Iwui Atam Khaksuikha Māng
Jobna awui mirin raonaowui ot kala ngalang kaphei kathāwui ngasingkhami thāda sāa: ngayā taphāna mayāngmaya, ahui thāchaka. Ana khamathum mara. Psalms tui chi ana khaka ngasakta, Varena mili khisāda chithāda nganingkhala, kala ili yāng haiphalu da hānga.
7 1"Mibingna okathuili otram ngatha̱ maleimala, kala athumwui atam ngalang kaphei miwui atam kathā maningmala? 2Raonao akhana khaya̱li longa kathā, kala ngalang kaphei mina awui chotman honda leilakha kathā, 3chithāda khikha makhaning kachāngbing ili shānsanghaira, kala sipkasā ngayābing ili azanghaowa. 4Ina pida leilakha, 'Katharan I ngakarthuira?' da hānga; kha ngayā katāda leihaowa, kala zimik ngathotranglakha eina tangda I ngareishok ngareizang sāpama. 5Iwui asā kachai eina leitang chifa eina ngavaimi; iwui phasā ngaching kahaida, chieina latluida ngahā shokra. 6Iwui atam pākra̱ kasāwui singpali thākmei, kala kachihān maleila athum kupra. 7Iwui mirin khaksuikha mānga da phaningmilu; ina khamathā kaho khangatei matheiluimara. 8Ara ili thei mik china ili matheiluimara; nawui mik iwuitungli leira, kha I kuphaira. 9Muiyāna ngazanda shimānhaowa kathā, chithāda Kathewui ramli tāa mi china makāluimara; 10ana awui shimli mahanungluimara, kala awui apamna ali matheiluimara.
11"Chiwui vang eina ina ikhamor mavaimara; imanglāwui angun eina ina hāngra, iwui manglāwui ningkakhā eina ina maringkaphā hāngra. 12I shamadru sina, lah shamadruwui sārei sina, chiwui vang eina nana iwuitungli mayonkhame haihaokhala? 13Ina, 'Iwui petna ili okthui ngasakra, iwui pamkhong iwui kakhanang phazākhuira,' da hāng tharan, 14chiwui thili nana mang eina ili ngachee ngasaka, kala khamahā eina ili sāmachitmi, 15chithāda ina iwui phasā hi mahutle khaklan eina kathi chi khuitha̱ra. 16I kuimāng ngasāhaira; katang mavaila maringluimara. Ili aningkhānmilu, kaja iwui atam khaksuikha mānga.
17"Mi hi khina, nana ali kayākha masot michikatta, kala nana awuitungli nawui wuklung haimira, 18nana ali ngathor kachida vāzangda, kala hunkha kachida ali chāng tamyanga? 19Karankha sāngda nana iwui eina namai ngareithuida, kala iwui machora̱ mayuisang khavai atam kateokha iningkhānhaoga? 20O mikumowui khamayona, ina morei sāhaiakha nali khi sāhaokhala? Khisāda nana ili nawui rinnganao khavai sāhaokhala, chieina ina imāngli otphun ngasāhaira? 21Khisāda nana iwui morei mapheomida iwui khayonkhamāng makhuithuiserirakhala? Kaja thākta ina chifali ngayaipamhaora; nana ili phāra, kha ina maleiluimara."
