約伯記 7

7 ¹「人喺世上豈不是有一場艱苦嘅勞役? 佢哋嘅日子豈不是好似僱工咁? ²好似奴僕渴望陰涼, 又好似僱工等待佢嘅工錢, ³我照樣分得虛空嘅歲月, 愁苦嘅長夜派畀咗我。 ⁴我瞓低嘅時候就話:『幾時先 起得身呢?』但係長夜 漫漫,我輾轉反側直到天光。 ⁵我嘅肉身披住蟲 同埋泥塊; 我嘅皮膚硬起,跟住又再爆裂。 ⁶我嘅日子比織布嘅梭仲快, 佢哋走到盡頭,毫無指望。 ⁷求你記得,我嘅生命不過係一口氣; 我永遠都唔會再見到任何好嘢喇。 ⁸而家見到我嘅眼,以後都唔會再見到 我;你嘅眼望向我,但係我已經唔喺度喇。 ⁹好似雲彩消散淨盡,咁樣落到陰間嘅人都唔會再上嚟; ¹⁰佢唔會再返自己嘅屋企, 佢嘅地方都唔再認得佢喇。

¹¹「所以我唔會收埋 我把口;我要因為我心靈嘅痛苦而出聲, 我要因為我內心嘅苦澀而訴苦。 ¹²我係大海,定係海怪呀,你竟然要派人睇守住我? ¹³當我話:『我張床會安慰 我,我張榻會減輕我嘅訴苦,』 ¹⁴你就用夢嚟嚇我, 用異象嚟驚嚇我, ¹⁵以致我寧願揀窒息同死亡, 都唔要我呢個身軀。 ¹⁶我日漸消瘦;我唔會長生不老。 由得我啦,因為我嘅日子不過係一口氣。

¹⁷「人算得係乜嘢呢,你竟然咁睇重佢,又將你嘅心放喺佢身上, ¹⁸你竟然每朝早察看佢, 每一刻都試驗佢? ¹⁹你要幾耐先至將目光從我身上 移開,由得我夠時間吞返啖口水呢? ²⁰如果我犯咗罪,我對你做過啲乜嘢呢, 監察世人嘅主呀? 你點解要將我當做你嘅箭靶, 以致我變成自 己嘅重擔呢? ²¹你點解唔肯赦免我嘅罪,除去我嘅過犯呢?因為我好快就要瞓喺塵土入面; 你會搵我,但係我已經唔喺度喇。」