گونلرئم آنجاق بئر نفسدئر
اَیّوب حیاتینی بئر قولون خئدمتئنه و بئر موزدلو ائشچینئن حاقّینی گؤزله‌مه‌سئنه بنزه‌دئر: چالخانان گجه‌لر، یاریلان دَری. او ساکئت قالمایاجاق. زبورو آجیلاشدیریب سوروشور کی، نئیه تاری بئر ائنسانی بله یاخیندان گؤزله‌یئر، و دیله‌یئر کی، اوزونو اوندان چِوئرسئن.
7 1«مگر ائنسانین یِر اوزونده آغیر خئدمتی یوخدور و اونون گونلری موزدلو ائشچئنئن گونلری کئمی دیئل؟ 2کؤلگه‌یه حسرت چکن قول کئمی و اؤز حاقّینی گؤزله‌ین موزدلو ائشچی کئمی، 3بله‌جه منه بوش آیلار پای ورئلئب و عذاب دولو گجه‌لر منه تعیئن اولونوب. 4یاتاندا دیئرم: ”نه واخت قالخاجاغام؟“ آمّا گجه اوزون چکئر و سحره‌جک یاتاقدا چالخانیرام. 5اَتئم قوردلارلا و تورپاق کَسَکلری‌ائله اؤرتولودور؛ دَرئم برکئیئر، سونرا گئنه یاریلیر. 6گونلرئم توخوجو مَکئیئندن سورعتلی‌دئر و اومئد اولمادان آخیرا چاتیرلار. 7یادا سال کی، حیاتیم آنجاق بئر نفسدئر؛ داها هچ واخت یاخشیلیق گؤرمه‌یه‌جه‌یم. 8ائندی منی گؤرن گؤز داها منی گؤرمه‌یه‌جک؛ گؤزلرئن منئم اوستومده اولاجاق، آمّا من آرتیق اولمایاجاغام. 9بولود داغیلیب یوخ اولدوغو کئمی، اؤلولر دئیارینا اِنَن ده گئنه یوخاری چیخماز؛ 10او داها اؤز اِوئنه قاییتماز و اؤز یری اونو داها تانیماز.
11«اونا گؤره من آغزیمی باغلامایاجاغام؛ اؤز روحومون سیخینتیسیندان دانیشاجاغام، جانیمین آجیلیغیندا شئکایت اده‌جه‌یم. 12مگر من دهنز، یا دا دهنز اژداهاسییام کی، اوستومه کشئکچی قویارسان؟ 13ددئیئمده: ”یاتاغیم منه تسلّی وره‌جک، دؤشه‌یئم شئکایتئمی یونگوللَده‌جک“، 14اوندا سن منی یوخولار ائله قورخودورسان و رؤیالارلا دهشته سالیرسان، 15بله کی، بو بدنئمی ساخلاماقدانسا بوغولماغی و اؤلومو سچه‌رم. 16من اَریرم؛ ابدی یاشامایاجاغام. منی تک بوراخ، چونکی گونلرئم بئر نفسدئر.
17«ائنسان نه‌دئر کی، اونا بو قدر قئیمت ورئرسن و اوره‌یئنی اونا باغلاییرسان، 18کی، هر سحر اونا باش چکئرسن و هر آن اونو ائمتاحان ادئرسن؟ 19نه واختا کئمی مندن گؤزونو چِوئرمیه‌جکسن و توپورجه‌یئمی اوداجاق قدر منی تک بوراخمایاجاقسان؟ 20اگر گوناه اتمئشَمسه، سنه نه ائشله‌مئشم، ای ائنسانلاری گودن؟ نئیه منی اؤزونه هدف اتدئن، بله کی، اؤزومه یوک اولموشام؟ 21نئیه گوناهیمی باغیشلامیرسان و تقصئرئمی گؤتورمورسن؟ چونکی عنقرئب تورپاقدا اوزاناجاغام؛ منی آختاراجاقسان، آمّا من آرتیق اولمایاجاغام.»
