約伯記 3

3 ¹之後,約伯開口咒詛自己出世嗰日。 ²佢話: ³「願我出世嗰日消滅, 願嗰晚——講『有個男仔懷咗胎』 嗰晚——都一樣。 ⁴嗰日——願佢變成黑暗! 願天上嘅神唔理佢,亦都唔畀光照喺佢身上。 ⁵願黑暗同幽暗霸咗佢;願密雲籠罩 佢;願白晝變黑,令佢驚惶。 ⁶嗰晚——願濃密嘅黑暗抓住佢;願佢唔得同一年裏面嘅日子一齊歡喜, 亦都唔算入月份裏面。 ⁷係啊,願嗰晚荒涼冇生育; 願嗰晚聽唔到歡呼嘅聲。 ⁸ 願嗰啲咒詛日子嘅人咒詛佢——就係嗰啲隨時準備激動利未亞坦嘅人。 ^a a v8 古代嘅人相信,以咒詛為業嘅人有能力去主宰吉利同唔吉利嘅日子。 ⁹願佢黎明嘅星宿都變黑; 願佢盼望有光都搵唔到,亦都永遠見唔到清晨最初嘅曙光, ¹⁰因為佢冇閂實我阿媽子宮嘅門, 亦都冇將患難喺我眼前遮住。 ¹¹點解我唔喺出世嘅時候就死咗, 一離開子宮就斷氣呢? ¹²點解有膝頭接住 我,又有乳房畀我食奶呢? ^b b v12 喺古代近東,將初生嬰兒放喺親屬嘅膝頭上,係正式接納呢個小孩嘅儀式。 ¹³如果唔係,我而家就安安靜靜咁瞓緊喇;我就會沉睡,得享安息, ¹⁴同世上嗰啲曾經為自己 起荒廢陵墓嘅君王同謀士一齊, ¹⁵又或者同嗰啲擁有黃金、 將白銀裝滿屋嘅王子一齊。 ¹⁶又或者,點解我唔係一個埋咗喺土裏面嘅死胎, 好似嗰啲從來見唔到光嘅嬰孩咁呢? ¹⁷喺嗰度,惡人唔再狂暴, 喺嗰度,疲乏嘅人得享安息。 ¹⁸被擄嘅人一齊得享安逸; 佢哋唔再聽到監工嘅聲音。 ¹⁹無論係卑微嘅定係尊貴嘅,喺嗰度都係一樣, 奴隸都脫離咗主人得自由。 ²⁰點解要將光賜畀受苦嘅人, 將生命賜畀心裏面苦澀嘅人呢? ²¹佢哋渴望死亡,但死亡又唔嚟, 佢哋掘死亡,仲過於掘埋藏嘅財寶, ²²佢哋搵到墳墓嘅時候,就歡喜到跳起,快樂到極? ²³點解要將光賜畀一個前路茫茫、 畀神四面圍住嘅人呢? ²⁴因為我未食飯 就已經歎氣,我嘅呻吟好似水咁湧出嚟。 ²⁵因為我所驚嘅事臨到我身上, 我所懼怕嘅事追上咗我。 ²⁶我毫無安逸,冇平靜, 冇安息——得返嘅只係煩亂。」