Shuhwui Bildadna Ngahānkai
Bildadna lakkhi hānga: Varena mashun masho ngasakmana, chiwui vang Jobwui naongarābingna athumwui moreiwui thāda samphanghaira. Vareli phālu, tharalu, kala nawui mayamang chi aphungwui eina hakmahālak sāra. Rapur makhalei konnā, kārkaopan: Vareli makatheibingwui pongli ana kahāng mazā chi Jobli sāda hāngna.
8 1Chieina Shuhwui Bildadna ngahānkai: 2"Karankha nana hikathā tui hāngchingrakhala? Nakhamorwui tuibing chi masi khangang mānga. 3Varena mashun ngui ngasakla? Sāshap-pangshapana khamashung khangarong ngui ngasakla? 4Nanaongarāla ali morei saakha, ana athumli athumwui salāngwui pāngli horsangmihaira. 5Kha nana Vareli thuklak eina phaakha, kala Sāshap-pangshapali lukhamashanwui vang ngasoda poakha, 6Nana thara kala khangatara jiakha, ara kachangkhat eina ana nawui vang khalattana ngakarthuida, nali nawui khangachāwui pamli khuiungmiluira. 7Nawui haokaphok kateowa jilala, nawui khaleiwui atambing chi mathān rarmana shokpemra. 8Achālakhawui thotbingli ngahānlu, kala athumwui avā ngarāna phākashok kahai chi machukyanglu. 9Kaja ithum ayāmāng pharāhaira, kala khikha matheimana; ithumwui okathuili atam chi khaya̱ mānga. 10Athumna nali tamchitheida hāngmira maningmala, kala athumwui theishingkakhuiwui eina tuibing hāshokra? 11Hurning maleipamli chihirthing juida phorpaila? Tara̱ makhalei titi phorpaila? 12Thingra̱ zatta kala makatatshahai jilala, chi khawo saikorali thākmei thenga. 13Vareli malaikahaibing saikorawui apong chithai; chithāda vare makathei miwui kachihān shimāna. 14Awui ning khanganung chi khangazan, kala awui shitkasang chi karkaopan kathāna. 15Ana awui shimtungli ngaya̱, kha chi manganingmana; ana chili singtita, kha chi maleichingmara. 16Ana zimikwui kahorli tara̱ mavātla chuikahai thingrong kathāna; awui ashonbing yāmguili ngapānvai. 17Awui angayungbingna lung shunkahai chi kuimareida ngapaikhui, kala lunghārbing alungli singtitkhavai apam phai. 18Kha awui pamkhavai eina serkazam tharan, awui pamna ali horhaida, 'Ina nali matheilakranga' da hānga. 19Awui shongfawui khamathāna hithālaka; ngalei eina kateibingna awui pamkhavaili phorra. 20Varena shāt makakā mi akhali mamayāmara, kala makaphā kasābingli awui pāng masatsangmimara. 21Ana chithālala nawui khamor khamana̱ eina chipemra, kala nawui morchaili khamathānkhon eina chipemra. 22Nali yangkakharingbing maishi eina chonvai sāra, kala makhayābingwui kachonshim maleiluimara."
