Bilumbu byama bina kaka mwela
Yobi wisi tesa luzingu lwandi yi kisalu kya muhika amana yi kuhingila kwa musadi wa mbongu lufutu lwandi: phipha za baluka-baluka, lutu lwisi tatuka. Kakasaku munwa wandi. Wisi yula mu khabu, kikuma kya biki Nzambi wisi tala mutu buwombo, amana ni kabalula mesu mandi.
7 1«Keti batu benina ni kisalu kya phasi ha tsi, amana bilumbu bya bawu, keti bifwanana yi bya musadi wa mbongu? 2Bwosu muhika wuna wisi zola kivula, amana bwosu musadi wa mbongu wuna wisi hingila lufutu lwandi, 3buna meni yátambula ngonda za phamba, amana phipha za kiwayi zápheka kwena meni. 4Muna tangwa dina yilandalala, yisi zimbula: “Mu khi tangwa yikátokama?” Kaasi phipha yisi zinga, amana yisi baluka-baluka tii yi suka. 5Lutu lwama luvwatidi mimvidya yi fusyangeni dya mafu; lutu lwama lwisi yuma, amana lwisi tatuka hika. 6Bilumbu byama bisi luta mu nsualu, kuluta kima kya kutungila miledi, amana bisi mana konda kivuvu. 7Bambuka ni luzingu lwama lwenina kaka mwela; yikámonaku dyaka kima kimosi kya mboti. 8Disu dina disi mbona bwabu, dikámonaku hika meni; mesu maku makála ha meni, amana meni yikámonikaku dyaka. 9Bwosu tuti disi kulwakila amana disi hwina, phila mosi wuna wisi kulumuka ku kalunga kalubukaku dyaka; 10kavutukaku dyaka ku nzu yandi, amana buma bwandi bukámuzayaku dyaka.
11Buna yikákasaku munwa wama; yikázonza mu kiwayi kya kitembu kyama, yikányengalakana mu khadi ya moya wama. 12Keti meni yenina yanga, ho tsema wa mbuta, ndangu wisi sia thekidi ha meni? 13Ho ni yazimbula: “Thangi yama yikáheka kikesa kwena meni, buvundilu bwama bukálembika kiwayi kyama,” 14buna wusi mbonisa bweya mu ndosi, amana wusi mbonisa tsisi mu mbona mesu, 15hanga yisola kukangama mwela yi lufwa, kuluta lutu lwama lwalu. 16Yisi zimbakana; yikázingaku hika mu mvula yi mvula. Nyambula meni, mukuma bilumbu byama bina kaka mwela.
17Mutu kenina khi kima, ndangu wisi mutombula lawu, amana ndangu wisi tula mbundu yaku kwena yandi, 18ndangu wisi mukinda kosu suka amana wisi muzyamina kosu tangwa? 19Tii yi khi tangwa wisi katula mesu maku ha meni, amana wunyambula meni ndangu yamina metya mama? 20Ho ni yásumuka, biki yikuhangidi, ngeyi thekidi wa bana ba batu? Kikuma kya biki wukhitula meni kima kyaku kya kubetila, hanga yikituka zitu kwena meni-meni? 21Kikuma kya biki wisi lolulaku disumu dyama amana wisi katulaku mbi yama? Mukuma ni ka thama ku, yikálandalala mu fusyangeni; wakwata tsanda meni, kaasi yikámonikaku dyaka.»
