Job 8

8 ¹Unya mitubag si Bildad nga Suhanon: ²“Hangtod kanus-a ka magpadayon sa pagsulti sa maong mga butang? Ang mga pulong sa imong baba sama lamang sa nagngulob nga hangin. ³Tuison ba sa Dios ang hustisya? Tuison ba sa Makagagahom ang matarong? ⁴Kon ang imong mga anak nakasala batok kaniya, gitugyan niya sila ngadto sa bunga sa ilang pagsukol. ⁵Apan kon kinasingkasing mong pangitaon ang Dios ug mangamuyo sa Makagagahom alang sa kaluoy, ⁶kon ikaw putli ug matarong, sigurado nga karon mobangon siya alang kanimo ug ipahiuli ka sa imong angayan nga dapit. ⁷Bisan diyutay ang imong sinugdanan, ang imong ulahing mga tuig mouswag nga walay sukod. ⁸Pangutana sa mga kaliwatan nga dugay nang milabay, ug palandonga ang gisusi sa ilang mga amahan. ⁹Kay kagahapon lamang kita natawo ug walay nahibaloan; ang atong mga adlaw sa yuta sama lamang sa anino. ¹⁰Dili ba sila motudlo kanimo ug mosulti kanimo, ug mopagula sa mga pulong gikan sa ilang salabutan? ¹¹Motubo ba nga taas ang papiro kon walay lamakan? Molambo ba ang mga bugang kon walay tubig? ¹²Samtang lunhaw pa ug wala pa maputol, malaya kini nga mas paspas kay sa bisan unsang sagbot. ¹³Mao kini ang dangatan sa tanan nga nalimot sa Dios; mao usab ang pagkawagtang sa paglaom sa mga walay Dios. ¹⁴Ang iyang pagsalig huyang, ug ang iyang pagtuo sama sa balay sa lawalawa. ¹⁵Mosandig siya sa iyang balay, apan dili kini motindog; mogunit siya niini, apan dili kini molungtad. ¹⁶Sama siya sa tanom nga maayong pagkabisbis diha sa kahayag sa adlaw, nga nagakatag sa iyang mga saha sa tibuok tanaman. ¹⁷Ang iyang mga gamot molikos sa tapok sa mga bato ug mangita taliwala sa mga bato ug dapit nga kapyutan. ¹⁸Apan kon ibton siya gikan sa iyang dapit, isalikway siya niini, nga magaingon, ‘Wala ko ikaw makita.’ ¹⁹Mao kini ang kalipay sa iyang dalan—ug gikan sa yuta mitubo ang uban puli kaniya. ²⁰Dili isalikway sa Dios ang tawong walay ikasaway, ni motabang siya sa mga mamumuhat ug daotan. ²¹Pun-on pa niya ang imong baba sa katawa ug ang imong mga ngabil sa mga singgit sa kalipay. ²²Kadtong nagadumot kanimo pagabistihan sa kaulaw, ug ang tolda sa mga daotan mawagtang na.”