Jobu 8

8 ¹Nígbà náà ni Bilidadi ará Ṣuhu dáhùn pé: ²“Yóò ti pẹ́ tó tí ìwọ yóò fi máa sọ irú àwọn nǹkan wọ̀nyí? Àwọn ọ̀rọ̀ ẹnu rẹ kò jẹ́ nǹkan bí kò ṣe ẹ̀fúùfù tí ń hó. ³Ọlọ́run ha ń yí ìdájọ́ po bí? Olódùmarè ha ń yí ohun tí ó tọ́ po bí? ⁴Bí àwọn ọmọ rẹ bá ti ṣẹ̀ sí i, ó fi wọ́n lé àbájáde ìṣọ̀tẹ̀ wọn lọ́wọ́. ⁵Ṣùgbọ́n bí ìwọ bá fi gbogbo ọkàn wá Ọlọ́run, tí ìwọ sì bẹ Olódùmarè fún àánú, ⁶bí ìwọ bá mọ́ tónítóní tí ó sì dúró ṣánṣán, nítòótọ́ nísinsìnyí ni yóò dìde fún ọ, yóò sì dá ọ padà sí ipò tí ó tọ́ sí ọ. ⁷Bí ó tilẹ̀ jẹ́ pé ìbẹ̀rẹ̀ rẹ kéré, àwọn ọdún ìkẹyìn rẹ yóò gbilẹ̀ rékọjá ìwọ̀n. ⁸Bi àwọn ìran tí ó ti kọjá lọ pẹ́, kí o sì ro ohun tí àwọn baba wọn wá rí. ⁹Nítorí àná ni a bí wa, àwa kò sì mọ nǹkan kan; ọjọ́ wa lórí ilẹ̀ ayé kò jẹ́ nǹkan bí kò ṣe òjìji. ¹⁰Wọn kì yóò ha kọ́ ọ, kí wọ́n sì sọ fún ọ, kí wọ́n sì mú ọ̀rọ̀ jáde láti inú òye wọn bí? ¹¹Papirusi ha lè ga sókè níbi tí kò sí ẹrẹ̀ bí? Esùsú ha lè gbilẹ̀ láìsí omi bí? ¹²Nígbà tí ó ṣì wà ní tútù tí a kò sì ké e, ó rọ kánkán ju koríko èyíkéyìí lọ. ¹³Báyìí ni àyànmọ́ gbogbo àwọn tí ń gbàgbé Ọlọ́run; bẹ́ẹ̀ ni ìrètí àwọn aláìwà-bí-Ọlọ́run ń ṣègbé. ¹⁴Ìgbọ́kànlé rẹ̀ jẹ́ ẹlẹgẹ́, ìgbẹ́kẹ̀lé rẹ̀ sì jẹ́ ọ̀wú aláǹtakùn. ¹⁵Ó fẹ̀yìntì ilé rẹ̀, ṣùgbọ́n kò dúró; ó di i mú ṣinṣin, ṣùgbọ́n kò wà pẹ́. ¹⁶Ó dàbí ọ̀gbìn tí a bomirin dáradára nínú ìmọ́lẹ̀ oòrùn, tí ń tan ẹ̀ka rẹ̀ ká gbogbo ọgbà. ¹⁷Gbòǹgbò rẹ̀ yí òkìtì òkúta ká, ó sì ń wá ibi tí yóò gbá mú láàrin àpáta. ¹⁸Ṣùgbọ́n nígbà tí a bá fà á tu kúrò ní ipò rẹ̀, ibẹ̀ yóò sẹ́ ẹ, yóò wí pé, ‘Èmi kò rí ọ rí.’ ¹⁹Báyìí ni ayọ̀ ọ̀nà rẹ̀—àwọn mìíràn yóò sì hù jáde láti inú erùpẹ̀ ní ipò rẹ̀. ²⁰Ọlọ́run kì yóò kọ ènìyàn aláìlẹ́bi sílẹ̀, bẹ́ẹ̀ ni kì yóò ran àwọn olùṣe-búburú lọ́wọ́. ²¹Yóò ṣì fi ẹ̀rín kún ẹnu rẹ, àti ètè rẹ pẹ̀lú ariwo ayọ̀. ²²Àwọn tí ó kórìíra rẹ yóò fi ìtìjú wọ aṣọ, àgọ́ àwọn ènìyàn búburú kì yóò sì sí mọ́.”