Hiak swak thang rwe
Chongdip

Shuhite rwan Bildad na Katake

Bildad na ma bataknuwe diga rinne: Rikrwang na ririak senu ding pi gon swak laye, atibriakpina Job om sa rwanna bani om kasianu om kaba ding lou rwe. Rikrwang ding zong ngo, bathiangga ong ngo, atiye dabe bakakhamnu ga bathoutannu ma baanlune. Rikrwang maaknu nun om pi mu thangnu—tui maaknu papyrus, bang kasonnu—ga Job khou takoluga rinne.

Bung 8.

Atiga Shuhite rwan Bildad na katake, “Nangna hei dannu thinu ding bakaan khop seiga rin onglune dingbo? Namun om chong bing ga baraamnu thiraang za gaye. Rikrwang na bazenu chongsem ding pi gon swaknubo? Ngam Bachangnu na ririak senu ding pi gon swaknubo? Nasa rwanna Bakhou noh to rwe dabe, Maanna bani om chong laa pi swaknu om kaba khou bani ding bachoi thang rwe. Atiyeda nangna Rikrwang ding sung tangga zong nge dabe, khatle Ngam Bachangnu khou phaangkriang lang hweicha thang nge dabe, Nang bathiangnu khatle ririak senu nang nge dabe, batak takka atunba Maanna nang lang kaithouluga naom ririak senu riak bi nang ding pi han thou latlune. Nathoutannu ga sin kataknu thou ngaakka le, nabataang la nakum bing ga dat kae lang maakka lian thoulune. Mikin bing khou ngaiyo, thou damnu bakaan la, khatle bani pu pa rwanna zongsu damnu ding kakhanno. Balangbe aniya inzaan za pon damnu khatle pakhatcha le thei make; ani talei ram bi ongnu ni bing ga bakatha za gaye. Banina nang khou zathang piluga rin thang makkabo, khatle bani om bakaba theinu khouna chong bing ga lat swak thang makkabo? Tui maaknu riak bi papyrus ga basaangga thou kraagabo? Tui maakka kaang louna ga lian thou kraagabo? Haga ba annu khatle tam mak aangnu kaan bi, haga louna khat ting ma barapka baowei taye. Rikrwang ding banemnu mi bing om lampui ga hadanga gaye; hadanga Rikrwang ding kachi maknu nun om taswan ga braan damlune. Baom balumsat ka braan zanu gaye, khatle baom balumsanu ga mamik om kabam danga gaye. Maanna baom in bi tei nge atiyeda haga kating thou make; maanna haga choitipka choi nge atiyeda haga khaang make. Maan ga lumik bi tui bachangga sainu louna danga gaye, baom babaak bing ga anqwat chaat lak pi lan swak nge. Baom kamong bing ga lung khom bi sin kangga, lung bing lak pi choitip riak lang zong nge. Atiyeda maan baom riak khouna phok satnu kaan bi, haba riak gana bating ding za makka, ‘Eina nang impha ni le munu make’ diga rinne. Baom lampui om karonu ga hadanga gaye khatle talei khouna kateina maan om riak bi mongka thoulune. Rikrwang na koi maaknu mi ding bathaang sat thanglaye, khatle sa maknu to ongnu nun ding le Maanna loukhut thanglaye. Maanna namun ding banuinu bina pi sip thanglune, khatle nakhamthing ding karonu swaknuna pi sip thanglune. Nang ding batannu nun ga kazaknu ding pwan danga sin basoi lune, khatle sa maknu nun om pwan in ga braan damlune.”