Job 4

4 ¹Chieina Temanwui Eliphazna ngahānkai: ²"Kachikathā akhana nali tui akha hānglengakha, na thārala? Chithālala khipāna tui makahāng masārarrakhala? ³Yanglu, nana mi kachungkha tamchithei, kala nana yāng makakā pāng pangngasakhaira. ⁴Nawui tuibing china khangaphok mili khāngkai, kala nana makathuk pheikhukbingli ngatarngasakhaira. ⁵Kha ara chi nawuili kharā, kala na thāhaira; chi nawuili sāza̱, kala na khakshingakhaira. ⁶Vareli nawui khangachee chi nawui ning khanganung maningmala, kala nawui shongfawui khangazip chi nawui kachihān maningmala? ⁷Ara phaningunglu: khayon makhalei khipā shimānhaira? Makhayābing kali shimān ngasakhaira? ⁸Ina theikahai chithāda, khayon luikhavābing kala kakhanang yaokahaibing china ngaraichā hātkhuira. ⁹Varewui khakkhāna athum shimānhaora, kala awui malungkhavātwui khakkhāna athum yuihaora. ¹⁰Kazingkha̱wui khangang, kazingkha̱ sākashewui khon, kala kazingkha̱naobingwui hā sātekmihaira. ¹¹Kazingkha̱ pangmeikap chi sāshai mavātwui vang shimāna, kala kazingkha̱ ava̱wui anaobing ngapha̱haora. ¹²Ara tui akha ngathumda ili khuirāhaira; ikhanāna chiwui akhonnao akha shākhui. ¹³Ngayā khamahāwui eina kharā, ning yaoyā khangasak thoukainaoli, mibingtungli piphuphai tā tharan, ¹⁴khangachee kakathir ili rāhaida, kala iwui ara̱kui saikora nganuk ngasaka. ¹⁵Manglā akhana iwui mangā ngayaovaihaowa; iphasāli sambing ngakarthuihaowa. ¹⁶Chi nganinga, kha chiwui azak ina matheishingkhuimana. Khangachā akha imik tamli leihaowa; kasaikha va̱rihaowa, chieina ina akhon akha shāsai: ¹⁷'Varewui mangāli mina mashungpaira? Awui kasaawui mangāli mina tharpaira? ^a a v17 Eliphazna Vareli khalāda khalei bichar sāpa akha thāda khangachā sāhaira, khipā mikumokha awui mangāli nganinglengmana da hānga — ngasotnao kathum china katang mavaila hiwui eina makanshok ngasakmana, kala kitab hiwui naokapta chonchakbing china hi khangachā chi ithumwui Avā matheikahai da phanglakmi. ¹⁸Yanglu, ana awui raobingli ning manganungmana, kala awui kazingraobingtungli khalāng eina phenmi; ¹⁹Chithākha shimphunga chifali khalei leikhonwui shimli kapambing, makung thāda akha̱ sāmihaira! ²⁰Ngathor eina ngazinwui ngachaili athum ngayānghaora; khipānakha matheila, athum katang mavaila shimānhaora. ²¹Athumwui kachonshimwui khara̱ chi athumlungli khuithuihaira maningmala? Athum thangkhamei maleila thiya.'" ^b b v21 Kachonshim khara̱wui khamahā hina kharing chi kachonshim kathāda mikyanmi: khara̱ chi khuithuimi tharan, asā saikora kongkhaluida maleiluimara.