Yobe Atawira ali pa Mulu wa Dota
Yobe alonga kuti tani kutsukwala kwace kukhapimwa, kukhalemera kupiringana ntchenga wa m'madzi makulu, na kuti miseu ya Wamphambvu Zonsene iri mwa iye. Asafuna kuti Mulungu amalise basa. Kupiringana pyenepi, axamwali ace asamputsa ninga mikulo ya m'thando inauma pikufika anyakufamba akuthowa ludzu.
6 1Na tenepo Yobe atawira: 2“Mbingadapimbwa kutsukwala kwanga, na pinentso pyanga pyonsene mbikuikhwa pabodzi pa cakupima! 3Mbudadapiringana kulemera kwa n'senga wa bara—ndi thangwi yace mafala anga akhali akusowa nyongo. 4Thangwi miseu ya Wamphambvu Zonsene iri mwa ine; nzimu wanga usamwa ndulu yawo; pyakugopsa pya Mulungu pyandzungulira toera kundimenya. 5Kodi buru wa n'thengo usalira pa uswa wace, peno ng'ombe isalira pa cakudya cace? 6Kodi cakudya cakusowa kukoma cisadyiwa mwakusowa munyu, peno kuna kukoma mu madzi a mera wa n'thengo? a a v6 Mera ndi mbeu ya n'thengo; madzi ace akhali akusowa kukoma na akukhonda kufunika kudyiwa — cithundzithundzi ca cakudya cakusowa mphambvu peno cakusowa kukwewa munthu. 7Moyo wanga usakhonda kukhuya pyenepi; pinthu ngati penepi kuna ine ndi cakudya cakunyansa. 8Aa, mbingadatawirwa cikumbiro canga, toera Mulungu andipase cinthu cinasirira ine, 9toera Mulungu atawire kundipwanya ine, mbasudzula djanja yace mbandigwanda! 10Penepi mbapidapitiriza kukhala cibalangazo canga—ine mbindadumphadumpha na kutsandzaya ngakhala mu kuwawa kwakusowa ntsisi—thangwi nee ndaramba mafala a Wakucena. 11Ndiri na mphambvu yanji, toera ndipitirize kudikhira? Kumala kwanji kunandidikhira, toera ndipirire? 12Kodi mphambvu yanga ndi mphambvu ya miyala? Kodi manungo anga acitwa na utale? 13Kodi nkhabepo cithandizo nee pang'ono muna ine, mu ndzidzi uno udziwisi wadidi udathamangiswa kuna ine? 14Munthu onsene ule anakhonda kupangiza kukoma ntima kuna xamwali wace asasiya kugopa Wamphambvu Zonsene. 15Mbwenye abale anga ndi akunyengeza ninga nkulo wa n'thando, ninga mikulo inasefuka mbiuma, 16yakuda na madzi akuzizira akunyeketuka, yakudzala na matalala akubisika, 17mbwenye mu ndzidzi wakuuma isamala; pinafika kutentha, isafudzika pa mbuto yace. 18Magulu a apfambi asacoka mu njira zawo; asakwira ku n'thando mbaferapo. 19Magulu a apfambi a ku Tema asasaka madzi; apfambi a ku Xeba asadikhira madzi. 20Asanyadziswa thangwi akhadanyindira; asafika pa mbuto mbatsukwala. 21Cincino imwembo mwasanduka cinthu cakusowa basa; musaona cinthu cakugopsa mbagopa. 22Kodi ndalongapo kuti: ‘Ndipaseni cinthu’? Peno: ‘Perekani cipfupfudzo thangwi ya ine kubuluka mu mpfuma zanu’? 23Peno: ‘Ndipulumuseni m'djanja ya nyamalwa’? Peno: ‘Ndiomboleni m'manja a anthu akusowa ntsisi’? 24Ndipfundziseni, penepo ndinakhala dzii; ndipangizeni pidadodoma ine. 25Mafala a undimomwene asawawa kakamwe! Mbwenye kusandika kwanu kusapangiza cinji mwandimomwene? 26Kodi musafuna kusasanyira mafala basi, mukuona malongero a munthu wakutaya cidikhiro ninga mphepo? 27Imwe mungakwanisa kucita maere thangwi ya mwana wamasiye mbamuguliza xamwali wanu mwene. 28Mbwenye cincino, ndaphata miyendo ndiyang'aneni ine—nee nalonga uthambi pa maso panu. 29Lekani, ndikucemberani; cinthu cakukhonda kulungama cikhonde kucitika. Lekani—kulungama kwanga kuciripo. 30Kodi kuna cakuipa pa lirimi yanga? Kodi mulomo wanga nkhabe kwanisa kudziwa pinthu pyakupfudza?”
