Kowol Bildad ne po Shuah
Mwaei Bildad eng' ng'aleek che gimit: ma imaasi Kamuktaindet kirwooget, nooto anyun kagonyoor lagogap Job ne ki chopchi ngelelnatennywa. Cheeng' Kamuktaindet, itiliil, ak kosiir letennyi taunetennyi. Kaboorunennyi ne po che utye Kamuktaindet—mutweek ne ma mi lumbwek, ak useet ne po tyongindet—ko tokyingei Job.
8 1Yeityo kowol Bildad ne po Shuah, koleenji: 2“Au ne ingen ing'alaali tuguuk che uu chooto? Ng'aleegap kuting'ung' ko uu usoonet ne borisei. 3Tos imaasi Kamuktaindet kirwooget? Tos imaasi Ineendet Ne po Kamuktaet imanda? 4Ngot kotengekto lagoguk agobo ineendet, ko ki koyookto icheek eng' kiy ne punu ngelelnatennywa. 5Ago ngot icheeng' Kamuktaindet eng' muguleldang'ung' tugul, ak isaa Ne po Kamuktaet rireenet, 6ngot itiliil ak iek ne ititaat, iman ing'eetun nguno agobo inyee, ak koweeksei komostang'ung' ne po imanda. 7Agot ngot ko ki taunetang'ung' ne ming'in, kotuneni kenyiisyekyuk che isubu kosiir karagendoet. 8Teebe piik che po keny, ak ibwaat kiy ne ki icheeng'at kwaandaikwak. 9Amu ki kikisichech amut agenge ak mangen kiy age, ak peetuusyekyok eng' ng'wony ko uu urwet. 10Tos ma kineetin icheek ak komwachin, ak komutu ng'aleek che punu naennywa? 11Tos imuuchi komang'u mutweek ole ma mi lumbwek? Tos imuuchi kotuneni oriit ngo ma mi peek? 12Kota tuon ak ma kitil, korestos kole kondoe susweek tugul. 13Ko uu niito let ne po che utye Kamuktaindet tugul; ak kobetos tanuutap che mangen Kamuktaindet. 14Mang'unennyi ko kiy ne pirgei chut, ak mang'unennyi ko uu kootap mongutyot. 15Tebenoti koonnyi, ago ma itononi; namegei ineendet, ago ma mi koigeny. 16Ko uu minutiet ne ki iobis komyee eng' kong'asiis, ak koreebei sageekyik eng' mbareet komugul. 17Nemtegei rootikyik karurugutyet ne po koik, ak kocheeng'ei komoswek among rwandosyek si konam. 18Ago ngo king'etkisyo oldanyi, koeesyo oldanyi ineendet, kole, ‘Mi ki ageerin kogeny.’ 19Ko uu niito poiboiyetap ooreennyi— ak mong'u alak eng' ng'wony oldanyi. 20Ma wechei Kamuktaindet chiito ne ititaat, ak ma koonu eunnyi yaigap yaityet. 21Itoromben kuting'ung' ng'eetet, ak kuting'ung' kagasetapkei ne po poiboiyet. 22Kilaakchini che wechin kalilanet, ak kobetos emaitap kiptengeginik.”