Peetuusyekyuk ko Kabuuset Kityo
Kergeiyi Job saboondanyi ak poisyetap otwogindet ak kong'enutap otwogindet ne nyooru melekto: kemousyek che po nyalilda, koim poortanyi yeityo koyaat kogeny. Ma iger kutinnyi. Koweekyi saaet koek ne ng'waan, koteebee amu nee si keerei Kamuktaindet chiito kokweny, ak kosaachi kole koistoi kong'nyi.
7 1“Ma tinyei piik poisyet ne nyigiis eng' ng'wony, ak ma kergei peetuusyekwak ak che po otwogindet ne nyooru melekto? 2Ko uu otwogindet ne machei urwet, ak ko uu otwogindet ne nyooru melekto ne ganyei melektanyi, 3Kagiapchiwo arawek che po tangoita, ak kagikiitwo kemousyek che po nyalilda. 4Ye aru ale, ‘Ou anyun ang'eetu?’ Ago koi kemoi, ak awasegei agoi karon. 5Kalaaktai panyeekyuk kuutik ak ng'ung'unyek; koim iriryonnyu, yeityo koyaat kogeny. 6Chepcheben peetuusyekyuk kosiir keetitap nabisyei, ak betos ama tinyei kamang'unet. 7Ibwaat ile saboondanyu ko kabuuset kityo; ma ageere kogeny kiy age tugul ne myee. 8Konda ne keerei anee rani ma kageera kogeny; konyeguk ko mi anee, ak ma ami. 9Ko uu ye betos pooldet ak kobeeti, ko uu nooto chii ne choorugei kererit ma ng'eetu kogeny; 10Ma weekyigei kogeny koonnyi, ak ma ingen kogeny komostanyi ineendet.
11“Nooto anyun ma ager kutinnyu; amwa eng' pichiindo ne po kabuusennyu, ang'alaali eng' ng'wanindap saboondanyu. 12Tos aa anee nyanjet, anan tyong'indo ne po nyanjet, si inde riibindet agobo anee? 13Ye ale, ‘Igaigaa ngorinnyu, koostoiywo itogunnyu ng'alaalyotnyu,’ 14iyinye imuogowo eng' karwotitaosyek, ak iywootowo eng' ng'ang'utik, 15si alewen keteret ak meet, kosiir poortanyu. 16Aristo; ma asabe koigeny. Metoo anee, amu peetuusyekyuk ko kabuuset kityo.
17“Nee chiito, si ibaibaitune ineendet, ak inde muguleldang'ung' agobo ineendet, 18si ichorchi ineendet mornet age tugul, ak itemei ineendet sait age tugul? 19Agoi ou anyun iweekyi eng' anee, ak imete anee kot alugu omyeenyu? 20Ngot ka ayai tengekto, nee ne kaayai eng' inyee, ee riibindetap kimugulmet? Amu nee si igoono anee koek kiy ne imwogei, si aegu mileet eng' aneege? 21Amu nee si ma inyoiywo kaat tengektonyu, ak isto yaityennyu? Amu sooniot arue eng' temburyek; icheeng'o anee, ago ma ami.”