing kala machinmebing eina ngasoda, ¹⁵lah sinā kalei, athumwui shim lupāna pemda kahai wungnaobing eina ngasoda ngasāmkhuipaira. ¹⁶Lah khisāda I chifali pharātāda thikahai nao, kahor matheilak angangnaobing thāda masāmala? ¹⁷Chili makaphābingna sākashi kasā vānhaora, kala chili vānkahaibingna ngasāmkhuipaira. ¹⁸Narkahaibing hupta reisanghaira; athumna rao thaokazatawui khon manganāluimara. ¹⁹Kateo kala khare chipali ngaraichada leihaira, kala raonao awui akhavāwui eina ningkhānhaira. ²⁰Khisāda ringshāt khaleia mili kahor mikhala, kala ning kakhā khaleiali kharing mikhala, ²¹Khavābingna marākahai kathili kaphāda, ngathum kahai lanli kayākha reimei chi chikhavai chui, ²²khavābingna chikhur samphang tharan mathānda ngalongkā kala ringphāhaobing? ²³Khisāda awui shongfa ngathum kahai, Varena kuinamhaida khaleia mipāli kahor mikhala? ²⁴Kaja iwui sitkhamahui iwui kashakazāwui rida rā, kala iwui khangahui tara̱ thāda heishoka. ²⁵Kaja ina khangacheea ot chi iwuitungli rāhaira, kala ina ngacheeda chi ili rāza̱haira. ²⁶Ina reisang maleimana, va̱ri maleimana, ngasām maleimana; kalākashi maningla leihaira."