Kowol Job eng' Kapng'atat
Mwaei Job kole ngot kiweigei nyalildanyi ko koe kosiir sandetap nyanjosyek, ak kole mi ineendet kipchaboniigap Ne Kiim Tugul. Mache kong'em Kamuktaindet ineendet. Ne ya kosiir, bagaakte choronoknyi ineendet ko uu susweegap surkwen che yamei ye nyonu kiprutoinik che machei peek.
6 1Kowol anyun Job, kole: 2“Ingeweigei pichiindanyu, ak ingonde togeet nyalildanyu tugul eng' ratilit! 3Iman koe nyalilda niito kosiir sandetap nyanjosyek— nooto anyun si koek ng'aleekyuk che njaamik. 4Amu mi anee kipchaboniigap Ne Kiim Tugul; ee kabuusennyu ng'wonekwak; keng'eetyo kamuisosyegap Kamuktaindet agaigai anee. 5Tos riirei sigiryet ne po timiin agobo susweekyik, anan ko mooi tet agobo amitwogikyik? 6Tos keam amitwogik che ma tinyei karomet ma mi muunyuk, anan ko mi karomet eng' peegap malou? a a v6 Malou ko minutiet ne po timin; cheekyik che laei ko memdos ak ma rome, ko kaboorunet ne po amitwogik che ma tesei kimnateet anan che ma chamat chii. 7Eesyo muguleldanyu konam icheek; amitwogichooto ko uu amitwogik che aweche anee. 8Oo, ingekonwo soomennyu, ingoono Kamuktaindet kiy ne riene muguleldanyu, 9ingocham Kamuktaindet kong'em anee, koyaat eunnyi ak kotilwo! 10Niito ko kagaigaennyu kogeny—anee atorombeni eng' boiboindo agot eng' nyalilda ne ma tinyei rireenet—amu ma aeesye ng'aleek che po Ne Tiliil. 11Ao kimnateennyu, si atagoiisye kong'eny? Ak letuut ne ao ne gerwo, si amuitu? 12Tos kimnateennyu ko kimnateetap koiik? Tos poortanyu ko po keek? 13Tos ma mi toreet ne mi anee, amu kagiista utaatyet ne komyee eng' anee? 14Chii age tugul ne ma igoochi chorwennyi kindeat, kibagaakta iywetap Ne Kiim Tugul. 15Ago unotos tupchosyekyuk ko kou kereruut ne po surkwen, ko kou kereruusyegap ainoosyek che ng'irtagei ak koyamsei, 16che tuuitos eng' barak che myolei, che nyiitootiin teluji ne kiuny, 17ago eng' kasarta ne po yamdo ko betok; ye konyo kiptoret, ko kipetei eng' oldowak. 18Kiwal piik che taban ortinwekwak; kolanda koba surkwen ak kobek. 19Cheeng'ei peek piik che taban che po Tema; oiiye nooto kiprutoinigap Sheba. 20Kong'onyotin amu ki iyan; kogoit olooto ak kobetyo oiyekwak. 21Nguno ko kagoegu kora okweek kiy ne ma kiy; ogeero okweek kiy ne iywenat ak oiywei. 22Tos ki amwa kibatai ale, ‘Koono kiy’? Anan ale, ‘Igoochino melekto ne punu pogoiyeng'ung'’? 23Anan ale, ‘Isarwo eng' eutap puunyoot’? Anan ale, ‘Iwaldowo eng' eunegap piik che koroom’? 24Ineeta, ak asiis; iboorwo ole kagilel. 25Nyalilda naao ng'aleek che po iman! Ago ibooru nee kergeyeng'ung'? 26Tos imache ikergong' ng'aleek kityo, igeere ng'olyootap chii ne ichuchui ko uu koristo? 27Agot iseri parbareek agobo lakwa ne ma tinyei sigiik ak ialde chorweng'ung' inyee. 28Ago nguno, asaain, igeer anee—ma aung'un eng' taing'ung'. 29Owal, asaain; amat ko mi yaityet. Owal—tee kotonone imandanyu. 30Tos mi yaityet eng' ng'elyeptanyu? Tos ma muuchi kutinnyu kong'en kiit ne ng'emisyei?”