Mazuva Angu Mweya Chete

Jobho anofananidza upenyu hwake nebasa romuranda nokumirira kwemushandi wemaricho mubhadharo wake: husiku hwokukungurukana, ganda richiputika. Haazonyarari. Anoshandura pisarema kuti rive rinovava, achibvunza kuti sei Mwari achitarisisa munhu zvakadaro, uye achimukumbira kuti atarise kumwe.

Chitsauko 7.

“Ko vanhu havana basa rinorema panyika here, uye mazuva avo haakaita seomushandi wokuhaya here? Somuranda anoshuva mumvuri, uye somushandi wokuhaya akamirira mubairo wake, saizvozvo ndakagoverwa mwedzi isina maturo, uye usiku hwokutambudzika hwakatarwa kwandiri. Pandinovata pasi ndinoti, ‘Ndichamuka riniko?’ Asi usiku hunononoka, uye ndinopinduka-pinduka kusvikira kwaedza. Nyama yangu yakafukidzwa nehonye nemavhinga evhu; ganda rangu rinooma, robva ratsemukazve. Mazuva angu anomhanya kupfuura chokuruka chomuruki, uye anosvika kumagumo asina tariro. Rangarirai kuti upenyu hwangu mweya chete; handichazoonizve chinhu chakanaka. Ziso rinondiona zvino harichazondioni zvakare; meso enyu achava pandiri, asi ini handichazovapo. Segore rinopera richinyangarika, saizvozvo uyo anoburukira muguva haachadzokizve; haachadzokizve kumba kwake, uye nzvimbo yake haichamuzivizve.

“Naizvozvo handingarambi ndakavhara muromo wangu; ndichataura ndichibva mukurwadziwa kwomweya wangu, ndichanyunyuta nokuvava kwomwoyo wangu. Ko ini ndiri gungwa here, kana chikara chegungwa, zvamunoisa murindi pamusoro pangu? Pandinoti, ‘Mubhedha wangu uchandinyaradza, nhovo yangu ichaderedza kunyunyuta kwangu,’ ipapo munondityisidzira nezviroto uye munondivhundutsa nezviratidzo, zvokuti ndaisarudza kudzipwa norufu panzvimbo yomuviri wangu uyu. Ndinopera; handingararami nokusingaperi. Ndiregei ndoga, nokuti mazuva angu mweya chete.

“Munhu chiiko, zvamunomukoshesa kudai, uye zvamunoisa mwoyo wenyu paari, zvamunomushanyira mangwanani oga oga uye muchimuedza nguva dzose? Kusvikira riniko musati mabvisa meso enyu pandiri, mondirega ndoga kwenguva inokwana kuti ndimedze mate angu? Kana ndakatadza, ndakakuitirai chii, imi muchengeti wavanhu? Sei makandiita chinangwa chenyu, zvokuti ndava mutoro kwandiri ndoga? Sei musingandiregereri chivi changu nokubvisa mhosva yangu? Nokuti nokukurumidza ndichavata pasi muguruva; muchanditsvaka, asi ini handichazovapo.”