Job 6

6 ¹Chieina Jobna ngahānkai: ²"Iyavo iwui angun khānli tamyangngasakakha, kala iwui unshimui saikora khānli akhada onrumakha! ³Chiya kachangkhata shamadruwui situili china rit suitāmeira; chiwui vang eina iwui tui makhaunga sāhaira. ⁴Kaja Sāshap-pangshapawui malāthing iwuili lei; imanglāna athumwui hu manga; Varewui khangacheena iwui maningla raisāri shokhaira. ⁵Khararwui gadhāna awui khawotungli ngakaora, lah seina awui seizāttungli ngakaora? ⁶Mang makhalei kashakazā machi maleila shairala, lah malluchwui ra̱li mangkhavai kalikha leila? ^a a v6 Malluch hi ram arong akhana; awui ra̱ tara̱ thāda mang makhalei kala mazaphā—yāng makhalei kala ningkasā mavai kashakazāwui ama̱na. ⁷Iwui wuklungna athumli sāza̱ khavai mamayāmana; hikathā otbing hi iwui vang ningkachai kashakazāna. ⁸Iyavo iwui pokhangai chi khuisangmiakha, kala Varena iwui ningkachāng chi ili mizaakha, ⁹chiya Varena ili sākachup khavai khuisangngaida, apāng chihoda ili katatthaomiakha! ¹⁰Hi aruila iwui okthui ngasakra; lukhamashan matheimana kachotlungli tangdala ina khamathānna ngalongra; chiya ina Kathara Akhawui tui makhalan kahaina. ¹¹Ina chihān sāchingra khavai, iwuili khi yāng lei? Kala ina khāngda sāra khavai, khi atamna ili ngarānmi? ¹²Iwui yāng hi lungguiwui yāng khanongla? Iwui phasā hi pithrai eina sākahaila? ¹³Iwuili khikha khangachon maleimala, ara thangkhamei iwui eina kashamserhaira? ¹⁴Awui ngasotnaoli lukhamashan makhame a china Sāshap-pangshapawui khangachee nothāhaowa. ¹⁵Kha iwui achinābing hi lamhāngwui kongrā thāda mashitkasanga, longkatā thengngasak kongpheiwui longshon thāda, ¹⁶mengkahai phāmkok tangmangra, ngathum kahai horāmna suichungda, ¹⁷kha kakāng atamli athum shimānhaora; kasā kharā tharan, athumwui pamkhavai eina kānthuihaora. ¹⁸Tongkazatbing athumwui shongfa eina pākthuihaida, ramcholi kāda shimānhaora. ¹⁹Temawui tongkazatbing tara̱ phāra; Shebawui ramkazatabing chili chihānra. ²⁰Athumna shitsangkahaiwui vang maishira; apam chili vāshungda ngachangkachat samphangra. ²¹Ara nathumla khikha maning ngasāhaira; hakkhamahā khikha theida ngacheera. ²²Ina, 'Ili khikha milu,' da hānghairala? Maningakha, 'Nawui lan eina iwui vang pheizā milu,' da hānghairala? ²³Maningakha, 'Yangkashewui pāng eina ili kanmilu'? Maningakha, 'Singkakharengbingwui pāng eina ili huimilu'? ²⁴Ili tamchitheimilu, chithākha I kasaikha pamra; kali I khangui sāhaokhala ili theingasakmilu. ²⁵Khamashung tui hi kathada khananglui ngasakhala! Kha nawui kahar china khi mashun chitheira? ²⁶Nathumna tuimāng kahar khavai machuka, ning kachipā mi akhawui tui chi masi thāda shānkhuira? ²⁷Nathumna avāva̱ makhaleiawui vang eina tangda kalā yangra kala nathumwui ngasotnao chi ngatha̱ra. ²⁸Kha ara, kapona ili yanglu; kaja nathumwui mangāli I makapikmara. ²⁹Ning ngacheilu, ina nathumli kapona; makhamashung khikha masāranu. Ning ngacheilu; iwui khamashung khangarong arui nganingchinga. ³⁰Imaleli khangui khikha leilā? Ikhamorna sākashe chi mapangkhuishaprala?"