Jobu 7

7 ¹“Ǹjẹ́ ènìyàn kò ha ní iṣẹ́ àṣekára lórí ilẹ̀ ayé, ọjọ́ wọn kò ha sì dàbí ọjọ́ alágbàṣe bí? ²Bí ẹrú tí ó ń ṣàfẹ́rí ibòji, àti bí alágbàṣe tí ó ń dúró de owó iṣẹ́ rẹ̀, ³bẹ́ẹ̀ ni a fi oṣù òfo fún mi ní ìpín, a sì yan òru ìpọ́njú fún mi. ⁴Nígbà tí mo bá dùbúlẹ̀, mo máa ń wí pé, ‘Nígbà wo ni èmi yóò dìde?’ Ṣùgbọ́n òru náà a sì máa fà gùn, mo sì ń yí síhìn-ín yí sọ́hùn-ún títí di àfẹ̀mọ́júmọ́. ⁵Ara mi wọ aṣọ kòkòrò àti ògúlùtu erùpẹ̀; awọ mi le, ó sì tún ya sílẹ̀ padà. ⁶Ọjọ́ mi yára ju ọkọ̀ ahunṣọ lọ, wọ́n sì dé òpin wọn láìsí ìrètí. ⁷Ẹ rántí pé èémí lásán ni ẹ̀mí mi; èmi kì yóò tún rí ohun rere kankan mọ́ láéláé. ⁸Ojú tí ó ń rí mi nísinsin yìí kì yóò rí mi mọ́; ojú yín yóò wà lára mi, èmi kì yóò sì sí mọ́. ⁹Bí ìkùùkuu ti ń fọ́n ká tí ó sì ń parẹ́, bẹ́ẹ̀ ni ẹni tí ó sọ̀kalẹ̀ lọ sí isà òkú kì í padà wá sókè; ¹⁰kì yóò padà sí ilé rẹ̀ mọ́, ibùgbé rẹ̀ kì yóò sì mọ̀ ọ́n mọ́.

¹¹“Nítorí náà, èmi kì yóò pa ẹnu mi mọ́; èmi yóò sọ̀rọ̀ nínú ìrora ẹ̀mí mi, èmi yóò ṣàròyé nínú ìkorò ọkàn mi. ¹²Èmi ha jẹ́ Òkun, tàbí ẹranko ńlá inú Òkun, tí ẹ fi yan olùṣọ́ lórí mi? ¹³Nígbà tí mo bá wí pé, ‘Ibùsùn mi yóò tù mí nínú, àkéte mi yóò mú ẹ̀dùn ọkàn mi fúyẹ́,’ ¹⁴nígbà náà ni ẹ ń fi àlá dẹ́rù ba mí, ẹ sì ń fi ìran páyà mí, ¹⁵tó bẹ́ẹ̀ tí mo fi yàn ìfúnpa àti ikú dípò ara mi yìí. ¹⁶Mo ń ṣòfò lọ; èmi kì yóò wà láàyè títí láé. Ẹ fi mí sílẹ̀ nìkan, nítorí èémí lásán ni ọjọ́ mi.

¹⁷“Kí ni ènìyàn, tí ẹ fi gbé e ga tó bẹ́ẹ̀, tí ẹ sì fi ọkàn yín lé e lórí, ¹⁸tí ẹ fi ń bẹ̀ ẹ́ wò ní àràárọ̀, tí ẹ sì ń dán an wò ní àkókò gbogbo? ¹⁹Yóò ti pẹ́ tó kí ẹ tó yí ojú yín padà kúrò lọ́dọ̀ mi, kí ẹ sì fi mí sílẹ̀ fún ìgbà tó tó bẹ́ẹ̀ kí n lè gbé itọ́ mi mì? ²⁰Bí mo bá ti dẹ́ṣẹ̀, kí ni mo ha ṣe yín, ẹ̀yin olùṣọ́ aráyé? Èéṣe tí ẹ fi fi mí ṣe ohun ìtafà yín, tó bẹ́ẹ̀ tí mo fi di ẹrù wíwúwo fún ara mi? ²¹Èéṣe tí ẹ kò fi ní dárí ẹ̀ṣẹ̀ mi jì, tí ẹ kò sì fi ní mú ẹ̀bi mi kúrò? Nítorí láìpẹ́ èmi yóò dùbúlẹ̀ nínú erùpẹ̀; ẹ ó wá mi kiri, ṣùgbọ́n èmi kì yóò sí mọ́.”