Job 7 FHB Father's Heart Bible™

7 ¹“Ọ bụ na mmadụ enweghị ọrụ siri ike nʼelu ụwa, ọ bụkwa na ụbọchị ha adịghị ka nke onye e goro ọrụ? ²Dịka ohu nke na-achọsi ike ndo, dịka onye e goro ọrụ nke na-echere ụgwọ ọrụ ya, ³otu a ka e kenyere m ọnwa ndị tọgbọrọ nʼefu, e kenyekwala m abalị nhụjuanya. ⁴Mgbe m dinara ala, ana m asị, ‘Olee mgbe m ga-ebili?’ Ma abalị na-adọ ogologo, ana m atụgharị gburugburu ruo chi ọbụbọ. ⁵Anụ ahụ m yikwasịrị ikpuru na ọkpụrụkpụ aja; akpụkpọ ahụ m na-akpọ nkụ, mesịa gbawaakwa ọzọ. ⁶Ụbọchị m dị ọsọ karịa akụ onye na-akpa akwa, ha na-abịaru nʼọgwụgwụ na-enweghị olileanya. ⁷Cheta na ndụ m bụ naanị ume; agaghị m ahụ ihe ọma ọbụla ọzọ. ⁸Anya nke na-ahụ m ugbu a agaghị ahụ m ọzọ; anya gị ga-adị nʼahụ m, ma anọghịzi m. ⁹Dịka igwe ojii si agbaze ma pụọ nʼanya, otu a ka onye na-arịdaru nʼili na-adịghị arịgopụta ọzọ; ¹⁰ọ naghị alọghachikwa nʼụlọ ya ọzọ, ebe obibi ya amaghịkwa ya ọzọ.

¹¹“Ya mere, agaghị m emechi ọnụ m; aga m ekwu okwu site nʼihe mgbu nke mmụọ m, aga m eme mkpesa site nʼilu nke mkpụrụobi m. ¹²Ọ bụ m bụ oke osimiri, ka ọ bụ anụ ọjọọ nke oke osimiri, nke mere i ji debe onye nche nʼebe m nọ? ¹³Mgbe m na-asị, ‘Ihe ndina m ga-akasị m obi, akwa ndina m ga-eme ka mkpesa m dajụọ,’ ¹⁴mgbe ahụ ị na-eji nrọ na-emenye m egwu, were ọhụụ na-emenye m oke ụjọ, ¹⁵nke mere na m ga-ahọrọ ikwagbu olu na ọnwụ karịa ahụ m a. ¹⁶Ana m ala nʼiyi; agaghị m adị ndụ ruo mgbe ebighị ebi. Hapụ m naanị m, nʼihi na ụbọchị m bụ naanị ume.

¹⁷“Gịnị ka mmadụ bụ, nke mere i ji eme ka ọ dị oke mkpa, ị na-etinyekwa obi gị nʼime ya, ¹⁸nke mere i ji eleta ya ụtụtụ ọbụla, na-anwalekwa ya nʼoge ọbụla? ¹⁹Ruo ole mgbe ka ị ga-ewepụ anya gị nʼebe m nọ, hapụ m naanị m ruo mgbe ga-ezuru m ilo asọ m ọnụ? ²⁰Ọ bụrụ na m mehiere, gịnị ka m mere gị, gị onye na-eche mmadụ nche? Gịnị mere i ji mee m ihe mgbaalụ gị, nke mere na m aghọọla ibu arọ nye onwe m? ²¹Gịnị mere ị gaghị agbaghara m mmehie m, wepụkwa ikpe ọmụma m? Nʼihi na nʼoge na-adịghị anya aga m edina nʼaja; ị ga-achọ m, ma anọghịzi m.”