Kwanakina Numfashi ne Kawai

Ayuba ya kwatanta rayuwarsa da aikin bawa da jiran ɗan ƙodago ga ladansa: dararen jujjuyawa, fatar jiki tana tsagewa. Ba zai yi shiru ba. Ya mai da zabura ta zama mai ɗaci, yana tambaya don me Allah yake lura da mutum sosai haka, yana kuma roƙonsa ya kawar da kallonsa.

Babi na 7.

“Ashe, mutum ba shi da bauta mai wahala a duniya ba, kwanakinsa kuma ba kamar na ɗan kwadago ba ne? Kamar bawa da yake marmarin inuwa, kamar kuma ɗan kwadago da yake jiran ladarsa, haka aka ba ni watanni na banza, aka kuma ƙayyade mini dararen azaba. Sa'ad da na kwanta, nakan ce, ‘Yaushe zan tashi?’ Amma dare yana yin tsawo, ina ta juyawa gefe-gefe har gari ya waye. Namana ya rufu da tsutsotsi da dunƙulen ƙasa; fatata takan ƙeƙashe, sa'an nan ta sāke tsagewa. Kwanakina sun fi kwakkwafin masaƙi sauri, suna kuma kaiwa ga ƙarshe babu wani bege. Ka tuna cewa raina numfashi ne kawai; ba zan ƙara ganin wani abu mai kyau ba har abada. Idon da yake ganina yanzu ba zai ƙara ganina ba; idanunka za su neme ni, amma ni kuwa ban nan. Kamar yadda girgije yake shuɗewa yă ɓace, haka wanda ya gangara zuwa kabari ba ya ƙara dawowa; ba ya ƙara komawa gidansa, wurinsa kuma ba ya ƙara saninsa.

“Saboda haka ba zan rufe bakina ba; zan yi magana cikin wahalar ruhuna, zan yi gunaguni cikin ɗacin raina. Ni teku ne, ko kuwa dodon ruwa, da ka sa mini mai gadi? Sa'ad da na ce, ‘Gadona zai ta'azantar da ni, shimfiɗata za ta sauƙaƙa mini gunaguni,’ sai ka tsorata ni da mafarkai, ka kuma firgita ni da wahayoyi, har zan gwammace a shaƙe ni in mutu da in zauna cikin wannan jikina. Ina lalacewa; ba zan rayu har abada ba. Ka rabu da ni, gama kwanakina numfashi ne kawai.

“Mene ne mutum har kake ɗaukansa da muhimmanci haka, har kake saka masa zuciyarka, har kake duba shi kowace safiya, kana kuma gwada shi a kowane lokaci? Har yaushe za ka kau da idanunka daga wurina, ka rabu da ni har na haɗiye miyau na? In na yi zunubi, me na yi maka, kai mai lura da mutane? Don me ka mai da ni abin harbinka, har na zama wa kaina kaya mai nauyi? Don me ba za ka gafarta mini laifina ba, ka kuma ɗauke mini zunubina? Gama ba da jimawa ba zan kwanta cikin ƙura; za ka neme ni, amma ni kuwa ban nan.”