Shuhi manuh Bildad pora jawab diye
Bildad aru sidha ase: Isor bichar ke ulta nakore, etu nimite Job laga bacha khan tarkhan laga paap laga laik paise. Isor ke bisaribi, sapha thakibi, aru shesh tu shuru pora bhi bisi ujala hobo. Isor ke namana khan laga tai laga chobi, pani nathaka nol, makora laga jal, sidha Job phale ase.
8 1Tetiya Shuhi manuh Bildad pora jawab di koise: 2“Kiman din tak tumi eneka kotha koi thakibo? Tumar mukh laga kotha khan garaj kora hawa he ase.” 3“Isor pora nyay ke tera kori diye naki? Sob-sakti thaka Isor pora ki thik ase eitu ke tera kori diye naki?” 4“Jodi tumar bacha khan Tar bidhi te paap korise, tetiya tarkhan laga bidroh laga phol te Tar pora taikhan ke di dise.” 5“Kintu jodi tumi mon di kene Isor ke bisaribo, aru Sob-sakti thaka Isor logot te doya nimite binti koribo,” 6“Jodi tumi sapha aru thik ase, tetiya niscoy etiya Tai tumar nimite jagibo aru tumi ke tumar thik jagah te wapas anibo.” 7“Tumar shuru to chutu thakile bhi, tumar pichete laga din khan naapi bo napara iman dangor hoi jabo.” 8“Poila laga jamana khan ke hudibi, aru tarkhan laga baba khan pora ki bisari paise eitu bhabi sabi.” 9“Kilemane amikhan kali he jonom hoise aru eku najane; prithibi te amar din khan ekta chaya he ase.” 10“Tarkhan pora tumi ke nasikhabo naki aru nakobo naki, aru tarkhan laga buddhi pora kotha ulai nadibo naki?” 11“Pani-mati nathaka jagah te nol ghas lamba hoi uthibo pare naki? Pani nathaki kene nol khan dangor hobo pare naki?” 12“Etiya bhi hara aru nakata thaka homoi te, eitu dusra sob ghas pora joldi sukhi jai.” 13“Isor ke pahori diya sob manuh laga anjam eneka he ase; eneka kene Isor nathaka manuh laga asha khotom hoi jai.” 14“Tar bharosa komjur ase, aru tar biswas makri laga jal nisina ase.” 15“Tai nijor ghor te thaka pai, kintu eitu khara nathake; tai eitu ke jor pora dhori rakhe, kintu eitu tiki nathake.” 16“Tai suryo laga ujala te bhal pani pa-a ghas nisina ase, bagan uporte tar laga daal khan phailai di ase.” 17“Tar jor khan pathor laga dher te bandhi loi, aru dhori bole jagah nimite pathor khan majote bisare.” 18“Kintu jitia tai ke tar jagah pora ulai phelai, tetiya eitu tai ke chari diye, aru koi, ‘Moi tumi ke kitia bhi dekha nai.’” 19“Tar rasta laga khushi to eneka he ase— aru matir pora dusra khan tar jagah te uthi ahe.” 20“Isor pora eku golti nathaka manuh ke phelai nadiye, aru biya kaam kora khan ke modot bhi nadiye.” 21“Tai etiya bhi tumar mukh ke hahi pora bhorta koribo, aru tumar oth ke khushi laga awaj pora bhorta koribo.” 22“Tumi ke ghin kora khan sorom laga kapor pindhibo, aru biya manuh laga tombu aru nathakibo.”