Ka Juyo ga Allah a Yi Maka Gyara

Elifaz ya roƙi Ayuba ya kai ƙararsa wurin Allah, wanda yake ɗaukaka masu ƙasƙanci yana kuma kama masu wayo. Ya kira wahalar horo da ya kamata a karɓa, ya kuma yi alkawarin kuɓuta daga yunwa, yaƙi, da ɓata suna, da tsufa mai kyau. Shawara ce da tabbaci game da al'amarin da bai fahimta ba.

Babi na 5.

“Yi kira yanzu—akwai wani da zai amsa maka? Ga wane ne cikin tsarkaka za ka juya? Gama fushi yakan kashe wawa, kishi kuma yakan hallaka marar azanci. Ni kaina na ga wawa yana sa saiwa, amma nan da nan na la'anci gidansa. 'Ya'yansa suna nesa da zaman lafiya; a kan murƙushe su a wurin shari'a, babu kuma mai cetonsu. Mayunwata suna cin girbinsa, har ma suna ɗauka daga cikin ƙaya, masu ƙishirwa kuma suna marmarin dukiyarsa. Gama wahala ba ta fitowa daga ƙura ba, damuwa kuma ba ta tsirowa daga ƙasa ba. Amma an haifi mutum domin wahala kamar yadda tartsatsin wuta yake tashi sama.

“Amma ni kaina, zan nemi Allah, ga Allah kuma zan miƙa maganata. Yana aikata manyan abubuwa waɗanda ba a iya fahimta, abubuwan banmamaki marasa iyaka. Yana ba da ruwan sama a fuskar duniya, yana kuma aiko da ruwa a gonaki. Yana ɗaga ƙasƙantattu zuwa bisa, a kuma ɗaga masu makoki zuwa aminci. Yana ɓata shirye-shiryen masu wayo, domin kada hannuwansu su sami nasara. Yana kama masu hikima cikin wayonsu, a kuma share makircin masu dabara. Da rana sukan sadu da duhu, suna lalube da tsakar rana sai ka ce dare ne. Amma yana ceton matalauta daga takobin bakunansu, daga kuma hannun masu iko. Saboda haka matalauta suna da bege, rashin adalci kuma ya rufe bakinsa.

“Mai albarka ne wanda Allah yake yi masa gyara; saboda haka kada ka rena horon Maɗaukaki. ^a Gama yana yin rauni, amma yana ɗaure shi; yana ragargazawa, amma hannuwansa suna warkarwa. Daga wahala shida zai cece ka, a cikin bakwai kuma babu wata cuta da za ta taɓa ka. A lokacin yunwa zai fanshe ka daga mutuwa, a lokacin yaƙi kuma daga ikon takobi. Za a ɓoye ka daga bulalar harshe, ba kuwa za ka ji tsoron hallaka sa'ad da ta zo ba. A kan hallaka da yunwa za ka yi dariya, ba kuwa za ka ji tsoron namun jeji na duniya ba. Gama za ka yi alkawari da duwatsun jeji, namun jeji kuma za su yi zaman lafiya da kai. Za ka san cewa tentinka yana da aminci; za ka duba garkenka, ba kuwa za ka rasa kome ba. Za ka san cewa 'ya'yanka za su yi yawa, zuriyarka kuma za ta zama kamar ciyawar duniya. Za ka kai kabarinka da kana cikakken tsoho, kamar dami da aka tara a kakarsa.

“I, wannan mun binciko shi, gaskiya ne kuwa. Ka ji shi, ka kuma sani wa kanka.”