Bildad Bashuhe Ya Amsa

Bildad ya fi fitowa fili: Allah ba ya karkatar da adalci, saboda haka lalle 'ya'yan Ayuba sun sami abin da zunubinsu ya cancanta. Ka nemi Allah, ka zama mai tsabta, ƙarshenka kuwa zai fi farkonka haske. Kwatancinsa na marasa tsoron Allah, kamar iwa ba tare da fadama ba, da sakar gizo-gizo, ya nufi Ayuba kai tsaye.

Babi na 8.

Sai Bildad Bashuhe ya amsa ya ce, “Har yaushe za ka ci gaba da faɗin irin waɗannan abubuwa? Kalmomin bakinka ba kome ba ne sai iska mai ƙarfi. Shin Allah yakan karkatar da adalci? Shin Maɗaukaki yakan karkatar da abin da yake daidai? Idan 'ya'yanka suka yi masa zunubi, sai ya miƙa su ga sakamakon tawayensu. Amma in ka nemi Allah da gaske, ka kuma roƙi Maɗaukaki domin jinƙai, in kana da tsarki da adalci, lalle yanzu zai tashi dominka, yă mai da kai ga matsayinka na gaskiya. Ko da yake farkonka ya kasance ƙarami, shekarunka na ƙarshe za su bunƙasa fiye da misali. Ka tambayi tsararrakin da suka shuɗe, ka lura da abin da ubanninsu suka bincika. Gama jiya ne kawai aka haife mu, ba mu kuma san kome ba; kwanakinmu a duniya inuwa ce kawai. Ba za su koya maka, su gaya maka ba, su kuma fitar da kalmomi daga fahimtarsu? Takanda za ta yi tsawo inda babu fadama? Kyauro za su bunƙasa ba tare da ruwa ba? Tun yana danye, ba a kuma yanka shi ba, yakan bushe da sauri fiye da kowace ciyawa. Haka makomar duk waɗanda suka manta da Allah take; haka begen marar tsoron Allah yakan hallaka. Abin dogararsa mai rauni ne, amincewarsa kuma yanar gizo-gizo ce. Yakan jingina ga gidansa, amma ba ya tsayawa; yakan riƙe shi kam, amma ba ya dawwama. Yana kama da tsiro mai ruwa sosai a cikin hasken rana, yana yaɗa toho a ko'ina cikin lambu. Saiwoyinsa sun naɗe kan tarin duwatsu, suna neman wuri a cikin duwatsu da za su kama. Amma sa'ad da aka tumɓuke shi daga wurinsa, sai wurin ya yi masa musu, yana cewa, ‘Ban taɓa ganinka ba.’ Haka farin cikin hanyarsa yake— daga ƙasa kuma waɗansu su tsiro a wurinsa. Allah ba zai ƙi mutum marar aibi ba, ba kuwa zai taimaki masu aikata mugunta ba. Har yanzu zai cika bakinka da dariya, leɓunanka kuma da sowar farin ciki. Waɗanda suke ƙinka za su sanya tufafin kunya, tentin mugaye kuma ba zai ƙara kasancewa ba.”