Vareli Latungda Hāngkhamachin Khuisanglu
Eliphazna Jobli nawui kharing chi Vareli horsanglu da hāngmi; ana khayārā mili kasangmi, kala manganai kahaibingli tukkhui. Ana kachot hi hangkhamachinna, marāngkhuiranu da hānga; kala chāmrei, rai kala ngasamhāi eina huimira, akhavā mawui thurda kathira da ngashitmi. Ana malāk kahai paokhuiwui pongli ningkhamashung eina kahāng tuina.
5 1"Ara ngakaolu; nali ngahānkāra mi khipākha leila? Katharabingwui alungli khipāli nana latungra? 2Kaja malungvāt mangkhama̱ mili sāthata, kala yuikashina ningkashambingli shaothata. 3Ina khalatta mangkhama̱ mi angayung sa̱khuida theihaira, kha kashuirak eina awui pamkhavaili ina khonshi. 4Awui naobing ning nganungkhung eina katāva̱li lei; athumli kārotli akha̱ sāmihaida, athumli ngachonmi khavai mi maleisā. 5Thaihaobingna ka̱shātbingwui ngachaili tangdala awui māhā khuida zāra, kala ra̱kachangbing awui lanwui vang honpama. 6Kaja kachotkachāng chi chifawui eina marāmana, kala kakhanang chi ngaleiwui eina maphormana. 7Kha meiwui meipāna atungshong yongkazat thāda, mi hi kakhanangwui vang kapharāna.
8"I khalatta chiya, Vareli ina phāra, kala iwui vang Vareli ina horsangmira. 9Ana ot khare sai, chi khipānakha mafathuirarmana, kala masākharar kahai mashānrarmana. 10Ana ngalei mangāli kazing romi, kala luilungli tara̱ chihoshoka. 11Ana khangazanabingli atungshong khāngkāmi, kala chapkhangachābing chi tāphup eina khāngkāhaira. 12Ana phākakhaningbingwui khangarān khikha makhaning ngasāngasaka, chithāda athumwui pāngna ot ungshung masā ngasakmara. 13Ana thangkhamabingli athumwui pāngthemli tukkhui, kala mareimarābingwui khangarān khuithuihaira. 14Athumna ngashunshong tangkhamang samphanga, kala ngayā thāda ngashunung kachupzata. 15Kha ana khavātabingli athumwui khamorwui raighaiwui eina, kala kapangpangbingwui pāngwui eina huimi. 16Chithāda kachāmabingna kachihān leira, kala makhamashungna akhamor kafakhamhaora.
17"Varena hāngkhamachin a chi kayākha sokhami ngasāra; chiwui vang eina Sāshap-pangshapawui kharākli maningkachaialu. a a v17 Tui hibing chi Eliphazwui tuibingna—Job chiwui vang Avāwui kakaso maningmana. 42:7li Avāna Eliphazli ali makhamashung hāng ngasakwui vang hāngkhamachin sai; thangkhamei mashung tui thāda shākahai kaje hi Jobwui kachotkachāngna ngathumkahai morei ot samphangki kajina da hāngkhavai raisari thāda sāza̱ngasakhaira. 18Kaja ana khamā za̱ngasaka, kha ana ngahāmi; ana sāteka, kha awui pāngna raimi. 19Kakhanang tharukwui eina ana nali kanshokmira, kala shinili makaphā nali masāza̱mara. 20Chāmreili ana kathiwui eina nali ngatangkhuimira, kala raili raighaiwui pangshapwui eina ngatangkhuimira. 21Malewui khamā za̱ eina na ngathumrā, kala sākakhayāng kharā tharan na mangacheemara. 22Sākakhayāng eina chāmreili na mana̱ra, kala okathuili khalei sāyurbingli na mangacheemara. 23Kaja na luili khalei lungguibing eina tuingashit sāra, kala luili khalei sāyurbingna nali chingri kahai ngasāra. 24Nana nawui kachonshim tāphup kahaina da theira; nawui yaoshang phāyanglakha, khikha mashimānmana da samphangra. 25Nana nawui naongarā kachungkha ngasāra da theira, kala nawui naomayarabing ngaleiwui khawo thāda ngasāra. 26Awui atamli kazipkhui māmazān thāda, na rarlak kahai atamli nawui chikhurli vāra.
27"Mha, hi ithumna phākashokhaira, kala hi mashunga. Chi nganālu, kala nakhalattana chi theikhuilu."
